បំណុល​អ៊ុយក្រែន​កើន​​លើស​ពី GDP ដល់​ជាង ១៩២​ពាន់​លាន​ដុល្លារ

យោង​តាម​ការ​ចុះ​ផ្សាយ​របស់ Interfax គិតត្រឹមចុងខែសីហាឆ្នាំ២០២៥ បំណុលសាធារណៈ និងបំណុល​រដ្ឋសរុបរបស់អ៊ុយក្រែនបានឈានដល់ ១៩២,៧១​ពាន់លានដុល្លារ។ នេះឆ្លុះបញ្ចាំងពីការកើនឡើងគួរ​ឲ្យ​កត់សម្គាល់ ខណៈ​គ្រាន់​តែ​នៅ​ក្នុង​ខែ​សីហា​តែ​ឯង​ អ៊ុយក្រែន​បាន​​កើន​បំណុល ៦,៥៨​ពាន់លានដុល្លារ។

បំណុលបរទេស​មានចំនួន ១៤៥,១៧​ពាន់លានដុល្លារ (៧៥,៣៤​% នៃ​បំណុល​សរុប) ខណៈដែលបំណុលក្នុងស្រុកមានចំនួន ៤៧,៥៤​ពាន់លានដុល្លារ។ នៅចុងខែសីហាឆ្នាំ​២០២៥ បំណុលសាធារណៈសរុបបានលើសពីផលិតផលក្នុងស្រុកសរុប (GDP) របស់ប្រទេសសម្រាប់ឆ្នាំ​២០២៤ ដែលមានចំនួន ១៩០,៧​ពាន់លានដុល្លារ។

មូលនិធិរូបិយវត្ថុអន្តរជាតិ (IMF) ព្យាករ​ថា បំណុលសាធារណៈសរុបរបស់អ៊ុយក្រែននឹងកើនឡើងដល់ ១១០​% នៃ GDP នៅចុងឆ្នាំ​២០២៥។

បំណុលសាធារណៈដ៏ច្រើនរបស់អ៊ុយក្រែន គឺបណ្តាលមកពីការឈ្លានពាន​ពេញ​ទំហឹង​របស់រុស្ស៊ីក្នុងឆ្នាំ​២០២២ ដែលបានធ្វើ​ឲ្យមានភាពងាយរងគ្រោះផ្នែកសេដ្ឋកិច្ចដែលកើត​​រួច​មក​ហើយ​​​តាំង​ពីមុន​​សង្គ្រាម​​​​ទៅ​ទៀត។ សង្រ្គាមបាន​បណ្ដាល​ឲ្យ​មានការកើនឡើងនៃការចំណាយយោធា ការខូចខាតហេដ្ឋារចនាសម្ព័ន្ធដ៏ធំ និងការដួលរលំនៃប្រាក់ចំណូល ដោយ​​បង្កើតឱនភាពថវិកាដ៏ធំ​ព្រោះ​ការខ្ចីប្រាក់អន្តរជាតិ។

ការចំណាយលើការការពារ និងសន្តិសុខបានកើនឡើងយ៉ាងខ្លាំង ដោយប្រើប្រាស់ច្រើនជាង ២៥% នៃ GDP របស់អ៊ុយក្រែនជារៀងរាល់ឆ្នាំ។ ជាមួយនឹងចំណូលពន្ធធ្លាក់ចុះយ៉ាង​គំហុក​ដោយសារ​សង្រ្គាម រដ្ឋាភិបាលត្រូវខ្ចីប្រាក់យ៉ាងច្រើនពីដៃគូអន្តរជាតិ ដើម្បីផ្តល់មូលនិធិដល់កិច្ចខិតខំប្រឹងប្រែងយោធារបស់ខ្លួន និងគ្របដណ្តប់លើការចំណាយមិនមែនផ្នែកយោធា ដូចជា ប្រាក់សោធននិវត្តន៍ អត្ថប្រយោជន៍សង្គម និងជំនួយសម្រាប់ជនភៀសខ្លួនក្នុងស្រុក។

បន្ទាប់ពីការលុកលុយ GDP របស់អ៊ុយក្រែនបានធ្លាក់ចុះជិត ៣០% ក្នុងឆ្នាំ២០២២។ សមត្ថភាពផលិតកម្មត្រូវបាន​រាំង​ស្ទះ ដោយការបំផ្លិចបំផ្លាញសម្ភារៈបរិក្ខារ និងហេដ្ឋារចនាសម្ព័ន្ធថាមពល ដែលនាំ​ឲ្យ​មានការថយចុះយ៉ាងខ្លាំងនៃការនាំចេញ។ ការ​នាំ​ចូល​ទំនិញ​យោធា និង​ទំនិញពាក់កណ្តាលសម្រេច បាន​កើន​ឡើង​ដើម្បី​បំពេញ​តម្រូវ​ការ​របស់​ប្រទេស ដែល​បង្កើត​អតុល្យភាព​ពាណិជ្ជកម្ម​យ៉ាងខ្លាំង។

មួយផ្នែកធំនៃបំណុលថ្មីបានមកពីការខ្ចីពីខាងក្រៅ ជាចម្បងពីសហភាពអឺរ៉ុប IMF ធនាគារពិភពលោក និងប្រទេស​ជា​ដៃគូផ្សេងទៀត។ ទោះ​ប្រាក់កម្ចីទាំងនេះភាគ​ច្រើនគឺជា «សម្បទាន» ជាមួយនឹងអត្រាការប្រាក់ទាប និងរយៈពេលសងត្រឡប់យូរ ពួកវា​នៅតែបន្ថែម​បន្ទុកបំណុលដ៏ធ្ងន់ធ្ងរ​សម្រាប់​​អ៊ុយក្រែន។

រឹតតែ​លំបាក​ជាង​នេះ សង្រ្គាមបានបង្កើនការពឹងផ្អែករបស់អ៊ុយក្រែនលើបំណុលរូបិយប័ណ្ណបរទេសដែលមានហានិភ័យខ្ពស់។ ការ​ធ្លាក់​តម្លៃ​លុយ hryvnia របស់​អ៊ុយក្រែន បាន​ធ្វើ​ឲ្យ​ការទូទាត់សង​​​កាន់តែ​មាន​តម្លៃ​ខ្ពស់​ជាងមុន៕

ដោយ៖ ឈាង