ពូទីន ប្រកាស​រៀបចំ​ជំនួប​កំពូល​ពិសេស​រុស្ស៊ី-អារ៉ាប់​នៅចុង​ឆ្នាំ​២០២៥

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាស​កាល​ពី​ថ្ងៃ​អង្គារ​ទី​២២​ខែ​មេសា​ថា រុស្ស៊ីនឹងធ្វើជាម្ចាស់ផ្ទះនៃកិច្ចប្រជុំកំពូលពិសេសរុស្ស៊ី-អារ៉ាប់នៅចុងឆ្នាំ​២០២៥​។

ការប្រកាសនេះ ត្រូវបានធ្វើឡើងក្នុងជំនួបនៅវិមានក្រឹមឡាំងជាមួយស្តេច​ស៊ុលតង់ Haitham bin Tariq Al-Said នៃប្រទេសអូម៉ង់។

លោក ពូទីន បាន​និយាយ​ថា៖ «យើងគ្រោងនឹងធ្វើជាម្ចាស់ផ្ទះនៃកិច្ចប្រជុំកំពូលរវាងរុស្ស៊ី និងបណ្តាប្រទេសអារ៉ាប់នៅចុងឆ្នាំនេះ។ មិត្ត​ជាច្រើន​របស់​យើង​នៅ​ពិភព​អារ៉ាប់ បាន​បង្ហាញ​ការ​គាំទ្រ​ពួកគេ​ចំពោះ​គំនិត​ផ្ដួចផ្ដើម​នេះ»។

​ការ​បង្កើត​កិច្ច​​ប្រជុំ​កំពូល​​នេះ គូសបញ្ជាក់ពីកិច្ចខិតខំប្រឹងប្រែងរបស់រុស្ស៊ីក្នុងការពង្រឹងទំនាក់ទំនងជាមួយ​បណ្ដា​ប្រទេសអារ៉ាប់ និងបង្កើនវត្តមានការទូតរបស់ខ្លួននៅមជ្ឈិមបូព៌ា។ ខណៈពេលដែលព័ត៌មានលម្អិតជាក់លាក់ទាក់ទងនឹងកាលបរិច្ឆេទ ទីតាំង និងរបៀបវារៈនៃកិច្ចប្រជុំកំពូលនេះ មិនត្រូវបានបង្ហាញ​ឲ្យ​ដឹង ព្រឹត្តិការណ៍នេះត្រូវបានគេរំពឹងថានឹងដោះស្រាយបញ្ហាសំខាន់ៗក្នុងតំបន់ និងជំរុញកិច្ចសហប្រតិបត្តិការរវាងរុស្ស៊ី និង​អារ៉ាប់។

សូម​បញ្ជាក់​ថា រដ្ឋ​អារ៉ាប់​កំពុងទទួលបានឥទ្ធិពលការទូតកាន់តែខ្លាំងឡើង ក្នុងនាមជាអ្នកសម្រុះសម្រួលក្នុងកិច្ច​ចរចាដើម្បីដោះស្រាយវិបត្តិដ៏ធ្ងន់ធ្ងរបំផុតរបស់ពិភពលោក ដែលបានឆក់យកជីវិតមនុស្សរាប់ម៉ឺន​នាក់ ដូចជា ជម្លោះនៅអ៊ុយក្រែន និងហ្គាហ្សាជាដើម។

ថ្មីៗនេះ ប្រទេសអូម៉ង់បានរៀបចំកិច្ចពិភាក្សារវាងសហរដ្ឋអាមេរិក និងអ៊ីរ៉ង់ ដែលជាកិច្ចប្រជុំកម្រិតខ្ពស់បំផុតរវាងភាគីទាំងពីរ ចាប់តាំងពីលោក ដូណាល់ ត្រាំ បានបោះបង់ចោលកិច្ចព្រមព្រៀងនុយក្លេអ៊ែរដ៏សំខាន់មួយក្នុងឆ្នាំ​២០១៨ ក្នុងអំឡុងពេលអាណត្តិដំបូងរបស់លោកជាប្រធានាធិបតីអាមេរិក។

ចំណែក​ឯ​រុស្ស៊ី និងអ៊ុយក្រែន បានបើកកិច្ចចរចាដោយប្រយោល ដែលសម្របសម្រួលដោយសហរដ្ឋអាមេរិក និងអារ៉ាប៊ីសាអូឌីត នៅក្នុងរដ្ឋធានីរីយ៉ាដ ប្រទេសអារ៉ាប៊ីសាអូឌីត កាលពីខែមីនា​កន្លង​ទៅ៕

ដោយ៖ ឈាង