៤ថ្ងៃ អ៊ីរ៉ង់ បាញ់មីស៊ីល ៣៧០គ្រាប់ដាក់អ៊ីស្រាអែល វាយប្រហារជោគជ័យលើ ៣០ទីតាំង

តាមការបញ្ជាក់ពីការិយាល័យនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានឲ្យដឹងថា ក្នុងរយៈពេល៤ថ្ងៃ គិតចាប់ពីថ្ងៃផ្ទុះជម្លោះធំនៅថ្ងៃទី១៣ខែមិថុនាមក អ៊ីរ៉ង់ បានបាញ់មីស៊ីលបាលីស្ទិកប្រមាណ៣៧០គ្រាប់ និងបញ្ជូនដ្រូនរាប់រយគ្រឿង មកវាយប្រហារអ៊ីស្រាអែល ដោយក្នុងនោះបាញ់ជោគជ័យបាន៣០កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរយៈពេលដដែលនេះ ពលរដ្ឋអ៊ីស្រាអែលចំនួន២៤នាក់បានបាត់បង់ជីវិតនិង៥៩២នាក់រងរបួស ដោយការវាយប្រហាររបស់អ៊ីរ៉ង់ ក្នុងនោះមាន១០នាក់ ត្រូវរបួសធ្ងន់។

ចំណែកនៅខាងអ៊ីរ៉ង់ឯណោះ បើគិតចាប់តាំងពីថ្ងៃសុក្រមកដូចគ្នា ដែលជាថ្ងៃផ្ទុះអាវុធទ្រង់ទ្រាយធំរវាងសត្រូវទាំងពីរនោះ មានមនុស្សស្លាប់រហូតដល់ទៅ២២៤នាក់។

សូមជម្រាបជាថ្មី អ៊ីស្រាអែល បាន​បើក​ប្រតិបត្តិការ «Rising Lion» វាយ​ប្រហារ​តាម​អាកាស​លើ​ប្រទេស​អ៊ីរ៉ង់ ដោយកំណត់គោលដៅលើកម្មវិធីនុយក្លេអ៊ែររបស់ទីក្រុងតេហេរ៉ង់។ ក្រោយមក សង្គ្រាមក៏បានផ្ទុះឡើងដោយមានការបាញ់តដៃគ្នាទៅវិញទៅមក។

កាលពីថ្ងៃអាទិត្យ អុីរ៉ង់បាញ់មុីសុីលស្រោចដូចគ្រាប់ភ្លៀងពីលើកណ្តាលទីក្រុងអុីស្រាអែល ខណៈការប្រយុទ្ធគ្នាកាន់តែក្តៅគគុករវាងប្រទេសទាំងពីរ បានបង្កើនក្តីព្រួយបារម្ភក្នុងចំណោមថ្នាក់ដឹកនាំពិភពលោកថា ជម្លោះក្នុងតំបន់នឹងរីកកាន់តែធំទៅៗ បើគ្មានដំណោះស្រាយឆាប់រហ័ស៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់ ថា ប៉ាគីស្ថាន ចេញមុខធានាទម្លាក់គ្រាប់បែកនុយក្លេអ៊ែរ លើអ៊ីស្រាអែល ក្នុងលក្ខខណ្ឌមួយ