​អាមេរិក​ផ្ដល់​លុយ​ឲ្យ​​អ៊ីស្រាអែល​ជាង ២១ពាន់​លាន​ដុល្លារ ​តាំង​ពី​សង្គ្រាម​នៅ​ហ្កាហ្សា​ចាប់​ផ្ដើម

សហរដ្ឋអាមេរិក បានផ្តល់​ជំនួយយោធាយ៉ាងតិច ២១,៧​ពាន់លានដុល្លារដល់អ៊ីស្រាអែល តាំងពីការចាប់ផ្តើមនៃសង្រ្គាមនៅតំបន់ហ្គាហ្សាកាលពីពីរឆ្នាំមុន។ នេះបើយោងតាមការសិក្សាថ្មីមួយដែលបានចេញផ្សាយនា​ថ្ងៃអង្គារ​ទី​៧​ខែ​តុលា​ឆ្នាំ​២០២៥ ចំ​ខួប​២​ឆ្នាំ​នៃ​សង្គ្រាមរវាង​​អ៊ីស្រាអែល-ប៉ាឡេស្ទីន ដោយ​គម្រោង«ចំណាយនៃសង្គ្រាម»របស់សាកលវិទ្យាល័យ Brown។

របាយការណ៍សិក្សា​​​របស់​សាកលវិទ្យាល័យ Brown ​បានប៉ាន់ប្រមាណថា ទីក្រុងវ៉ាស៊ីនតោនបានចំណាយបន្ថែមពី ៩,៦ ទៅ ១២​ពាន់លានដុល្លារ លើប្រតិបត្តិការសន្តិសុខ និងសកម្មភាពយោធានៅទូទាំងមជ្ឈិមបូព៌ាក្នុងអំឡុងពេលដូចគ្នានេះ រួមទាំងការវាយប្រហារលើក្រុមឧទ្ទាមហ៊ូធី នៅ​យេម៉ែន និងគោលដៅ​នៅ​អ៊ីរ៉ង់។

របាយការណ៍ដដែល​នេះ បាននិយាយថា ជំនួយរបស់សហរដ្ឋអាមេរិកមានសារៈសំខាន់ខ្លាំងណាស់ ក្នុងការទ្រទ្រង់យុទ្ធនាការយោធារបស់អ៊ីស្រាអែលនៅហ្គាហ្សា។ វាបានប៉ាន់ប្រមាណថា ១៧,៩​ពាន់លានដុល្លារ ត្រូវបានផ្តល់​ឲ្យ​ក្នុងអំឡុងពេលរដ្ឋបាល​របស់អតីត​ប្រធានាធិបតី ចូ បៃដិន ក្នុងឆ្នាំដំបូងនៃសង្រ្គាម ខណៈដែល ៣,៨​ពាន់លានដុល្លារ ត្រូវបានផ្តល់​ឲ្យ​នៅឆ្នាំទីពីរក្រោម​ប្រធានាធិបតី ដូណាល់ ត្រាំ។

យោងតាមរបាយការណ៍ ជំនួយមួយចំនួនត្រូវបានផ្តល់រួចហើយ ខណៈដែលនៅសេស​សល់នឹងត្រូវបានផ្គត់ផ្គង់ក្រោមកិច្ចព្រមព្រៀងការពារជាតិដែលមានស្រាប់រយៈពេលច្រើនឆ្នាំ។

អ្នកស្រាវជ្រាវគម្រោង «ចំណាយនៃសង្គ្រាម» បាន​លើក​ឡើង​ថា បើគ្មានការគាំទ្រដ៏ធំពីសហរដ្ឋអាមេរិកទេ នោះ​អ៊ីស្រាអែលនឹងពិបាក​​ក្នុង​ការ​រក្សាប្រតិបត្តិការយោធាដ៏យូររបស់ខ្លួននៅក្នុងតំបន់ហ្គាហ្សា។ ពួកគេក៏បានព្រមានផងដែរថា ថវិការាប់សិបពាន់លានដុល្លារ​បន្ថែម​ទៀត​របស់សហរដ្ឋអាមេរិក​នឹងត្រូវ​ផ្ដល់​ឲ្យ​​អ៊ីស្រាអែល ក្រោមកិច្ច​ព្រមព្រៀង​ការពារជាតិ​ផ្សេងៗ​ទៀត​នាពេលអនាគត៕

ដោយ៖ ឈាង