ព័ត៌មានអន្ដរជាតិ

វិបត្តិមនុស្សធម៌នៅមីយ៉ាន់ម៉ាកំពុងមានសភាពធ្ងន់ធ្ងរ

បានផុស

៣៩ វិនាទី មុន

នៅ

ថ្ងៃពុធ ២៥ មិថុនា ២០២៥

ដោយ

យោងតាមការចេញផ្សាយរបស់សារព័ត៌មាន Mizzima News នៅថ្ងៃទី២៥ខែមិថុនា អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិ (OCHA) ប្រចាំប្រទេសមីយ៉ាន់ម៉ា បានចេញការព្រមានធ្ងន់ៗអំពីវិបត្តិមនុស្សធម៌ដែលមានសភាពកាន់តែអាក្រក់ទៅៗរបស់ប្រទេសនេះ។

លោក Marcoluigi Corsi អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិ (OCHA)ប្រចាំប្រទេសមីយ៉ាន់ម៉ា (រូបភាព៖ Facebook)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍របស់ លោក Marcoluigi Corsi អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិ (OCHA) ប្រចាំប្រទេសមីយ៉ាន់ម៉ា បានសង្គត់ធ្ងន់ថា ដោយសារសេដ្ឋកិច្ចដួលរលំប្រជាជនមីយ៉ាន៉ម៉ាជិត ២០លាននាក់នៅទូទាំងប្រទេសត្រូវការជំនួយមនុស្សធម៌ ដែលជាចំនួនកើនឡើង បន្ទាប់ពីការរញ្ជួយដីដ៏ខ្លាំងមួយក្នុងខែមីនា។ គ្រោះមហន្តរាយនេះបានបំផ្លាញផ្ទះសម្បែង មន្ទីរពេទ្យ និងសាលារៀន ដោយបន្ថែមមនុស្ស ២លាននាក់បន្ថែមទៀតត្រូវការជំនួយបន្ទាន់។

លោកបានសរសើរការខិតខំប្រឹងប្រែងរបស់បុគ្គលិកជំនួយក្នុងស្រុក និងអន្តរជាតិ ប៉ុន្តែបានព្រមានថា បើគ្មានមូលនិធិត្រឹមត្រូវទេ មនុស្សរាប់លាននាក់នឹងគ្មានអាហារ ទីជម្រក និងការថែទាំសុខភាព។ លើសពីនេះការវាយប្រហារគ្នារវាងយោធានិងក្រុមប្រដាប់អាវុធនៅតែបន្តនៅក្នុងរដ្ឋជាច្រើនដែលបញ្ហាទាំអនេះកាន់តែបង្កើនហានិភ័យដល់ប្រជាជនមីយ៉ាន់ម៉ា។

ស្ត្រីម្នាក់ចូលទៅជម្រកបណ្ដោះអាសន្ននៅក្នុងទីក្រុង Mandalay បន្ទាប់ពីគ្រោះរញ្ជួយដី។ (រូបភាព៖ OCHA )

នៅឆ្នាំ២០២៥នេះមានតែ ៣៦% នៃទឹកប្រាក់ ២៧៥លានដុល្លារដែលត្រូវការសម្រាប់ការឆ្លើយតបគ្រោះរញ្ជួយដីប៉ុណ្ណោះដែលមីយ៉ាន់ម៉ាទទួលបាន ហើយមានតែ ១២% ប៉ុណ្ណោះដែលទទួលបានពីផែនការជំនួយចំនួន ១.១ ពាន់លានដុល្លារ។ អ្នកសម្របសម្រួលរូបនេះបានអំពាវនាវឱ្យមានសកម្មភាពអន្តរជាតិជាបន្ទាន់ និងការចូលប្រើប្រាស់មនុស្សធម៌ដែលមិនមានការរឹតបន្តឹង ដោយរិះគន់ការពន្យារពេល និងការរាំងស្ទះដែលរារាំងជំនួយមិនឱ្យទៅដល់អ្នកដែលត្រូវការបំផុត។

លោកបានជំរុញឱ្យភាគីទាំងអស់ក្នុងជម្លោះគោរពច្បាប់មនុស្សធម៌អន្តរជាតិ ការពារជនស៊ីវិល និងបញ្ឈប់ការកំណត់គោលដៅលើប្រជាជនស្លូតត្រង់។ ស្របពេលដែលប្រទេសមីយ៉ាន់ម៉ាចូលដល់រដូវខ្យល់មូសុង លោកបានព្រមានថាពេលវេលាជិតអស់ហើយ ដើម្បីការពារគ្រោះមហន្តរាយបន្ថែមទៀត៕