ព័ត៌មានអន្ដរជាតិ

NASA បង្ហោះយានអវកាសបញ្ជូនអវកាសយានិកទៅភពព្រះចន្ទដោយប្រើ៧ដំណាក់កាល

បានផុស

១ ខែ មុន

នៅ

ថ្ងៃពុធ ១ មេសា ២០២៦

ដោយ

ថ្ងៃនេះជាថ្ងៃដ៏សំខាន់មួយសម្រាប់វិស័យអវកាសសហរដ្ឋអាមេរិក។ រដ្ឋបាលអាកាសចរណ៍ និងអវកាសជាតិ (NASA) កំពុងចាប់ផ្តើមបេសកកម្ម Artemis II របស់ខ្លួនទៅកាន់ឋានព្រះចន្ទនៅថ្ងៃទី០១ ខែមេសា នេះ ហើយកិច្ចការនេះជាមោទនភាពដ៏ធំរបស់ពលរដ្ឋអាមេរិក។ បេសកកម្មទៅកាន់ឋានព្រះចន្ទ បានបញ្ជូនអវកាសយានិកចំនួន៤នាក់ក្នុងដំណើរមួយដែលមានល្បឿនលឿនជុំវិញឋានព្រះចន្ទ និងត្រឡប់មកវិញ វានឹងចំណាយពេល១០ថ្ងៃ។

យោងតាម FirstPost ផ្សាយថ្ងៃទី០១ខែមេសា បេសកកម្មដែលមានមនុស្សលើកដំបូងរបស់ NASA ឆ្ពោះទៅឋានព្រះចន្ទក្នុងរយៈពេលជាងប្រាំទសវត្សរ៍របស់ Artemis II ត្រូវបានរចនាឡើង ដើម្បីរៀបចំផ្លូវសម្រាប់បេសកកម្មនាពេលអនាគត ជាពិសេសមានគោលបំណងបញ្ជូនអវកាសយានិកទៅកាន់ផ្ទៃឋានព្រះចន្ទនៅពេលក្រោយៗទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពីមុនមក NASA បានបាញ់បង្ហោះបេសកកម្ម Artemis I ដែលគ្មានមនុស្សបើកទៅកាន់ឋានព្រះចន្ទក្នុងឆ្នាំ២០២២។ ខាងក្រោមនេះជាដំណើរការឆ្ពោះទៅឋានព្រះចន្ទរបស់ក្រុមអវកាសយានិកទាំង៤នាក់។

ចំណុចចាប់ផ្តើមបង្ហោះ ៖ នៅថ្ងៃទី០១ ខែមេសា យានអវកាស Artemis II គ្រោងនឹងបាញ់បង្ហោះចេញពីមជ្ឈមណ្ឌលអវកាស Kennedy របស់ NASA ក្នុងរដ្ឋ Florida ជាមួយនឹងប្រព័ន្ធបាញ់បង្ហោះ Space Launch System ដែលជារ៉ុក្កែតដ៏មានឥទ្ធិពលបំផុតដែលអង្គការនេះធ្លាប់បានបាញ់បង្ហោះ តែការប្រតិបត្តិការនេះអាស្រ័យលើអាកាសធាតុដែរ។

ថ្ងៃទី១-២៖ ការត្រួតពិនិត្យគន្លងផែនដី ក្រុមនាវិកនឹងចំណាយពេលមួយទៅពីរថ្ងៃដំបូងនៅក្នុងគន្លងផែនដីខ្ពស់ ដោយធ្វើការត្រួតពិនិត្យប្រព័ន្ធដ៏ធំទូលាយ។ បេសកម្មនេះមានទាំងការសាកល្បងនៃប្រព័ន្ធទ្រទ្រង់ជីវិត រុញច្រាន រុករក និងប្រព័ន្ធទំនាក់ទំនងរបស់យាន Orion ដើម្បីធានាថាយានអវកាសត្រៀមខ្លួនរួចជាស្រេច ក្នុងការធ្វើដំណើរទៅកាន់លំហអាកាសជ្រៅ។

ការចូលតាមព្រះចន្ទ៖ ពេលការត្រួតពិនិត្យត្រូវបានបញ្ចប់ ប្រព័ន្ធរុញច្រានយាន Orion នឹងអនុវត្តការដុតម៉ាស៊ីនដ៏សំខាន់មួយ ដែលគេស្គាល់ថាជា«ការចាក់បញ្ចូលតាមចន្ទគតិ» ដោយបញ្ជូនយានអវកាសចេញពីគន្លងផែនដី ចូលទៅក្នុងគន្លងឆ្ពោះទៅកាន់ឋានព្រះចន្ទ។

ថ្ងៃទី ៣-៤៖ ដំណើរឆ្ពោះទៅកាន់ឋានព្រះចន្ទ អំឡុងពេលធ្វើដំណើរឆ្លងកាត់ឋានព្រះចន្ទច្រើនថ្ងៃ អវកាសយានិកនឹងបន្តតាមដានប្រព័ន្ធយានអវកាសក្នុងដំណើរទៅកាន់ប្រតិបត្តិការឆ្ងាយពីផែនដីជាងការហោះហើរអវកាសរបស់មនុស្សពីមុនៗ។

ការហោះហើរឆ្លងកាត់ឋានព្រះចន្ទ៖ យាន Orion នឹងឆ្លងកាត់ក្រោយឋានព្រះចន្ទលើគន្លង និងត្រឡប់មកវិញដោយគ្មានការបញ្ជាណាមួយ ដែលជាផ្លូវសម្រាប់បង្វិលយានអវកាសត្រឡប់ទៅផែនដីវិញដោយធម្មជាតិដោយមិនចាំបាច់ប្រើកម្លាំងរុញច្រានបន្ថែម។ យានអវកាសនឹងទៅដល់ចម្ងាយឆ្ងាយបំផុតពីផែនដីក្នុងដំណាក់កាលនេះ។

ថ្ងៃទី៥–៨៖ ត្រឡប់មកផែនដីវិញ បន្ទាប់ពីការហោះហើរកាត់ឋានព្រះចន្ទ ក្រុមអវកាសយានិកនឹងចំណាយពេលច្រើនថ្ងៃ ដើម្បីធ្វើដំណើរត្រឡប់មកវិញ។

ការចូលផែនដី និងការបាញ់ទម្លាក់៖ នៅពេលដែលយាន Orion ខិតជិតផែនដី វានឹងបំបែកសមាសធាតុសំខាន់ៗមុនពេលធ្លាក់ចូលទៅក្នុងបរិយាកាសក្នុងល្បឿនជាង ៤០ ២៣៣ គីឡូម៉ែត្រក្នុងមួយម៉ោង។