ណាសាព្រមាន! អាចម៍ផ្កាយ «អ្នកពិឃាដទីក្រុង» អាចហោះបុកផែនដី នៅ ៧ឆ្នាំទៀត

អង្គការណាសាបានចេញការព្រមានថា ៧ឆ្នាំទៀត អាចម៍ផ្កាយដ៏ធំមួយអាចហោះបុកផែនដី ដ្បិតក្រុមអ្នកវិទ្យាសាស្រ្តព្យាករថា មានឱកាសស្តួចស្តើងក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Daily Mail នៅដើមខែកុម្ភៈឆ្នាំ២០២៥, បើវិភាគតាមគន្លងហោះ អាចម៍ផ្កាយដែលគេឲ្យរហ័សនាមថា «អ្នកពិឃាដទីក្រុង» ឬមានឈ្មោះ 2024 YR4 នឹងអាចហោះមកបុកផែនដីនៅថ្ងៃទី២២ខែធ្នូឆ្នាំ២០៣២ ខណៈដំបូងឡើយក្រុមអ្នកវិទ្យាសាស្រ្តបញ្ជាក់ថា វាមានឱកាសហោះបុកផែនដីត្រឹម ១,២%ប៉ុណ្ណោះ ប៉ុន្តែឥឡូវឱកាសរបស់វាបានឡើងដល់ ១,៣%ហើយ។ 

ប្រព័ន្ធត្រួតពិនិត្យផលប៉ះពាល់ផែនដី «Sentry» របស់អង្គការណាសា បានចេញព័ត៌មានថា បើធ្លាក់មែន អាចម៍ផ្កាយដែលមានអង្កត់ផ្ចិតចន្លោះ៤០ម៉ែត្រទៅ១០០ម៉ែត្រមួយនេះ អាចបុកចំតំបន់លាតសន្ធឹងចាប់ពីអាមេរិកខាងត្បូង ឆ្លងកាត់មហាសមុទ្រអាត្លង់ទិក ទៅដល់អនុតំបន់សាហារ៉ាអាហ្វ្រិក។ 

លើសពីនេះតាមការគុណគូរ អាចម៍ផ្កាយ «អ្នកពិឃាដទីក្រុង» នឹងបង្កការបំផ្លិចបំផ្លាញដ៏មហន្តរាយធំធេងប្រសិនបើវាធ្លាក់ចំតំបន់មានប្រជាជនរស់នៅច្រើន ឬទីក្រុងធំៗមែន ព្រោះថា វាមានកម្លាំងផ្ទុះស្មើនឹងគ្រាប់បែក TNT ៥០លានតោនឯណោះ។

ទោះបីជាយ៉ាងណា ក្រុមអ្នកវិទ្យាសាស្រ្តណាសា បានអំពាវនាវដល់គ្រប់គ្នាកុំមានការព្រួយបារម្ភឲ្យសោះ ព្រោះអង្គការកំពុងតាមដានអាចម៍ផ្កាយនេះយ៉ាងយកចិត្តទុកដាក់ ហើយកំពុងធ្វើការងារដើម្បីធានា១០០%ថា អាចម៍ផ្កាយនេះ នឹងមិនបុកផែនដីឡើយ៕ 

អត្ថបទ៖ សុខ សុវណ្ណ

ចុចអាន៖ ណាសា តាមដានអាចម៍ផ្កាយ ដែលនឹងហោះកាត់ផែនដី ក្នុងល្បឿនលឿនជាងគ្រាប់កាំភ្លើង ១០ដង