បាក់ស្រុត​​អណ្ដូងរ៉ែមាសសម្លាប់មនុស្ស​១១​នាក់ស្លាប់ក្នុងប្រទេសស៊ូដង់

ហេតុការណ៍បាក់អណ្តូងរ៉ែមាសនៅភាគឦសានប្រទេសស៊ូដង់ បានសម្លាប់កម្មករអណ្តូងរ៉ែ ១១ នាក់ និង ៧ នាក់ផ្សេងទៀតរងរបួស នេះបើយោងតាមក្រុមហ៊ុនធនធានរ៉ែស៊ូដង់ Sudanese Mineral Resources Company (SMRC)។

យោងតាមការចេញផ្សាយរបស់សារព័ត៌មាន​ Al Jazeera ឧបទ្ទវហេតុនេះបានកើតឡើងនៅអណ្តូងរ៉ែ Kirsh al-Fil ក្នុងរដ្ឋ Red Sea ជាកន្លែងដែលធ្លាប់មានការផ្អាកការជីកយករ៉ែពីមុនមក ដោយសារការព្រួយបារម្ភអំពីសុវត្ថិភាព។

ការបាក់រលំនេះក៏បាន​កើតឡើងក្នុងពេលដែលសង្រ្គាមស៊ីវិលរបស់ប្រទេសស៊ូដង់រវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័ស (RSF) បន្តចូលដល់ឆ្នាំទី ៣ ខណៈភាគីទាំងពីរពឹងផ្អែកយ៉ាងខ្លាំងលើប្រាក់ចំណេញពីឧស្សាហកម្មមាសរបស់ស៊ូដង់ ដើម្បីផ្គត់ផ្គង់ការប្រយុទ្ធរបស់ពួកគេ។

គួរបញ្ជាក់ថាអណ្តូងរ៉ែ ដែលខ្វះវិធានការសុវត្ថិភាព មានចំនួនភាគច្រើននៃទិន្នផលមាសរបស់ប្រទេសស៊ូដង់។ ឧប្បត្តិហេតុស្លាប់ស្រដៀងគ្នានេះក៏បានកើតឡើងនៅឆ្នាំ ២០២១ និង ២០២៣ ផងដែរ។ ទោះបីជាមានសង្រ្គាមក៏ដោយ ក៏រដ្ឋាភិបាលរបស់ប្រទេសនេះបានរាយការណ៍ថា មានផលិតកម្មមាសចំនួន ៦៤ តោនក្នុងឆ្នាំ ២០២៤។

ជម្លោះនៅក្នុងប្រទេសស៊ូដង់នេះ បានជម្លៀសមនុស្សជាង ១៣ លាននាក់ និងបាននាំឲ្យមនុស្ស២៥ លាននាក់រងគ្រោះអត់ឃ្លាន ដែលបង្កើតបានជាវិបត្តិមនុស្សធម៌ដ៏អាក្រក់បំផុតមួយរបស់ពិភពលោក៕

អត្ថបទ៖ ប៊ុន សុភាព