ពិភពលោកសាទរចំពោះបទឈប់បាញ់កម្ពុជា-ថៃ

បទឈប់បាញ់កម្ពុជា-ថៃបានចូលជាធរមានហើយកាលពីពាក់កណ្តាលអាធ្រាត្រថ្ងៃទី២៨ឈានចូលថ្ងៃទី២៩ខែកក្កដា។

បទឈប់បាញ់នេះបង្កឲ្យមានការសាទរពីសំណាក់ប្រជាជនកម្ពុជាទូទាំងប្រទេសដែលសបញ្ជាក់ឲ្យឃើញយ៉ាងច្បាស់ថា កម្ពុជាមិនមែនជាអ្នកឈ្លានពានឡើយ ប្រជាជនកម្ពុជាស្រឡាញ់សន្តិភាព ស្អប់សង្គ្រាម។

បទឈប់បាញ់នេះទៀតសោត ក៏ទទួលបានសាទរពីអន្តរជាតិផងដែរ ដោយបណ្តាមេដឹកនាំលើពិភពលោកបានអបអរជាបន្តបន្ទាប់៖

អាស៊ាន

នេះគឺជាជ័យជម្នះ​ខាង​ការទូត​សម្រាប់​កិច្ច​ប្រឹងប្រែង​សន្តិភាព​ក្នុង​តំបន់ ខណៈអគ្គលេខាធិការអាស៊ាននិយាយថា បទឈប់បាញ់គឺជាសក្ខីភាពមួយចំពោះឯកភាពក្នុងតំបន់ក្នុងការដោះស្រាយជម្លោះតាមរយៈកិច្ចសន្ទនាដោយសន្តិវិធី។

សហរដ្ឋអាមេរិក

ក្រសួងការបរទេសអាមេរិកបានស្វាគមន៍បទឈប់បាញ់នេះ ដោយហៅវាថាជា ជំហានដ៏សំខាន់ឆ្ពោះទៅរកស្ថិរភាពក្នុងតំបន់។​ ទន្ទឹមនោះ លោកប្រធានាធិបតី ដូណាល់ ត្រាំ និយាយថា «​យើង​បាន​សង្គ្រោះ​ជីវិត​មនុស្ស​រាប់ពាន់នាក់ សន្តិភាព​នេះ​គឺ​ដោយសារ​សម្ពាធ​ដ៏​តឹងរ៉ឹង និង​ការចរចា​ដ៏​អស្ចារ្យ​»​។

ចិន

ទីក្រុងប៉េកាំងបានសរសើរការអត់ធ្មត់ដែលបង្ហាញដោយប្រទេសទាំងពីរ ហើយហៅបទឈប់បាញ់ថាជា «ចំណុចរបត់វិជ្ជមានសម្រាប់អាស៊ីអាគ្នេយ៍» ខណៈក្រសួងការបរទេសចិនបានលើកទឹកចិត្តភាគីទាំងពីរឲ្យបន្តដោះស្រាយបញ្ហាតាមរយៈកិច្ចសន្ទនា។

រុស្សី

រុស្ស៊ី បានចេញសេចក្តីថ្លែងការណ៍សរសើរបទឈប់បាញ់នេះ និងព្រមានប្រឆាំងការជ្រៀតជ្រែកពីបរទេស ហើយជំរុញឲ្យភាគីទាំងពីរប្រកាន់ខ្ជាប់នូវ «បទដ្ឋានអន្តរជាតិ និងអធិបតេយ្យភាព»។

ចក្រភពអង់គ្លេស

ក្រសួង​ការ​បរទេស​អង់គ្លេស​​និយាយ​ថា ខ្លួន​ស្វាគមន៍​​ចំពោះ​បទ​ឈប់​បាញ់​នេះ ហើយ​សូម​អរគុណដល់​ម៉ាឡេស៊ី​សម្រាប់​ការ​សម្រុះសម្រួល​។

បារាំង

ប្រធានាធិបតីបារាំង​ លោក​ អាម៉ានុយអែល ម៉ាក្រុង បាន​​បង្ហោះ​តាមរយៈគណនី Instagram ថា «ពេលវេលាបានមកដល់ហើយ ដែលកាំភ្លើងត្រូវ​តែ​នៅឲ្យ​ស្ងៀមនៅតាមបណ្តោយព្រំដែនកម្ពុជា-ថៃ»។

សហភាពអឺរ៉ុប

តំណាងជាន់ខ្ពស់នៃសហភាពអឺរ៉ុបសម្រាប់កិច្ចការបរទេសនិងគោលនយោបាយសន្តិសុខ និងជាអនុប្រធានគណៈកម្មការអឺរ៉ុប លោកស្រី Kaja Kallas​ និយាយថា «កិច្ចព្រមព្រៀងបទឈប់បាញ់ កម្ពុជា- ថៃ គឺជាការទម្លាយភាពទាល់ច្រកដ៏សំខាន់មួយ បន្ទាប់ពីមានការប៉ះទង្គិចគ្នាយ៉ាងធ្ងន់ធ្ងរជាច្រើនថ្ងៃ។ ពិតជាមានសារៈសំខាន់ណាស់ដែលប្រទេសទាំងពីរអនុវត្តបទឈប់បាញ់ដោយស្មោះត្រង់។ ខ្ញុំសូមអរគុណប្រទេសម៉ាឡេស៊ីក្នុងនាមជាប្រធានអាស៊ាន ដែលបានជួយសម្រួលដល់ដំណើរការចរចានេះ»៕

អត្ថបទ៖ សុខ សុវណ្ណ

ចុចអាន៖ ប្រធានាធិបតីបារាំង​ចូលរួម​អប​អរ​​​​​កម្ពុជា​និង​​ថៃ​សម្រេច​បាន​បទ​ឈប់បាញ់​