ត្រាំ ប្រឈមបាតុកម្មទូទាំងប្រទេសថ្មីទៀត នៅថ្ងៃទី១៩ខែមេសា

ទោះបាតុកម្ម «Hands Off!» បានកន្លងផុត ប៉ុន្តែប្រធានាធិបតីអាមេរិក ដូណាល់ ត្រាំ ត្រូវប្រឈមមុខនឹងការតវ៉ាទូទាំងប្រទេសថ្មីទៀត ដែលគេគ្រោងធ្វើនៅថ្ងៃទី១៩ខែមេសាខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នោះគឺជាបាតុកម្មរៀបចំដោយក្រុម 50501 ដែលជាចលនាមួយ ក៏បានចូលរួមក្នុងការតវ៉ាកាលពីចុងសប្តាហ៍ប្រឆាំងនឹងការដឹកនាំរបស់រដ្ឋបាលលោក ត្រាំ និងទីប្រឹក្សារបស់គាត់គឺលោក Elon Musk ផងដែរ។

តាមការចុះផ្សាយរបស់ Newsweek កាលពីថ្ងៃចន្ទទី៧ខែមេសាឆ្នាំ២០២៥ ក្រុមនេះបង្ហោះតាមប្រព័ន្ធផ្សព្វផ្សាយសង្គមថា ពួកគេចង់ឲ្យប្រជាជនអាមេរិក៣.៥% ស្មើនឹងជាង១១លាននាក់) ចូលរួម ព្រោះ​តួលេខ​នេះ​គឺ​ជា​កម្រិតបង្ហាញពីការ​តស៊ូ​ជា​និរន្ត។

គោលបំណងធំ៤សម្រាប់បាតុកម្មនៅថ្ងៃខាងមុខ គឺដើម្បីប្រឆាំងទៅនឹង៖

១. ការកាត់បន្ថយថវិការបស់សហព័ន្ធ៖ អ្នកតវ៉ាមានក្តីព្រួយបារម្ភអំពីការកាត់បន្ថយមូលនិធិសម្រាប់កម្មវិធីសុខភាព ការអប់រំ និងវប្បធម៌។

២. គោលនយោបាយអន្តោប្រវេសន៍៖ ក្រុមបាតុករ បានសម្តែងការប្រឆាំងចំពោះសកម្មភាពអនុវត្តច្បាប់អន្តោប្រវេសន៍នាពេលថ្មីៗនេះ ដែលគេយល់ថា មានហេតុផលនយោបាយ និងបង្កភាពវឹកវរ។

៣. កង្វល់អំពីសិទ្ធិស៊ីវិល៖ ការដកចេញគោលនយោបាយចម្រុះ និងការគំរាមកំហែងដែលគេយល់ឃើញចំពោះសិទ្ធិរបស់ក្រុមជនជាតិភាគតិច រួមទាំងសហគមន៍អ្នកស្រឡាញ់ភេទដូចគ្នា គឺជាចំណុចស្នូលនៃការតវ៉ា។

៤. គោលនយោបាយសេដ្ឋកិច្ច៖ មានការប្រឆាំងទៅនឹងការដាក់ពន្ធរបស់រដ្ឋបាល ត្រាំ លើដៃគូពាណិជ្ជកម្មពិភពលោក ដែលនាំឲ្យមានអស្ថិរភាពទីផ្សារ។

សូមជម្រាបថា ក្រុម50501 ក៏ធ្លាប់ធ្វើបាតុកម្មទូទាំងប្រទេសក្រោមការដឹកនាំរបស់ខ្លួនផងដែរ ជាពិសេសបាតុកម្មនៅថ្ងៃទី៤ខែកុម្ភៈ។ ពួកគេក៏បានរៀបចំការតវ៉ា «No Kings Day» នៅថ្ងៃទី១៧ខែកុម្ភៈក៏ដូចជាបាតុកម្មលើកទី៣ប្រឆាំងនឹងលោក ត្រាំ នៅថ្ងៃទី៤ខែមីនាផងដែរ៕

អត្ថបទ៖ សុខ សុវណ្ណ

ចុចអាន៖ មនុស្សរាប់លាននាក់ ធ្វើបាតុកម្មប្រឆាំង Donald Trump និង Elon Musk ទូទាំងសហរដ្ឋអាមេរិក