ចិន ត្រៀមបញ្ចេញ យន្តហោះផ្ទុកដ្រូនដំបូងគេលើលោក ដ៏អស្ចារ្យ

ប្រទេសចិនកំពុងត្រៀមខ្លួនបញ្ចេញអាវុធពិសេសមួយ ដោយនោះជាយន្តហោះផ្ទុកដ្រូនដំបូងគេលើពិភពលោក ដែលពោរពេញដោយសមត្ថភាពដ៏អស្ចារ្យ។

តាមការចុះផ្សាយរបស់ RT កាលពីថ្ងៃចន្ទទី១៩ខែឧសភាឆ្នាំ២០២៥, យន្តហោះនេះមានឈ្មោះ Jiu Tian មានសមត្ថភាពដឹកដ្រូនបានទម្ងន់សរុប១៦តោន និងហោះបានចម្ងាយ ៧ ០០០គីឡូម៉ែត្រ ជាមួយរយៈកម្ពស់រហូតដល់ទៅ ១៥ ០០០ម៉ែត្រ ពោលគឺខ្ពស់ជាងប្រព័ន្ធការពារដែនអាកាសទូទៅ ទៅទៀត។

វាដើរដោយម៉ាស៊ីនយន្តហោះ មានប្រវែងស្លាបពីចុងម្ខាងទៅចុងម្ខាង២៥ម៉ែត្រ  ផ្ទុកបានទាំងគ្រាប់ទម្ងន់៦តោនទៀត ហើយអាចបញ្ចេញដ្រូនទៅវាយប្រហារចំនួន១០០គ្រឿងក្នុងពេលតែមួយ ​ចេញពីសងខាងនៃតួយន្តហោះបានថែមទៀតផង។

ក្រៅពីបេសកកម្មប្រយុទ្ធ Jiu Tian អាចនឹងប្រើប្រាស់ក្នុងបេសកកម្មព័ស្តុភារបន្ទាន់ ការល្បាតព្រំដែន និងការឆ្លើយតប ស្វែងរកនិងជួយសង្គ្រោះក្នុងករណីកើតមានគ្រោះធម្មជាតិ។ វាក៏ត្រូវបានបំពាក់ជាមួយប្រព័ន្ធអេឡិចត្រូនិកទំនើបៗដូចជាឧបករណ៍ឈ្លបយកការណ៍ និងតាមដាន។

សូមជម្រាបថា Jiu Tian ត្រូវបានរចនាម៉ូដដោយសាជីវកម្មឧស្សាហកម្មអាកាសចរណ៍នៃប្រទេសចិន និងសាងសង់ដោយក្រុមហ៊ុន Xian Chida Aircraft Parts Manufacturing។ហើយបើយោងតាមកងទ័ពរំដោះប្រជាជនចិន, យន្តហោះនេះនឹងត្រូវដាក់ឲ្យសាកល្បងនៅបំណាច់ខែមិថុនាខាងមុខនេះហើយ៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ ចិនរឹតបន្តឹងការនាំចេញដ្រូន​ដែលអាចប្រើប្រាស់បម្រើ​គោលបំណង​យោធា