សហភាពនារីភូមា៖ ត្រឹមមួយខែសីហា ស្រ្តីមីយ៉ាន់​ម៉ា ដល់ទៅ៧៣នាក់ ត្រូវស្លាប់ក្រោមដៃរបបយោធា

យោងតាមប្រភពពីសហភាពនារីភូមា (BWU) និងផ្សាយបន្តដោយសារព័ត៌មាន The Irrawaddy កាលពីថ្ងៃចន្ទទី៨ខែកញ្ញាឆ្នាំ២០២៥ ស្រ្តីមីយ៉ាន់ម៉ារហូតដល់ទៅ៧៣នាក់ ត្រូវបានសម្លាប់ក្រោមដៃរបបយោធា ត្រឹមមួយខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ដែលផ្អែកលើប្រភពព័ត៌មានអាចទុកចិត្តបាននិងព័ស្តុតាងប្រមូលបាននៅនឹងកន្លែង, BWU បានឲ្យដឹងថា ក្នុងចំណោមជនរងគ្រោះទាំង៧៣នាក់ មាន៥៤នាក់ស្លាប់ដោយសារវាយប្រហារពីអាកាស, ៧នាក់ស្លាប់ដោយសារគ្រាប់ផ្លោង និងអ្នកនៅសេសសល់ផ្សេងទៀតស្លាប់ដោយការវាយប្រហារជើងគោក ការលួចដុតនិងអំពើហិង្សាផ្លូវភេទ។ 

នេះគឺជាតួលេខដ៏គួរឲ្យរន្ធត់ ដែលបង្ហាញពីការរងគ្រោះរបស់ស្រ្តីនៅក្នុងសង្គ្រាមស៊ីវិលមីយ៉ាន់ម៉ា ហើយ BWU បានអំពាវនាវជាបន្ទាន់ឲ្យអន្តរជាតិ ចូលជួយធ្វើអន្តរាគមន៍។

ទោះបីជាយ៉ាងណាក៏ដោយ នេះគ្រាន់តែជាការអះអាងតែម្ខាងប៉ុណ្ណោះ។

សូមជម្រាបថា សង្គ្រាមស៊ីវិលនៅប្រទេសមីយ៉ាន់ម៉ា បានផ្ទុះឡើងបន្ទាប់ពីរដ្ឋប្រហារយោធាឆ្នាំ ២០២១។ សង្គ្រាមបានចាប់ផ្តើមនៅថ្ងៃទី ១ ខែកុម្ភៈ ឆ្នាំ ២០២១ បន្ទាប់ពីកងទ័ពមីយ៉ាន់ម៉ា ធ្វើរដ្ឋប្រហារទម្លាក់រដ្ឋាភិបាលជាប់ឆ្នោតដែលដឹកនាំដោយលោកស្រី អ៊ុង សានស៊ូជី។

រដ្ឋប្រហារនេះបានបង្កឲ្យមានការបះបោររបស់ប្រជាពលរដ្ឋទូទាំងប្រទេស ដែលក្រោយមកត្រូវបានបង្ក្រាបដោយហិង្សាពីសំណាក់របបយោធា។ ជាការឆ្លើយតប ប្រជាពលរដ្ឋបានបង្កើតក្រុមប្រដាប់អាវុធតស៊ូជាច្រើន ដើម្បីប្រយុទ្ធប្រឆាំងនឹងកងទ័ព។

គិតត្រឹមដើមឆ្នាំ ២០២៥ ប្រភពព័ត៌មានមួយចំនួនបានប៉ាន់ស្មានថា ចំនួនមនុស្សស្លាប់ក្នុងសង្គ្រាមនេះមានរហូតដល់ទៅ៥០ ០០០ នាក់។ តួលេខនេះរួមបញ្ចូលទាំងជនស៊ីវិលដែលត្រូវបានសម្លាប់ដោយរបបយោធា និងយុទ្ធជនដែលបាត់ជីវិតទាំងសងខាង។ ដោយឡែក ចំនួនអ្នករងរបួស និងបាត់ខ្លួនក៏មានរាប់ម៉ឺននាក់ដែរ៕

អត្ថបទ៖ សុខ សុវណ្ណ

ចុចអាន៖ ទាហានរបបសឹកមីយ៉ាន់ម៉ា៦នាក់ត្រូវបានសម្លាប់ក្នុងការវាយឆ្មក់របស់ក្រុមប្រឆាំង