កាន់តែក្តៅ! ការប្រយុទ្ធគ្នានៅមីយ៉ាន់ម៉ា ធ្លាយចូលដល់ដីថៃហើយ មានទាំងការផ្ទុះគ្រាប់ផ្លោង

ស្ថានការណ៍នៅភាគខាងលិចប្រទេសថៃកាន់តែធ្ងន់ធ្ងរទៅៗហើយ ខណៈការប្រយុទ្ធគ្នាដ៏ក្តៅគគុករវាងកងទ័ពរបបសឹកមីយ៉ាន់ម៉ាជាមួយក្រុមប្រឆាំងប្រដាប់អាវុធ បានរាលដាលចូលដីថៃ ដោយមានគ្រាប់ផ្លោងបាញ់ធ្លាយចូលដល់ខេត្ត Tak។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដកស្រង់ប្រភពពីសារព័ត៌មានថៃ, គេហទំព័រ Myanmar Now ផ្សាយនៅថ្ងៃព្រហស្បតិ៍ទី២៥ខែកញ្ញាឆ្នាំ២០២៥ថា ស្នូរផ្ទុះត្រូវបានគេឮនៅក្នុងខេត្ត Tak នៃប្រទេសថៃ។ វាជាការផ្ទុះគ្រាប់ផ្លោងដែលបាញ់ធ្លាយចូលដល់ដីថៃ ពីការប្រយុទ្ធគ្នាយ៉ាងក្តៅគគុកនៅក្រុង Lay Kay Kaw New ភាគខាងត្បូងតំបន់ Myawaddy នៃរដ្ឋ Karen។

យ៉ាងណាមិនមានរបាយការណ៍ពីជនរងគ្រោះនៅខាងដីថៃទេ ប៉ុន្តែកងទ័ពថៃក៏បានដាក់ពង្រាយនៅតាមព្រំដែនរួចហើយផងដែរ ដើម្បីពង្រឹងសន្តិសុខ។

ថៃ បានដាក់ពង្រាយកងកម្លាំងមកពីអង្គភាព Rajamanu, កងកម្លាំង Naresuan, កងវរសេនាធំថ្មើរជើងលេខ៣៥ និងនគរបាលល្បាតព្រំដែនទី៣៤ នៅតាមស្រុក Mae Sot, Umphang, Phop Phra, Tha Song Yang និង Mae Ramat ក្នុងខេត្ត Tak។

ដោយស្ថិតក្នុងកម្រិតប្រុងជើងការខ្ពស់ ភូមិភាគ៣របស់ថៃ ក៏បង្កើនការល្បាតនិងត្រួតពិនិត្យស្ថានភាពនៅតាមបណ្តោយព្រំដែនផងដែរ ហើយឈរជើង២៤ម៉ោងលើ២៤ម៉ោង ដើម្បីត្រៀមខ្លួនដោះស្រាយបញ្ហា៕

អត្ថបទ៖ សុខ សុវណ្ណ

ចុចអាន៖ ទ័ពថៃត្រៀមខ្លួន ខណៈការប្រយុទ្ធគ្នាខ្លាំងក្លានៅមីយ៉ាន់ម៉ា រាលដាលកាន់តែកៀកដីថៃ