ព័ត៌មានអន្ដរជាតិ

អ៊ីរ៉ង់ប្រាប់ថា ខ្លួនសល់គ្រាប់ច្រើនទៀត ហើយអាចផ្លោងដាក់អាមេរិក និងអ៊ីស្រាអែលបាន២ឆ្នាំពេញ

បានផុស

១២ ខែ មុន

នៅ

ថ្ងៃពុធ ៩ កក្កដា ២០២៥

ដោយ

Chheang

យោងតាមការចុះផ្សាយរបស់ Fox News កាលពីថ្ងៃទី៨ខែកក្កដាឆ្នាំ២០២៥ អ៊ីរ៉ង់បានអះអាងថា ខ្លួននៅមានមីស៊ីល និងប្រព័ន្ធសព្វាវុធគ្រប់គ្រាន់ ដើម្បីទ្រទ្រង់ការវាយប្រហារប្រចាំថ្ងៃលើសហរដ្ឋអាមេរិក និងអ៊ីស្រាអែល រយៈពេលពីរឆ្នាំពេញ ប្រសិនបើជម្លោះយោធាផ្ទុះឡើង។

សមយុទ្ធបាញ់មីស៊ីលរបស់អ៊ីរ៉ង់ឆ្នាំ២០១៥ (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧត្តមសេនីយទោ Ebrahim Jabbari ទីប្រឹក្សាឆ្មាំបដិវត្តន៍អ៊ីរ៉ង់ (IRGC) បានប្រាប់ទីភ្នាក់ងារសារព័ត៌មានរដ្ឋ Mehr ថា «ទោះបីយើងបាញ់មីស៊ីលជារៀងរាល់ថ្ងៃក្នុងរយៈពេល២ឆ្នាំក៏ដោយ ឃ្លាំងស្តុក និងមូលដ្ឋានរបស់យើងនឹងមិនអស់ទេ»។

បន្ថែមពីលើនេះ ឧត្តមសេនីយ៍ទោ Yahya Rahim Safavi ទីប្រឹក្សាជាន់ខ្ពស់របស់មេដឹកនាំកំពូល Ayatollah Khamenei បានបញ្ជាក់ថា អ៊ីរ៉ង់ផលិតបានមីស៊ីល និងយន្តហោះគ្មានមនុស្សបើករាប់ពាន់គ្រឿងឯណោះ ហើយឃ្លាំងអាវុធទាំងនោះមានសុវត្ថិភាពណាស់។ លោកបានបន្ថែមថា អ៊ីរ៉ង់មិនទាន់បានប្រើប្រាស់កម្លាំងពេញលេញនៃកងទ័ពជើងទឹក កងកម្លាំង Quds ឬកងទ័ពផ្សេងទៀតរបស់ខ្លួននៅឡើយទេ។

ពាក់ព័ន្ធនឹងការព្រមានរបស់អ៊ីរ៉ង់ ក្រុមអ្នកវិភាគចារកម្មបង្ហាញថា ការអះអាងនេះអាចគ្រាន់តែជាការបិទបាំងការខាតបង់ដ៏ធ្ងន់ធ្ងរ បន្ទាប់ពីសង្គ្រាមរយៈពេល១២ថ្ងៃជាមួយអ៊ីស្រាអែលកាលពីខែមិថុនា។

បើយោងតាមប្រភពបើកចំហ មុនជម្លោះ ឃ្លាំងអាវុធអ៊ីរ៉ង់ មានមីស៊ីលប្រហែល ៣ ០០០គ្រាប់ និងប្រព័ន្ធផ្លោងគ្រាប់ប្រមាណ ៥០០ ទៅ ៦០០គ្រឿង។ យ៉ាងណាមិញ ក្រោយការវាយប្រហារជាបន្តបន្ទាប់ដោយអ៊ីស្រាអែលលើឃ្លាំងផ្ទុកយោធា និងកន្លែងផលិតអាវុធ បូករួមទាំងការវាយប្រហាររបស់សហរដ្ឋអាមេរិកលើទីតាំងនុយក្លេអ៊ែរ ក៏ដូចជាការប្រើប្រាស់គ្រាប់ផ្លោងវាយបកវិញ គេជឿថា អ៊ីរ៉ង់នៅសល់គ្រាប់មីស៊ីលចន្លោះពី ១ ០០០ ទៅ ១ ៥០០គ្រាប់ និងប្រព័ន្ធផ្លោងគ្រាប់ត្រឹមតែ ១៥០ ទៅ ២០០គ្រឿងប៉ុណ្ណោះ៕

ដោយ៖ ឈាង