បុរសម្នាក់ចោទវ៉ាក់សាំងកូវីដ-១៩ ធ្វើឱ្យខ្លួនបាក់ទឹកចិត្ត បានបើកការបាញ់ប្រហារដ៏សាហាវក្នុងរដ្ឋ Georgia សហរដ្ឋអាមេរិក

បុរសម្នាក់ដែលជឿថាវ៉ាក់សាំងកូវីដ-១៩ ធ្វើឱ្យគាត់បាក់ទឹកចិត្ត និងចង់ធ្វើអត្តឃាតបានបើកការបាញ់ប្រហារដ៏សាហាវនៅខាងក្រៅ មជ្ឈមណ្ឌលគ្រប់គ្រង និងបង្ការជំងឺអាមេរិក(CDC) នៅទីក្រុង Atlanta រដ្ឋ Georgia កាលពីថ្ងៃសុក្រ សម្លាប់មន្ត្រីប៉ូលិសម្នាក់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១១ខែសីហារ។

អ្នកបាញ់ប្រហារឈ្មោះ Patrick Joseph White អាយុ ៣០ ឆ្នាំបានព្យាយាមចូលទៅក្នុង CDC ប៉ុន្តែត្រូវបានរារាំងដោយសន្តិសុខ។ បន្ទាប់មកគាត់បានទៅឱសថស្ថាននៅតាមផ្លូវ ហើយចាប់ផ្តើមបាញ់ប្រហារជាង១៨០គ្រាប់និង បំបែក​បង្អួចរបស់CDCអស់១៥០។ ប៉ូលិសម្នាក់ឈ្មោះ David Rose អាយុ ៣៣ ឆ្នាំត្រូវបានសម្លាប់នៅពេលព្យាយាមរារាំងWhite ។ ក្រោយមក White ត្រូវបានគេរកឃើញថាស្លាប់នៅក្នុងអគារក្បែរនោះ ប៉ុន្តែមិនទាន់ដឹងច្បាស់ថាគាត់បាញ់ខ្លួនឯង ឬត្រូវបានសម្លាប់ដោយប៉ូលិសនោះទេ។

បើតាមឪពុក និងអ្នកជិតខាងរបស់ White បាននិយាយថា គាត់ឈ្លក់វង្វេងនឹងគំនិតដែលថា វ៉ាក់សាំងមានគ្រោះថ្នាក់ និងមានការខកចិត្តចំពោះការស្លាប់របស់ឆ្កែរបស់គាត់ ប៉ុន្តែគ្មាននរណាម្នាក់រំពឹងនឹងក្លាយទៅជាហិង្សាបែបនេះនោះទេ។

CDC បាននិយាយថា ការបាញ់ប្រហារនេះមិនមែនជារឿងចៃដន្យទេ ហើយបានស្តីបន្ទោសព័ត៌មានមិនពិតអំពីវ៉ាក់សាំងដែលបង្កើតការស្អប់ខ្ពើមចំពោះអ្នកវិទ្យាសាស្ត្រ។ ពួកគេបានអំពាវនាវឱ្យមេដឹកនាំសហព័ន្ធនិយាយប្រឆាំងនឹងការអះអាងមិនពិត និងធ្វើឱ្យបរិវេណរបស់ CDC កាន់តែមានសុវត្ថិភាព។

គួរបញ្ជាក់ថាក្នុងអំឡុងពេលនៃការបាញ់ប្រហារនេះ បុគ្គលិកមួយចំនួន និងកុមារចំនួន ៩០ នាក់នៅមណ្ឌលថែទាំកុមាររបស់ CDC ត្រូវបានចាក់សោរនៅខាងក្នុងអស់រយៈពេលជាច្រើនម៉ោងដើម្បីសុវត្ថិភាព។ សហជីពបានណែនាំឲ្យ និយោជិត​មិន​គួរ​ធ្វើ​ការ​ក្បែរ​កន្លែងខូច​ខាត​ដោយ​គ្រាប់​កាំភ្លើង​ឡើយ រហូត​ដល់​ការ​ជួសជុល និង​ការ​ពិនិត្យ​សុវត្ថិភាព​ត្រូវ​រួចរាល់ ខណៈការស៉ើបលើករណីនេះនឹងប្រើរយៈពេលយូរ បើតាមប៉ូលិស៕

អត្ថបទ៖ ប៊ុន សុភាព