ចោរប្លន់មាសនៅ Narathiwat  គឺជាក្រុមបះបោរ ប្លន់គ្រឿងអលង្ការបានជាង ១លានដុល្លារ រួចឆ្លងដែនចូល ម៉ាឡេស៊ី

ជុំវិញករណីក្រុមចោរប្លន់ហាងមាសដ៏កក្រើកប្រទេសថៃកាលពីល្ងាចថ្ងៃអាទិត្យទី៥ខែតុលា ពេលនេះមន្ត្រីខេត្ត Narathiwat បញ្ជាក់ថា ជនល្មើសគឺជាក្រុមបះបោរភាគខាងត្បូង ដោយប្លន់គ្រឿងអលង្ការសរុបជាតម្លៃ ៣៦លានបាត ស្មើនឹង ១ ១១០ ៦៨២ ដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដកស្រង់ប្រភពពីប៉ូលិស, សារព័ត៌មាន Khaosod ផ្សាយថា ពួកបះបោរបានធ្វើសកម្មភាពដោយចែកជា៣ក្រុម ដូចជាក្រុមលួចរថយន្ត ក្រុមប្លន់មាស និងក្រុមបាចដែកគោលតាមផ្លូវដើម្បីរារាំងប៉ូលិស។

តាមរបាយការណ៍សមត្ថកិច្ច, ពួកគេមានគ្នា១០នាក់ ចូលប្លន់ហាងមាស Yaowarat Krungthep ក្នុងផ្សារទំនើប Big C នៅស្រុក Su-ngai Kolok នៃខេត្ត Narathiwat។ ក្រោយប្លន់បានសម្រេច ពួកគេក៏ធ្វើដំណើរតាមផ្លូវក្នុងឃុំ Sakor នៃស្រុក Waeng ដើម្បីឆ្លងដែនចូលទៅក្នុងប្រទេសម៉ាឡេស៊ី។

ជុំវិញរឿងនេះ មន្ត្រីនៃអង្គភាពដោះគ្រាប់បែក រួមជាមួយក្រុមធ្វើកោសល្យវិច្ច័យនិងមន្ត្រីពាក់ព័ន្ធផ្សេងទៀតមកពីគ្រប់ផ្នែកបានចុះពិនិត្យវត្ថុសង្ស័យនិងព័ស្តុតាងនៅកន្លែងកើតហេតុ ដើម្បីប្រមូល DNA និងស្នាមមេដៃ ដែលអាចមាននៅសេសសល់។

ទន្ទឹមនោះ ពួកគេ​ក៏​សាកសួរ​សន្តិសុខនិង​បុគ្គលិក​ហាង​មាសផងដែរ ហើយកំពុងបើកយុទ្ធនាការតាមចាប់ក្រុមចោរ ខណៈសមត្ថកិច្ចក៏បញ្ជាឲ្យបិទច្រកព្រំដែន និងរឹតបន្តឹងសន្តិសុខយ៉ាងតឹងរ៉ឹងផងដែរ៕

អត្ថបទ៖ សុខ សុវណ្ណ

ចុចអាន៖ ភាគខាងត្បូងថៃវឹកវរ! ក្រុមចោរប្រដាប់អាវុធ ចូលប្លន់ហាងមាស ថែមទាំងបំផ្ទុះគ្រាប់បែក