ត្រាំ ថា កិច្ចព្រមព្រៀងសន្តិសុខជាមួយជប៉ុន ដូចធ្ងន់មកខាងអាមេរិកពេកហើយ

ថ្លែងប្រាប់អ្នកសារព័ត៌មាននៅឯកិច្ចប្រជុំគណៈរដ្ឋមន្ត្រីកាលពីថ្ងៃសុក្រទី១១ខែមេសាឆ្នាំ២០២៥, ប្រមុខសេតវិមានលោក ដូណាល់ ត្រាំ បានត្អូញត្អែរចំពោះកិច្ចព្រមព្រៀងសន្តិសុខអាមេរិក-ជប៉ុន ដោយនិយាយថា វាដូចជាធ្ងន់មកខាងទីក្រុងវ៉ាស៊ីនតោនពេកហើយ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express, លោកត្រាំនិយាយថា «បើអាមេរិកត្រូវវាយប្រហារមែន ជប៉ុននឹងមិនអាចជួយអ្វីបានឡើយ ពួកគេមិនអាចការពារយើងបានទេ។ យើងបានជះលុយរាប់ពាន់លានដុល្លារដើម្បីការពារជប៉ុន ប៉ុន្តែពួកគេមិនចំណាយអ្វីសោះ»។

សូមជម្រាបថា លោកត្រាំលើកឡើងបែបនេះ គឺសំដៅទៅសន្និសញ្ញាសន្តិសុខអាមេរិក-ជប៉ុនឆ្នាំ១៩៦០ ដែលផ្តល់សិទ្ធឲ្យអាមេរិក ដាក់មូលដ្ឋានទ័ពលើទឹកដីជប៉ុន ហើយប្តេជ្ញាការពារទីក្រុងតូក្យូ បើប្រទេសណាហ៊ានវាយប្រហារ។ ក្រោមកិច្ចព្រមព្រៀងនេះ អាមេរិកបានដាក់ទាហានជាង ៥០ ០០០នាក់ ក្នុងប្រទេសជប៉ុន ច្រើនជាងប្រទេសណាណាទាំងអស់។

ទោះបីជាយ៉ាងណាក៏ដោយ ភាគីជប៉ុន មិនទាន់ចេញមុខនិយាយអ្វីទេពាក់ព័ន្ធការលើកឡើងរបស់លោក ត្រាំ។

រឿងនេះទៀតសោត កើតឡើង ស្របពេលភាគីទាំងពីរត្រៀមខ្លួនចរចាគ្នាលើកិច្ចព្រមព្រៀងពន្ធ។ ក្នុងចំណោមដៃគូធំៗដែលមានឱនភាពពាណិជ្ជកម្មជាមួយអាមេរិក ជប៉ុនគឺជាប្រទេសទីមួយនៅក្នុងបញ្ជីចរចា ខណៈក្រុងតូក្យូ​កំពុង​ពិចារណា​បញ្ជូន​ក្រុម​ចរចា​ទៅ​ក្រុង​វ៉ាស៊ីនតោន​នៅ​ដើម​សប្តាហ៍​ក្រោយ៕

អត្ថបទ៖ សុខ​ សុវណ្ណ

ចុចអាន៖ ត្រាំ គំរាមដកទ័ព ១០ ០០០នាក់ចេញពី អឺរ៉ុប