មេទ័ពអាល្លឺម៉ង់ ប្រាប់ល្បិចទៅអ៊ុយក្រែន ដើម្បីវាយរុស្ស៊ី

មេទ័ពអាល្លឺម៉ង់ Christian Freuding បានប្រាប់ល្បិចទៅអ៊ុយក្រែន ដើម្បីវាយរុស្ស៊ី ហើយនោះគឺថា ទីក្រុងកៀវត្រូវតែវាយកម្ទេចវាលយន្តហោះនិងឃ្លាំងអាវុធចូលជ្រៅក្នុងទឹកដីរុស្ស៊ី ដើម្បីដាក់សម្ពាធលើទ័ពនៅជួរមុខ ហើយយុទ្ធសាស្រ្តនេះនឹងធ្វើឲ្យកងកម្លាំងរបស់លោក វ្ល៉ាឌីមៀរ ពូទីន ចុះខ្សោយ បាក់ស្បាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់កម្មវិធី Bundeswehr កាលពីចុងសប្តាហ៍ មេទ័ពដែលទទួលបន្ទុកផ្នែកជំនួយយោធាអ៊ុយក្រែនរូបនេះ បានឲ្យដឹងថា យុទ្ធសាស្រ្តនេះក៏អាចជះឥទ្ធិពលដោយប្រយោលទៅលើសក្តានុពលវាយលុករបស់កងកម្លាំងរុស្ស៊ី មុនពេលពួកវាត្រូវដាក់ពង្រាយផងដែរ។ សង្រ្គាមអាកាសរយៈចម្ងាយឆ្ងាយដើម្បីវាយប្រហារយន្តហោះនិងអាកាសយានដ្ឋាន មុនពេលពួកវាត្រូវបានប្រើប្រាស់ គឺជាវិធីសាស្រ្តដ៏ល្អ។ មិនត្រឹមប៉ុណ្ណឹង ក៏ត្រូវតែកំណត់គោលដៅលើរោងចក្រផលិតអាវុធដែរ។

លើសពីនេះ លោក Freuding ទទួលស្គាល់ថា រុស្ស៊ីបានបង្កើនការផលិតដ្រូន មីស៊ីលគ្រូសនិងប្រព័ន្ធមីស៊ីលបាលីស្ទិកយ៉ាងលឿន។ ដូចនេះ យើងត្រូវតែពិចារណាជាថ្មីថាតើ វិធានការដាក់ទណ្ឌកម្មសេដ្ឋកិច្ច គ្រប់គ្រាន់ហើយឬនៅដើម្បីដាក់សម្ពាធបន្ថែមទៀត ជាពិសេសដើម្បីកំណត់សមត្ថភាពផលិតរបស់រុស្ស៊ី។

សម្តីរបស់លោក Freuding កើតឡើងមួយថ្ងៃបន្ទាប់ពីអ៊ុយក្រែន បើកការវាយប្រហារដោយដ្រូនទ្រង់ទ្រាយធំ លើទីក្រុងមូស្គូនៃប្រទេសរុស្ស៊ី ខណៈអាកាសយានដ្ឋាន Domodedovo, Vnukovo, Sheremetyevo និង Zhukovsky របស់ទីក្រុងមូស្គូត្រូវបង្ខំចិត្តបិទជាបណ្តោះអាសន្ន។

តាមការចុះផ្សាយរបស់ RT, ដ្រូនអ៊ុយក្រែនរាប់សិបគ្រឿងបានវាយប្រហាររដ្ឋធានីមូស្គូនិងតំបន់ជុំវិញ នាវេលាម៉ោង២រំលងអធ្រាត្រ ប៉ុន្តែបើយោងតាមអភិបាលក្រុងលោក Sergey Sobyanin បានឲ្យដឹងថា មិនមានការខូចខាតធំដំខ្លាំងណាស់ណាឬបណ្តាលឲ្យមានជនរងគ្រោះទេ។

យ៉ាងណា បើតាមរ​បាយការណ៍របស់សេវាគ្រាអាសន្នរុស្ស៊ី, មានអគារកម្ពស់ខ្ពស់មួយក្នុងតំបន់ Zelenograd ត្រូវរងការខូចខាត ខណៈរថយន្ត២គ្រឿងនៅលើផ្លូវត្រូវឆេះដោយសារតែបំណែកដ្រូន ធ្លាក់ចំ៕

អត្ថបទ៖ សុខ សុវណ្ណ

ចុចអាន៖ អាល្លឺម៉ង់ ប្រកាស​ផ្ដល់​ជាង​២ពាន់​លាន​ដុល្លារ​ឲ្យ​អ៊ុយក្រែន ពង្រឹង​ខែល​អាកាស