ការ​ធ្លាក់​យន្តហោះ Air India ផ្ទុះ​ការ​ជជែកថាកៅអី11A ជាកៅអីសុវត្ថិភាពបំផុតលើយន្តហោះ

យោងតាមការចេញផ្សាយរបស់សារព័ត៌មាន​ Hindustan Times នៅថ្ងៃទី១៤ខែមិថុនានេះ ការរស់រានមានជីវិតដោយអព្ភូតហេតុរបស់​លោក Vishwash Kumar Ramesh ដែលជាអ្នកនៅរស់រានមានជីវិតតែម្នាក់គត់ពីការធ្លាក់យន្តហោះក្រុមហ៊ុន Air India នៅទីក្រុង Ahmedabad រដ្ឋ Gujarat ប្រទេសឥណ្ឌា បានបង្កឱ្យមានការជជែកដេញដោលជាសកលអំពីកៅអីសុវត្ថិភាពបំផុតនៅលើយន្តហោះ។

មុនពេលធ្លាក់យន្តហោះ លោក Ramesh អង្គុយ​លើ​កៅអី 11A នៅជិតច្រកចេញសង្គ្រោះបន្ទាន់ ហើយបានគេចពីការស្លាប់បន្ទាប់ពីការធ្លាក់ ដែលបានសម្លាប់មនុស្ស២៤១នៅលើយន្តហោះ។ ដោយសារតែហេតុនេះមនុស្សជាច្រើនបាននិយាយថា​កៅអី 11Aគឺជាកៅអីដែលមានសុវត្តិភាពបំផុត។

ទោះយ៉ាងណាអ្នកជំនាញនិយាយថា មនុស្សមិនគួរគិតថាកៅអី 11A តែងតែមានសុវត្ថិភាពបំផុតនៅលើយន្តហោះនោះទេ។ អ្នកជំនាញលើកឡើងថា សុវត្ថិភាពកៅអីអាស្រ័យលើប្រភេទយន្តហោះ កាលៈទេសៈធ្លាក់ និងរបៀបដាក់កៅអី។ ក្នុងករណីនេះ ការនៅជិតច្រកចេញទំនងជាផ្តល់ពេលវេលាដ៏សំខាន់ដល់ Ramesh ដើម្បីរស់ ប៉ុន្តែសុវត្ថិភាពមិនអាចត្រូវបានធានាដោយទីតាំងអង្គុយតែមួយនោះទេ។

ជាមួយគ្នានេះ ការសិក្សាណែនាំថា កៅអីខាងក្រោយអាចផ្តល់ឱកាសកាន់តែប្រសើរ ប៉ុន្តែការរស់រានមានជីវិតជារឿយៗអាស្រ័យលើសកម្មភាពរហ័ស ការដឹងពីនីតិវិធីសុវត្ថិភាព និងធ្វើតាមការណែនាំ។ អ្នកជំនាញបានសង្កត់ធ្ងន់ថា ការយកចិត្តទុកដាក់លើការសង្ខេបអំពីសុវត្ថិភាព ការដឹងពីច្រកចេញដែលនៅជិតបំផុត និងការរក្សាភាពស្ងប់ស្ងាត់អាចធ្វើឱ្យមានប្រយោជន៍ក្នុងគ្រាអាសន្ន៕

អត្ថបទ៖ ប៊ុន សុភាព