គ្រាប់ផ្លោងមីយ៉ាន់ម៉ា ធ្លាក់ចូលសាលារៀនថៃ ធ្វើឲ្យសិស្សផ្អើលឆោឡោ ជម្លៀសជាបន្ទាន់

សិស្សសាលាថៃ នៅក្នុងខេត្តជាប់ព្រំដែនមីយ៉ាន់ម៉ា ត្រូវជម្លៀសជាបន្ទាន់ បន្ទាប់ពីមានសេចក្តីរាយការណ៍ថា គ្រាប់ផ្លោង ហោះមកពីខាងមីយ៉ាន់ម៉ា ធ្លាក់ចូលទីធ្លាសាលារៀនរបស់ពួកគេ ធ្វើឲ្យផ្អើលឆោឡោ។

តាមការផ្សាយរបស់ Amarin TV នៅថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ សិស្សសាលា Ban Mae Kon Ken ក្នុងភូមិ Huai Mahawong នៃឃុំ Mahawan ស្រុក Mae Sot ខេត្ត Tak បានជម្លៀសចេញជាបន្ទាន់ ទៅកាន់កន្លែងសុវត្ថិភាព ដោយសារតែគ្រាប់ធ្លាក់ចូល ប៉ុន្តែមិនផ្ទុះ។

ភ្លាមៗនោះ កងកម្លាំងពិសេស Rajamangala បានបញ្ជូនក្រុមដោះគ្រាប់បែកទៅ ហើយព្រមានដល់ពលរដ្ឋ សូមកុំប៉ះពាល់ រាល់របស់ទាំងឡាយណា ដែលគួរឲ្យសង្ស័យ។

សម្រាប់សិស្សដែលជម្លៀសចេញ មន្ត្រីមូលដ្ឋាន បានរៀបចំកន្លែងសិក្សាបណ្តោះអាសន្ន ដូចជាឲ្យរៀននៅសាលាឆទានក្នុងវត្ត និងតាមសហគមន៍ក្នុងភូមិ។

សូមជម្រាបថា ស្ថានការណ៍សង្គ្រាម នៅតាមបណ្តោយព្រំដែនថៃ-មីយ៉ាន់ម៉ា ចេះតែបន្តឡើងកម្តៅក្តៅទៅៗ ហើយការវាយប្រហារគ្នាដ៏​សាហាវ ​រវាងកងទ័ពរដ្ឋាភិបាលមីយ៉ាន់ម៉ា និងក្រុមកងទ័ពប្រឆាំង តែងតែបណ្តាលឲ្យ គ្រាប់កាំភ្លើង​ផ្លាតចូលទឹកដីថៃ បង្កការភ័យស្លន់ស្លោដល់ប្រជាពលរដ្ឋ ជានិច្ច។

សម្រាប់ស្ថានការណ៍វិវឌ្ឍចុងក្រោយបំផុតនេះ កងទ័ពមីយ៉ាន់ម៉ា បានប្រើប្រាស់ទាំងកាំភ្លើងយន្ត និងម៉ាស៊ីនបាញ់គ្រាប់បែកធុនធ្ងន់ បាញ់ស្រោចទៅលើភូមិឋាន​របស់ក្រុមកងទ័ពប្រឆាំង ដែលស្ថិតនៅជាប់ ព្រំដែនថៃ បណ្តាលឲ្យកងទ័ពទាំងសងខាងរងរបួស និងបាត់បង់ជីវិតជាច្រើននាក់។

យ៉ាងណាមិញ អ្វីដែលគួរ​ឲ្យចាប់អារម្មណ៍នោះ គឺការប្រយុទ្ធគ្នាអស់រយៈពេលជាច្រើនម៉ោង បាន​បណ្ដាលឲ្យមានគ្រាប់កាំភ្លើង​ជាច្រើនគ្រាប់ ហោះផ្លាតរំលងខែ្សបន្ទាត់ព្រំដែន ទៅ​ធ្លាក់ចំ​ផ្ទះសម្បែងរបស់ពលរដ្ឋថៃ នៅក្នុងភូមិ Huay Mahawong ស្រុក Mae Sot ខេត្ត Tak យ៉ាងពេញទំហឹង បណ្តាលឲ្យដំបូល និងកញ្ចក់ផ្ទះរបស់ស្រ្តីម្នាក់បែកខ្ទេចខ្ទី និងធ្វើឲ្យអ្នកភូមិរត់ភៀសខ្លួនទាំងព្រលឹងចុងសក់។

ពលរដ្ឋថៃ ប្រាប់ថា​ ពួកគេត្រៀមខ្លួនរត់ជានិច្ច បើស្ថានការណ៍ធ្ងន់ធ្ងរ ហើយរាល់ថ្ងៃនេះ ពួកគេភ័យខ្លាចណាស់ រស់នៅទាំងភ្នែកនៅកញ្ចឹង.ក រហូត។

មិនត្រឹមប៉ុណ្ណឹង រាល់ពេលមានការវាយប្រហារតាមអាកាស ឬការបាញ់បោះខ្លាំងក្លា ប្រជាពលរដ្ឋមីយ៉ាន់ម៉ារាប់ពាន់នាក់ ក៏តែងតែរត់ភៀសខ្លួនឆ្លងកាត់ទន្លេ Moei ចូលមករកសិទ្ធិជ្រកកោនបណ្តោះអាសន្ន នៅក្នុងដីថៃដែរ៕

អត្ថបទ៖ សុវណ្ណ