សមាជិកសភាអាមេរិក ព្រាងច្បាប់បោះពុម្ភក្រដាសប្រាក់ ២៥០ដុល្លារ ដាក់រូបលោក Trump 

ពិតជារឿងដ៏គួរឲ្យភ្ញាក់ផ្អើល នៅពេលសមាជិកសភាអាមេរិកមួយរូបបានបង្ហាញសេចក្តីព្រាងច្បាប់ បោះពុម្ភក្រដាសប្រាក់២៥០ដុល្លារដែលមានដាក់រូបលោកប្រធានាធិបតី Donald Trump នៅលើនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយបង្ហោះសារលើបណ្តាញសង្គម X កាលពីថ្ងៃពុធទី២៦ខែកុម្ភៈឆ្នាំ២០២៥និងយកចុះផ្សាយដោយ New York Post, លោក Joe Wilson សមាជិករដ្ឋសភាខាងគណបក្សសាធារណរដ្ឋមកពីរដ្ឋ South Carolina បានសរសេរថា «ខ្ញុំមានសេចក្តីសោមនស្សរីករាយណាស់ដែលសូមប្រកាសថា ខ្ញុំកំពុងធ្វើសំណើច្បាប់ដើម្បីតម្រូវឲ្យការិយាល័យឆ្លាក់និងបោះពុម្ភ ឌីហ្សាញក្រដាសប្រាក់២៥០ដុល្លារ ដែលមានរូបលោក Donald J. Trump។ គោលនយោបាយរបស់លោក Biden បានបំផ្លាញសេដ្ឋកិច្ច បង្ខំឲ្យគ្រួសារអាមេរិកអស់លុយច្រើន។ ក្រដាសប្រាក់ដ៏មានតម្លៃបំផុតនេះ គឺសម្រាប់ប្រធានាធិបតីដែលមានតម្លៃបំផុត!»។

សម្រាប់ហេតុផលនៅពីក្រោយសំណើច្បាប់ «Donald J. Trump $250» នេះ ត្រូវបានលោក Wilson បញ្ជាក់ថា គឺព្រោះតែបញ្ហាប្រឈមផ្នែកសេដ្ឋកិច្ចឬគេហៅថា «Bidenflation» បន្សល់ទុកដោយលោក Biden ដែលបង្កឲ្យមានអតិផរណា ជំរុញឲ្យមានតម្រូវការខ្លាំងជាងមុនសម្រាប់រូបិយប័ណ្ណដែលមានតម្លៃកាន់តែខ្ពស់។

ទោះបីជាយ៉ាងណាក៏ដោយ គេមិនដឹងថាតើសំណើនេះបានសម្រេចដែរឬក៏អត់នោះទេ ព្រោះបើយោងតាមច្បាប់បច្ចុប្បន្នរបស់សហរដ្ឋអាមេរិក គឺបានហាមប្រាមដាក់រូបបុគ្គលដែលនៅមានជីវិត លើរូបិយប័ណ្ណ។

សេចក្តីព្រាងច្បាប់នេះក៏មិនទាន់បញ្ជូនដល់ដៃរដ្ឋសភានៅឡើយដែរ ប៉ុន្តែបើវាត្រូវបានអនុម័តមែន លោក Trump នឹងក្លាយជាប្រធានាធិបតីអាមេរិកដំបូងគេក្នុងប្រវត្តិសាស្រ្ត ដែលមានមុខនៅលើក្រដាសប្រាក់ដុល្លារ៕

អត្ថបទ៖ សុខ សុវណ្ណ

ចុចអាន៖ តម្លៃស៊ុតនៅអាមេរិកកើនឡើងជាង​៥០%​ខ្ពស់បំផុត​មិនធ្លាប់មាន ខណៈរដ្ឋបាលត្រាំ​បញ្ចេញ​លុយ​១០០០​លាន​​