មេភូមិភាគ២ថ្មីរបស់ថៃ ជាអតីតមិត្តរួមថ្នាក់ Boonsin Padklang 

ក្នុងការរុះរើយោធាដ៏ធំប្រចាំឆ្នាំ ប្រទេសថៃបានតែងតាំងមន្ត្រីជាន់ខ្ពស់ថ្មីចំនួន៨៦២រូប ហើយក្នុងនោះបុគ្គលដែលទទួលបានការចាប់អារម្មណ៍បំផុតគឺលោក Weerayuth Raksil ដែលនឹងក្លាយជាមេភូមិភាគ២ថ្មី ជំនួស Boonsin Padklang ដែលនឹងត្រូវចូលនិវត្តន៍នៅថ្ងៃទី៣០ខែកញ្ញាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Weerayuth ត្រូវគេដឹងថា គឺជាមិត្តរួមថ្នាក់របស់ Boonsin និងមេទ័ពជើងគោក Phana Klaewplodthuk។

ខាងក្រោមនេះគឺជាប្រវត្តិត្រួសៗរបស់លោក Weerayuth៖

លោក Weerayuth រហស្សនាម «Terng» ​មានស្រុកកំណើតនៅខេត្ត Roi Et ជានិស្សិតបញ្ចប់ការសិក្សានៅសាលា Roi Et Wittayalai ជំនាន់ទី៧៤, ជា​អតីត​និស្សិត​នៃ​សាលា​ត្រៀម​កងយោធពលភូមិន្ទ​ជំនាន់​ទី២៦ និង​ជា​អតីត​និស្សិត​នៃ​សាលា​​កងយោធពលភូមិន្ទ Chulachomklao ​ជំនាន់​ទី៣៧ ដែលជាមិត្តរួមថ្នាក់របស់ Boonsin និងមេទ័ពជើងគោក Phana។

លោកធ្លាប់មានតួនាទីជាមេបញ្ជាការកងវរសេនាតូចថ្មើរជើងលេខ១៦១ និងជាអតីត​មេបញ្ជាការ​កងពលធំ​ថ្មើរជើង​លេខ​១៦ (​ជំរំ Bodindecha ខេត្ត Yasothon​)។

លោកក៏ធ្លាប់ជាអតីត​មេបញ្ជាការ​នៃ​ក្រុម​ការងារ​ពិសេស​ទី​៣ ត្រួត​ពិនិត្យ​ព្រំដែន​កម្ពុជា​-​ថៃ នៅ​ភូមិភាគ​ឦសាន​និងជាអតីត​មេបញ្ជាការ​កងពលធំ​ថ្មើរជើងលេខ​៦ ក៏ដូច​ជា​មេបញ្ជាការ​នៃ​ក្រុម​ការងារ ​Suranaree ដែល​មើល​ការ​ខុស​ត្រូវ​ព្រំដែន​កម្ពុជា-ថៃផងដែរ។

ថ្មីៗ លោក Weerayuth បានដឹកនាំក្រុមអ្នកសង្កេតការណ៍បណ្តោះអាសន្ន (IOT) មកពីប្រទេសចំនួន៨ ដើម្បីត្រួតពិនិត្យទីតាំងនៅតាមព្រំដែនកម្ពុជា-ថៃ។

មុននេះ លោកក៏ត្រូវបានចាត់តាំងឲ្យចូលរួមក្នុងកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ ដែលធ្វើឡើងនៅប្រទេសម៉ាឡេស៊ីផងដែរ៕

អត្ថបទ៖ សុខ សុវណ្ណ

ចុចអាន៖ តើមេភូមិភាគ១ថ្មីរបស់ថៃ ជានរណា?