ព័ត៌មានអន្ដរជាតិ

លុបចោលច្បាប់ចាស់! សិស្សថៃអាចទុកសក់វែង និងផាត់មុខទៅរៀន

បានផុស

១ year មុន

នៅ

ថ្ងៃអង្គារ ១១ មីនា ២០២៥

ដោយ

Chheang

ក្រសួងអប់រំនៃប្រទេសថៃ បានប្រកាសលុបចោលបទប្បញ្ញត្តិដែលអនុវត្តអស់រយៈកាល៥០ឆ្នាំ ដែលតម្រូវឲ្យសិស្សនិស្សិតកាត់សក់ខ្លី ឬមិនត្រូវផាត់មុខ ដោយអនុញ្ញាតឲ្យពួកគេមានសេរីភាពកាន់តែច្រើនក្នុងការបង្ហាញភាពជាខ្លួនឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមច្បាប់ឆ្នាំ១៩៧៥ សិស្សប្រុសតម្រូវឲ្យកាត់សក់ខ្លី និងមិនត្រូវទុកពុកមាត់ ចំណែកឯសិស្សស្រីត្រូវបានកំណត់មិនឲ្យទុកសក់វែងជាងស្លឹកត្រចៀក ឬផាត់មុខទៅសាលារៀន។ ការផ្លាស់ប្តូរនេះធ្វើឡើងបន្ទាប់ពីសេចក្តីសម្រេចរបស់តុលាការរដ្ឋបាលកំពូលដែលបានចាត់ទុកច្បាប់ឆ្នាំ១៩៧៥ថាហួសសម័យ និងជាការរំលោភលើសេរីភាពបុគ្គល។

ចលនាដើម្បីលុបចោលច្បាប់ស្ទីលម៉ូដសក់ដ៏តឹងរឹងទាំងនេះ ទទួលបានសន្ទុះចាប់អារម្មណ៍នៅឆ្នាំ២០២០ នៅពេលដែលសិស្សសាលារដ្ឋចំនួន ២៣នាក់បានដាក់ញត្តិជំទាស់នឹងធម្មនុញ្ញភាពនៃបទប្បញ្ញត្តិ។ ពួកគេបានលើកឡើងថា ច្បាប់បែបនេះធ្វើឲ្យខូចកិត្តិយស និងការបញ្ចេញមតិផ្ទាល់ខ្លួន។ ជាការឆ្លើយតប ក្រសួងអប់រំពីមុនបានបន្ធូរបន្ថយការរឹតបន្តឹងមួយចំនួន ប៉ុន្តែសាលារៀនជាច្រើននៅតែបន្តអនុវត្តគោលការណ៍ណែនាំចាស់ដដែល។

ជាមួយនឹងការសម្រេចចិត្តរបស់តុលាការនាពេលថ្មីៗនេះ សាលារៀននីមួយៗមានស្វ័យភាពក្នុងការកំណត់គោលការណ៍ស្ទីលម៉ូដសក់ផ្ទាល់ខ្លួនរបស់ពួកគេ។ ក្រសួងអប់រំលើកទឹកចិត្តឲ្យសាលារៀនមានការចូលរួមពីសិស្ស មាតាបិតា និងគ្រូបង្រៀន ក្នុងការពិភាក្សាដើម្បីបង្កើតគោលការណ៍ណែនាំដែលគោរពសិទ្ធិ និងសេរីភាពរបស់សិស្ស។ វិធានការនេះ ឆ្លុះបញ្ចាំងពីការទទួលស្គាល់កាន់តែទូលំទូលាយនៃសេរីភាពផ្ទាល់ខ្លួននៅក្នុងប្រព័ន្ធអប់រំរបស់ប្រទេសថៃ៕