ក្រុមអ្នកវិទ្យាសាស្ត្រ រកឃើញអាចម៍ផ្កាយ មានទំហំធំបំផុត បំបែកកំណត់ត្រា

ក្រុមអ្នកវិទ្យាសាស្ត្រ បានរកឃើញអាចម៍ផ្កាយមួយ ដែលមានទំហំបំបែកកំណត់ត្រា ពោលគឺវាមានទំហំជិតស្មើនឹងទីលានបាល់ទាត់ចំនួន ៨ បូកបញ្ចូលគ្នាឯណោះ។ នេះបើតាមការផ្សាយរបស់ Independent នៅថ្ងៃព្រហស្បតិ៍ទី៨ខែមករាឆ្នាំ២០២៦។

ជាផ្នែកមួយនៃកម្មវិធី «First Look», អាចម៍ផ្កាយនេះមានឈ្មោះ «2025 MN45» ត្រូវបានរកឃើញដោយប្រើប្រាស់ទិន្នន័យពី មន្ទីរអង្កេតតារាសាស្ត្រ Vera C. Rubin ក្នុងប្រទេសឈីលី ដែលមានបំពាក់នូវកាមេរ៉ាឌីជីថលធំបំផុតក្នុងលោក ពោលគឺមានកម្រិតភាពច្បាស់ដល់ទៅ ៣ ២០០ មេហ្គាភិចសែល។

ចំណុចដែលគួរឲ្យភ្ញាក់ផ្អើលបំផុតរបស់អាចម៍ផ្កាយនេះគឺ វាមានទំហំធំជាង ៥០០ ម៉ែត្រ ដែលវិលជុំវិញខ្លួនឯង លឿនបំផុត មិនធ្លាប់មាន។ វាវិលជុំវិញខ្លួនឯងមួយជុំរៀងរាល់ ១.៨៨ នាទីប៉ុណ្ណោះ បើប្រៀបធៀបនឹងផែនដីដែលត្រូវចំណាយពេល ២៤ ម៉ោង ដើម្បីវិលបានមួយជុំ។

តាមរយៈល្បឿនវិលដ៏លឿនបែបនេះ អ្នកវិទ្យាសាស្ត្រសន្និដ្ឋានថា 2025 MN45 អាចបង្កើតឡើងពី វត្ថុធាតុរឹងមាំខ្លាំងបំផុត ព្រោះថា ប្រសិនបើវាគ្រាន់តែជាបំណែកថ្មតូចៗដែលផ្គុំគ្នាដោយកម្លាំងទំនាញនោះ វាប្រហែលត្រូវបែកខ្ចាត់ខ្ចាយជាបំណែកតូចៗបាត់ទៅហើយ ដោយសារកម្លាំងរង្វិលដ៏ខ្លាំង។

ក្រុមអ្នកជំនាញផ្នែកអវកាសបានពន្យល់ថា៖ «សម្រាប់វត្ថុអវកាសនៅក្នុងខ្សែក្រវាត់អាចម៍ផ្កាយមេ កម្រិតកំណត់នៃការវិលលឿនបំផុតដើម្បីចៀសវាងការបែកខ្ចាត់ខ្ចាយ គឺ ២.២ម៉ោង។ អាចម៍ផ្កាយដែលវិលលឿនជាងកម្រិតនេះ ត្រូវតែមានរចនាសម្ព័ន្ធរឹងមាំដើម្បីរក្សារូបរាងឲ្យនៅដដែលបាន»។

សូមជម្រាបថា 2025 MN45 គឺជាអាចម៍ផ្កាយមួយក្នុងចំណោមអាចម៍ផ្កាយជិត ២ ០០០ ដែលត្រូវបានរកឃើញដោយ Vera C. Rubin។

វាស្ថិតនៅក្នុងខ្សែក្រវាត់អាចម៍ផ្កាយមេ ដែលនៅចន្លោះគន្លងភពអង្គារ និងភពព្រហស្បតិ៍ ហើយមានចម្ងាយប្រហែល ៣០០ លានម៉ាយល៍ពីផែនដី។ ដូច្នេះមានន័យថា វាមិនអាចបង្កហានិភ័យដល់ភពផែនដីបានឡើយ៕

អត្ថបទ៖ សុខ សុវណ្ណ