ចិន និងវៀតណាម បើកដំណើរការ​ផ្លូវរថភ្លើងហាណូយ-ណាននីង​ ចំពេល​​ទេសចរកើន​​​

បន្ទាប់ពីផ្អាក​ដំណើរ​ការ​រយៈពេលប្រាំឆ្នាំ​ដោយសារជំងឺរាតត្បាតកូវីដ១៩​ ប្រទេសចិន និងវៀតណាមបានបើក​ដំណើរការឡើងវិញនូវសេវាកម្មរថភ្លើងដឹកអ្នកដំណើរឆ្លងកាត់​ព្រំដែនដ៏សំខាន់រវាងទីក្រុងហាណូយ និងទីក្រុង​ណាននីង​ ក្រោយ​ឃើញ​កំណើន​ទេស​ចរ​​ហក់​ឡើង​រវាង​ប្រទេសទាំងពីរ​​។

យោងតាមការចេញផ្សាយរបស់កាសែត Bangkok Post នៅថ្ងៃទី២៧ខែ​ឧសភានេះ ការធ្វើដំណើរតាមរថភ្លើងរវាងប្រទេសទាំងពីរដែលចំណាយរយៈពេល១១.៥ ម៉ោងនេះ បានផ្អាកដំណើរការនៅដើមឆ្នាំ ២០២០ ហើយឥឡូវនេះបានចាប់ផ្តើមឡើងវិញហើយកាលពីថ្ងៃអាទិត្យ ក្នុងគោលបំណងជំរុញទេសចរណ៍ និងការតភ្ជាប់ក្នុងតំបន់។

ការបើកដំណើរការឡើងវិញនេះ ស្របតាមកិច្ចខិតខំប្រឹងប្រែងរបស់ប្រទេសចិនក្នុងការធ្វើឱ្យវិស័យទេសចរណ៍របស់ខ្លួនរស់ឡើងវិញ រួមទាំងការពង្រីកការចូល​ទៅកាន់​ប្រទេស​ចិន​ដោយគ្មានទិដ្ឋាការសម្រាប់ពលរដ្ឋមកពីប្រទេសមួយចំនួន។ ឥឡូវនេះ អ្នកដំណើរវៀតណាមអាចចូលប្រទេសចិនដោយគ្មានទិដ្ឋាការតាមរយៈក្រុមទេសចរណ៍ដែលរៀបចំដោយ​ភ្នាក់ងារទេសចរណ៍ចិន​​ដីគោក ដោយប្រទេសចិនបានផ្តល់ការចូលដោយគ្មានទិដ្ឋាការរយៈពេល៣០ថ្ងៃដល់ពលរដ្ឋ​នៃប្រទេសចំនួន ៣៨ រួមទាំងប្រទេសអូស្ត្រាលី សិង្ហបុរី និងបណ្តាប្រទេសអឺរ៉ុបមួយចំនួនទៀត។

ផ្លូវរថភ្លើងហាណូយ-ណាននីង ត្រូវបានគេរំពឹងថា នឹងផ្តល់ផលប្រយោជន៍ដល់ប្រទេសទាំងពីរ ជាមួយនឹងការកើនឡើងនៃភ្ញៀវទេសចរវៀតណាមដែលមកទស្សនាប្រទេសចិន និងទេសចរចិនទៅកាន់ប្រទេសវៀតណាម។ ក្នុងឆ្នាំ ២០២៣ ភ្ញៀវទេសចរចិនទៅកាន់ប្រទេសវៀតណាមមានលើសពី ៣.៧ លាននាក់ ដែលជាការកើនឡើង ១១៤% ធៀបនឹងឆ្នាំ២០២២ ខណៈមានទេសចរចិនជិត ១.៦ លាននាក់បានមកដល់វៀតណាមក្នុងត្រីមាសទីមួយនៃឆ្នាំ ២០២៤។

ផ្លូវរថភ្លើងនេះដំណើរការក្រោមឈ្មោះសេវាកម្ម T8701 ក៏គាំទ្រពាណិជ្ជកម្មផងដែរ ដោយសារប្រទេសទាំងពីរពឹងផ្អែកយ៉ាងខ្លាំងលើផ្លូវដែកសម្រាប់ការនាំចេញ​​ផលិត​ផល​​​​ផលិតកម្ម។ ប្រទេសទាំងពីរមានគោលបំណងលើកកម្ពស់មិនត្រឹមតែការដឹកជញ្ជូនមនុស្សប៉ុណ្ណោះទេ ប៉ុ​ន្តែ​ថែមទាំងការ​ធ្វើពាណិជ្ជកម្មឆ្លងព្រំដែនផងដែរ។

បន្ថែមពីលើនេះ ផ្លូវដែកនេះក៏ត្រូវបានគេរំពឹងថា នឹងផ្តល់អត្ថប្រយោជន៍ដល់អ្នកធ្វើដំណើរតាមបែបបស្ចិមប្រទេសដែលធ្វើដំណើរក្នុងតំបន់អាស៊ីអាគ្នេយ៍ ព្រោះវាផ្តល់ភាពងាយស្រួលជាងមុនក្នុងការចូលទៅកាន់ប្រទេសចិនដោយគ្មានទិដ្ឋាការតាមរយៈប្រទេសវៀតណាម៕

អត្ថបទ៖ ប៊ុន សុភាព