ទន្ទឹម​បទឈប់បាញ់ថ្មី​នៅហ្គាហ្សារំពឹង​​​សម្រេចក្នុងសប្តាហ៍នេះ ការ​វាយ​​ប្រហារ​របស់​អ៊ីស្រាអែល​កាន់តែ​សាហាវ​​

យ៉ាងហោចណាស់​ប្រជាជន​​ប៉ាឡេស្ទីន​​ ៨២នាក់​បន្ថែមទៀត​នៅ​តំបន់ហ្គាហ្សា ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែល​​នៅ​ថ្ងៃអាទិត្យ ខណៈលោកត្រាំ អះអាងថា កិច្ចព្រមព្រៀងបទឈប់បាញ់នឹង​សម្រេច​​បាន​នៅ​​ក្នុងសប្ដាហ៍នេះ។ នេះបើយោងតាមការចេញផ្សាយរបស់សារព័ត៌មាន​ AP នៅថ្ងៃទី០៧ខែកក្កដានេះ។

ការវាយប្រហាររបស់អ៊ីស្រាអែលទាំងនេះក៏បានកំណត់គោលដៅលើកន្លែងចែកចាយជំនួយ​មនុស្សធម៌​ផងដែរ ដោយបានសម្លាប់មនុស្សនៅទីតាំង៩កន្លែងជិតមូលនិធិមនុស្សធម៌ហ្គាហ្សាដែលគាំទ្រដោយសហរដ្ឋអាមេរិក និងអ៊ីស្រាអែល (GHF)។

ក្រសួងសុខាភិបាលប៉ាឡេស្ទីន បាន​អះអាងថា មនុស្សជាង៧៤០នាក់បានស្លាប់នៅក្នុងការវាយប្រហារស្រដៀងគ្នានេះចាប់​តាំងពីខែឧសភាមក។ វិបត្តិ​មនុស្សធម៌​នៅ​ហ្គាហ្សា​បន្ត​កាន់​តែ​អាក្រក់​​ទៅៗ​ ដោយ​បុគ្គលិក​ជំនួយ និង​ជន​ស៊ីវិល​កាន់​តែ​​ជាប់​ក្នុង​ការ​បាញ់​ប្រហារ ខណៈ GHF ប្រឈមមុខនឹងការរិះគន់កាន់តែខ្លាំងឡើង ចំពេលមានរបាយការណ៍អំពីអំពើហិង្សានៅកន្លែងផ្តល់ជំនួយរបស់ខ្លួន។

ទន្ទឹមនឹងនោះ ការចរចាដោយប្រយោលរវាងអ៊ីស្រាអែល និងក្រុមសកម្ម​ប្រយុទ្ធ​ហាម៉ាសកំពុងដំណើរការនៅក្នុងប្រទេស​កាតា។​ ប្រធានាធិបតីអាមេរិក លោក ដូណាល់ ត្រាំ បាននិយាយថា កិច្ចព្រមព្រៀងបទឈប់បាញ់ និងចំណាប់ខ្មាំងនេះអាច​ឈានដល់ក្នុងសប្តាហ៍នេះ។ លោក ដូណាល់ត្រាំ ក៏នឹងជួបជាមួយនាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) នៅសេតវិមាននៅថ្ងៃចន្ទផងដែរ។

ទោះបីក្រុមហាម៉ាស់បានឆ្លើយតប «វិជ្ជមាន» ចំពោះសំណើ​បទ​ឈប់​បាញ់​ដែលគាំទ្រដោយសហរដ្ឋអាមេរិក អ្នកវិភាគនៅតែ​មានការសង្ស័យចំពោះចេតនារបស់លោក ណេតាន់យ៉ាហ៊ូ។ មនុស្សមួយចំនួនជឿថា លោកចង់រក្សាសង្រ្គាមដើម្បី​ជួយ​ខ្លួនលោកឱ្យកាន់អំណាចនិងជៀសវាងការដាក់ទណ្ឌកម្មចំពោះអំពើពុករលួយ ខណៈដែលលោកកំពុងប្រឈមមុខនឹងការកាត់ទោសនិងការរិះគន់នៅក្នុងប្រទេសខ្លួន៕

អត្ថបទ៖ ប៊ុន សុភាព