ព័ត៌មានអន្ដរជាតិ

ស្លាប់៤ និងរបួស២ ក្នុងអំពើបាញ់ប្រហារក្នុងរដ្ឋ Florida សហរដ្ឋអាមេរិក

បានផុស

១១ ម៉ោង មុន

នៅ

ថ្ងៃសុក្រ ២៨ មីនា ២០២៥

ដោយ

មនុស្ស៤នាក់ រួមមានម្តាយនិងកុមារ៣នាក់ជាសមាជិកគ្រួសារតែមួយត្រូវបានសម្លាប់ និងឪពុកនិងកូនម្នាក់ទៀតរងរបួសនៅក្នុងការបាញ់ប្រហារកាលពីយប់ថ្ងៃពុធនៅឯអគារលំនៅឋានមួយនៅ Pembroke Park ក្នុងតំបន់ Broward County រដ្ឋ Florida រី។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៨ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍នោះ បានឲ្យដឹងថា ប៉ូលិសបានទទួលការហៅទូរស័ព្ទចូល និងប្រាប់ដំណឹងអំពីការបាញ់ប្រហារនេះភ្លាមៗ បន្ទាប់ពីម៉ោង ៧:៣០យប់ ហើយពេលទៅដល់កន្លែងកើតហេតុ ប៉ូលិសបានប្រទះឃើញស្ត្រីម្នាក់ កុមារតូចពីរនាក់ និងកូនច្បងម្នាក់បានស្លាប់នៅក្នុងផ្ទះល្វែងរបស់ជនរងគ្រោះនោះ។ ប៉ូលិសក៏បានរកឃើញបុរសម្នាក់ និងក្មេងស្រីម្នាក់រងរបួសដោយគ្រាប់កាំភ្លើងផងដែរ។

អ្នកដែលរងរបួសរួមមាន Stephen McKenzie អាយុ ៣៤ឆ្នាំ និង Phiinyx Solomon អាយុ៨ឆ្នាំ។ ពួកគេទាំងពីរកំពុងស្ថិតនៅក្នុងស្ថានភាពធ្ងន់ធ្ងរ។ អ្នកស្លាប់រួមមាន Julie Cruz អាយុ៣២ឆ្នាំ Xion Solomon អាយុ១១ ឆ្នាំ និង Nova និង Emery McKenzie អាយុ២ឆ្នាំ។

បើតាមសម្ដីអ្នកជិតខាង Cruz គឺជាម្តាយរបស់កូនទាំងបួន ហើយ McKenzie គឺជាឪពុករបស់ក្មេងអាយុ២ឆ្នាំ។ កូនច្បងទាំងពីរមានឪពុកផ្សេង។ ចំណែកអ្នកជិតខាងម្នាក់ទៀត បាននិយាយថា៖«ខ្ញុំគ្រាន់តែឮសំឡេងបាញ់ចំនួន៨គ្រាប់ពីជាន់ទី៤ ដូច្នេះខ្ញុំបានចេញមកខាងក្រៅ ហើយអ្នកជិតខាងរបស់ខ្ញុំម្នាក់បានប្រាប់ខ្ញុំថា បុរសម្នាក់បានព្យាយាមសម្លាប់គ្រួសាររបស់គាត់ទាំងអស់ បន្ទាប់មកព្យាយាមសម្លាប់ខ្លួន»។

បើតាមប៉ូលិស McKenzie ត្រូវបានគេដាក់នៅក្នុងមន្ទីរឃុំឃាំងនៅមន្ទីរពេទ្យ ខណៈក្រុមអ្នកស៊ើបអង្កេតកំពុងស៊ើបរកមូលហេតុដែលនាំឲ្យមានការបាញ់ប្រហារនេះ៕