ក្នុងសុន្ទរកថាទិវាឯករាជ្យ! ត្រាំ ព្រមាន កម្ទេចចោលឥទ្ធិពល កុម្មុយនីស្ត 

ក្នុងសុន្ទរកថា ទិវាឯករាជ្យជាតិសហរដ្ឋអាមេរិក គម្រប់ខួបលើកទី២៥០ ដែលរៀបចំឡើងនៅរដ្ឋធានី វ៉ាស៊ីនតោន ឌីស៊ី ប្រមុខសេតវិមាន ដូណាល់ ត្រាំ បានបង្កការចាប់អារម្មណ៍យ៉ាងខ្លាំង ពេលលោកមានប្រសាសន៍ពាក់ព័ន្ធរបបកុម្មុយនីស្ត។

តាមការផ្សាយរបស់ CNN នៅថ្ងៃអាទិត្យ ទី៥ ខែកក្កដា ឆ្នាំ២០២៦ ក្នុងសុន្ទរកថានោះ លោកត្រាំ បានព្រមានអំពីការងើបឡើងវិញ នៃឥទ្ធិពលកុម្មុយនីស្ត នៅក្នុងប្រទេសនេះ។

លោកត្រាំ លើកឡើងថា៖ «របបកុម្មុយនីស្តគឺជាអ្នកចាញ់ ហើយវានៅតែជាអ្នកចាញ់ជានិច្ច។ ប្រព័ន្ធកុម្មុយនីស្ត គឺផ្ទុយស្រឡះពីប្រព័ន្ធរបស់អាមេរិក ហើយវាមិនដែលដំណើរការទៅមុខនោះទេ»។

ទន្ទឹមនោះ លោកបានភ្ជាប់រឿងនេះ ទៅនឹងសេរីភាពជាតិថា៖ «ទង់ជាតិ Stars and Stripes ធ្លាប់បោះទង់ជ័យនិងកណ្តៀវ (និមិត្តសញ្ញាកុម្មុយនីស្ត) ឲ្យធ្លាក់ទៅក្នុងភាពរលាយសាបសូន្យ រួចទៅហើយ ហើយយើងនឹងធ្វើវា ម្តងទៀតបើចាំបាច់»។

សូមជម្រាបជាថ្មី ទិវាឯករាជ្យជាតិគម្រប់ខួបលើកទី២៥០ គឺជាព្រឹត្តិការណ៍ប្រវត្តិសាស្ត្រដ៏ធំរបស់សហរដ្ឋអាមេរិក ដែលប្រារព្ធឡើង ដើម្បីរំលឹកខួប ២៥០ឆ្នាំ នៃការប្រកាសឯករាជ្យភាពពីចក្រភពអង់គ្លេស ថ្ងៃទី៤ ខែកក្កដា ឆ្នាំ១៧៧៦។

យុទ្ធនាការអបអរសាទរថ្នាក់ជាតិ ដែលហៅថា America250 និងកម្មវិធី Freedom 250 របស់សេតវិមាន បានរៀបចំឡើងយ៉ាង គគ្រឹកគគ្រេង។

ក៏មានការបាញ់កាំជ្រួចទ្រង់ទ្រាយធំ ជាប្រវត្តិសាស្ត្រ ប្រមាណ ៨៥០ ០០០ គ្រាប់ នៅរដ្ឋធានីវ៉ាស៊ីនតោន ផងដែរ។

មិនត្រឹមប៉ុណ្ណឹង ក៏មានក្បួនព្យុហយាត្រាជើងទឹកអន្តរជាតិ (Sail250) ផងដែរ ដោយមានការចូលរួមពីទូកក្តោងបុរាណ ធំៗមកពីជាង ២០ ប្រទេស នៅតាមបណ្តោយទន្លេ Hudson និងកំពង់ផែ New York៕

អត្ថបទ៖ សុវណ្ណ