ព័ត៌មានអន្ដរជាតិ

ខ្មាន់កាំភ្លើងសម្លាប់ពលរដ្ឋស៊ូដង់ជាង៧០នាក់ ក្នុងជម្លោះរ៉ែមាស

បានផុស

៣ ខែ មុន

នៅ

ថ្ងៃអង្គារ ៣១ មីនា ២០២៦

ដោយ

អាជ្ញាធរស៊ូដង់ បានឱ្យដឹងកាលពីថ្ងៃចន្ទថា ខ្មាន់កាំភ្លើងបានសម្លាប់មនុស្សជាង ៧០នាក់នៅក្នុងប្រទេសស៊ូដង់ភាគខាងត្បូង ដោយសារតែជម្លោះរ៉ែមាសនៅជាយក្រុងកាលពីចុងសប្តាហ៍។

យោងតាមភ្នាក់ងារ AP ផ្សាយថ្ងៃទី៣០ ខែមីនា ឆ្នាំ២០២៦ វីដេអូនៃសាកសពរាប់សិបនាក់ដេកលើដីត្រូវបានចែករំលែកតាមប្រព័ន្ធអ៊ីនធឺណិត ហើយអ្នកកាសែតក្នុងស្រុកម្នាក់ បាននិយាយថា ជនរងគ្រោះជាច្រើនទៀតរត់គេចខ្លួនចូលក្នុងព្រៃ។

ពលរដ្ឋស៊ូដង់កំពុងរករ៉ែមាស។ រូបភាព៖ Al Jazeera

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងរ៉ែមាសនៅទីក្រុង Jebel Iraq ក្នុងរដ្ឋ Central Equatoria ប្រទេសស៊ូដង់កាលពីអតីតកាល គឺជាទីតាំងនៃការប៉ះទង្គិចគ្នាដោយហិង្សាពាក់ព័ន្ធនឹងអ្នករុករករ៉ែខុសច្បាប់។ ការជីកយករ៉ែមាសនៅស៊ូដង់ខាងត្បូងភាគច្រើនមិនមានការគ្រប់គ្រងដោយរដ្ឋាភិបាលទេ តែពលរដ្ឋជីករកដោយផ្ទាល់ដែលអនុញ្ញាតអាជ្ញាធរជាតិ។

យ៉ាងណាអ្នកនាំពាក្យអាជ្ញាធរមូលដ្ឋាន លោក Kwacijwok Dominic Amondoc និយាយថាខ្លួននឹងចែករំលែកព័ត៌មានបន្ថែមពីការវាយប្រហារនេះពេលទទួលព័ត៌មានលម្អិត។

លោកបន្តថា៖ « អ្វីដែលខ្ញុំដឹងគឺថាខ្មាន់កាំភ្លើងមិនស្គាល់អត្តសញ្ញាណបានវាយប្រហារទីក្រុង Jebel Iraq នៅអណ្តូងរ៉ែមាស ហើយមានមនុស្សស្លាប់ជាង ៧០នាក់ និងរបួសជាច្រើននាក់ទៀត»។

សេចក្តីថ្លែងការណ៍មួយពីក្រុមប្រឆាំងលើកឡើងថា៖ « ទីក្រុង Jebel Iraq ស្ថិតនៅក្នុងតំបន់មួយដែលស្ថិតនៅក្រោមការគ្រប់គ្រងផ្តាច់មុខទាំងស្រុងរបស់កងកម្លាំងរដ្ឋាភិបាលឬ SSPDF ។ ជាលទ្ធផល ការទទួលខុសត្រូវពេញលេញចំពោះការសម្លាប់រង្គាលនេះស្ថិតនៅលើកងកម្លាំង SSPDF ដែលគ្រប់គ្រងតំបន់នោះ»។

ចំណែកក្រុមសិទ្ធិមនុស្សក្នុងស្រុកមួយថ្កោលទោសការវាយប្រហារ ព្រមទាំងនិយាយក្នុងសេចក្តីថ្លែងការណ៍មួយថា៖ «ទង្វើដ៏គួរឱ្យរន្ធត់នេះតំណាងឱ្យការរំលោភបំពានយ៉ាងធ្ងន់ធ្ងរលើសិទ្ធិជាមូលដ្ឋាននៃការរស់រានមានជីវិត បង្ហាញពីភាពងាយរងគ្រោះជាបន្តបន្ទាប់របស់ជនស៊ីវិលក្នុងតំបន់និងអសន្តិសុខ ជាពិសេសការកេងប្រវ័ញ្ចធនធានដែលមិនមានការគ្រប់គ្រង»៕

ប្រែសម្រួល៖ ណឺ មិនា

Related Topics:ប្រទេសស៊ូដង់ខាងត្បូង រ៉ែមាស