ព័ត៌មានអន្ដរជាតិ

ឥណ្ឌានឹងបញ្ជាទិញដ្រូនក្នុងស្រុក តម្លៃ២ប៊ីលាន ក្នុងឆ្នាំនេះ

បានផុស

២០ វិនាទី មុន

នៅ

ថ្ងៃព្រហស្បតិ៍ ៤ មិថុនា ២០២៦

ដោយ

ស្ថាប័នឧស្សាហកម្មមួយធ្វើការជាមួយរដ្ឋាភិបាលប្រាប់ភ្នាក់ងារសារព័ត៌មានរ៉យទ័រ នៅថ្ងៃទី០៣ ខែមិថុនា ថា ឥណ្ឌាទំនងជានឹងបញ្ជាទិញដ្រូនសម្រាប់យោធា តម្លៃជាង ២ប៊ីលានដុល្លារពីក្រុមហ៊ុនក្នុងស្រុកនៅឆ្នាំនេះ ដែលជាការទិញដ៏ធំបំផុតរបស់ខ្លួន ខណៈជម្លោះសកលនៅតែបន្តកើតមាន។

លោក Smit Shah ប្រធានស្ថាប័នឧស្សាហកម្មនិយាយថា ផែនការទាំងនោះ កំពុងស្ថិតក្នុងដំណាក់កាលមួយយ៉ាងឆាប់រហ័ស ដោយការដឹកជញ្ជូនរំពឹងថានឹងចំណាយពេលលើសពី១៨ ទៅ ២៤ខែ ព្រោះមានការកើនឡើងនៃតម្លៃពីការបញ្ជាទិញរបស់រដ្ឋាភិបាលថ្មីៗ ក្នុងតម្លៃ ៣១៣លានដុល្លារ សម្រាប់ដ្រូនថ្នាក់យុទ្ធសាស្ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Shah ជាអ្នកធ្វើការខាងផលិតសព្វាវុធរបស់ឥណ្ឌា តំណាងឱ្យក្រុមហ៊ុនជាង៥៥០ និយាយថា៖ « នៅដំណាក់កាលបន្ទាប់ ការទិញដ្រូនជាយុទ្ធសាស្ត្រនៅក្នុងប្រទេសឥណ្ឌាអាចលើសពី ២ប៊ីលានដុល្លារ»។

លោក Shah និយាយថា ការបញ្ជាទិញថ្មីៗអាចធ្វើតាមការបញ្ជាទិញរហ័សដែលធ្វើឡើង ដើម្បីបំពេញតម្រូវការប្រតិបត្តិការបន្ទាន់ ដោយការដឹកជញ្ជូនប្រហែលជាត្រូវការពេល ២៤ខែ។

ជុំវិញបញ្ហានេះ ក្រសួងការពារជាតិឥណ្ឌាមិនបានឆ្លើយតបភ្លាមៗ លើការបញ្ជាទិញទេ។

គួរបញ្ជាក់ថា ប្រទេសឥណ្ឌាមានក្រុមហ៊ុនជាង៦០០ ដែលផលិតដ្រូននិងគ្រឿងបន្លាស់ ក្នុងនោះជាង១០០ក្រុមហ៊ុន ផ្តោតលើកម្មវិធីការពារជាតិ។

រដ្ឋាភិបាលក៏បានពង្រីកគម្រោង នវានុវត្តន៍សម្រាប់ឧត្តមភាពការពារជាតិ (iDEX) ដើម្បីផ្តល់មូលនិធិគំរូដើម អនុញ្ញាតឱ្យក្រុមហ៊ុនតូចៗទទួលបានការបញ្ជាទិញដំបូង និងជួយពង្រីកផលិតកម្មឱ្យបានលឿនជាងមុន។

ក្នុងពេលជាមួយគ្នានេះ ក្រសួងការពារជាតិបានបើកឱ្យមានការផ្គត់ផ្គង់កាន់តែច្រើនដល់ក្រុមហ៊ុនចាប់ផ្តើមអាជីវកម្មខ្នាតតូច និងក្រុមហ៊ុនឯកជន បន្ធូរបន្ថយបទដ្ឋាននៃការធ្វើតេស្ត ជំរុញកងកម្លាំងប្រដាប់អាវុធឱ្យបន្ថែមតាមរយៈការបញ្ជាទិញម្តងហើយម្តងទៀត ធ្វើយ៉ាងណាអាចឱ្យក្រុមហ៊ុនកែលម្អផលិតផលយ៉ាងឆាប់រហ័ស៕

សម្រួល៖ ណឺ មិនា