សុខភាព

គីសតម្រងនោម មានរោគសញ្ញាអ្វីខ្លះ? អ្នកណាងាយកើត?

បានផុស

៣ years មុន

នៅ

ថ្ងៃពុធ ១៥ កុម្ភៈ ២០២៣

ដោយ

គីសអាចលេចឡើងនៅលើតម្រងនោម ជាពិសេសនៅពេលដែលយើងមានវ័យកាន់តែច្រើន។ ជាក់ស្ដែងជិតពាក់កណ្ដាលនៃអ្នកដែលមានអាយុចាប់ពី៥០ឆ្នាំឡើង មានគីសនៅតម្រងនោម ហើយគីសប្រភេទនេះកើតលើបុរសច្រើនជាងស្ត្រី និងពេលខ្លះមិនមានបង្ហាញរោគសញ្ញាអ្វីទាំងអស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គីសតម្រងនោមជាអ្វី?

គីស ឬថង់ទឹកតូចៗ អាចលេចឡើងនៅផ្នែកខាងក្រៅនៃតម្រងនោម ហើយជារឿយៗមិនបង្កឲ្យមានរោគសញ្ញាអ្វីឡើយ។ គីសទាំងនេះអាចមានទំហំតូចប៉ុនគ្រាប់សណ្ដែក ឬធំប៉ុនកូនហ្គោល មានរាងមូល ឬរាងពងក្រពើ ហើយមិនប៉ះពាល់ដល់មុខងាររបស់តម្រងនោមនោះទេ។

រោគសញ្ញាសំខាន់ៗ

យើងអាចសង្កេតឃើញរោគសញ្ញាទាំងនេះ ប្រសិនបើដុំគីសលូតលាស់ បែកធ្លាយ ឬឆ្លងមេរោគ៖

ឈឺចាប់ ឬមិនស្រួលនៅតំបន់ពោះផ្នែកខាងលើ
មានឈាមនៅក្នុងទឹកនោម ឬពិបាកនោម
សម្ពាធឈាមខ្ពស់
គ្រុនក្ដៅ

ប្រសិនបើមានរោគសញ្ញាទាំងនេះ យើងគួរតែទៅពិគ្រោះយោបល់ជាមួយនឹងគ្រូពេទ្យ ពីព្រោះថាដុំគីស អាចបណ្ដាលឲ្យមុខងារតម្រងនោមថយចុះ។

មូលហេតុបង្ក

ក្រុមគ្រូពេទ្យនៅមិនទាន់ដឹងច្បាស់នៅឡើយថា ប្រភេទដុំគីសធម្មតានៅលើតម្រងនោមបង្កឡើងដោយមូលហេតុអ្វី។ ហេតុដូច្នេះហើយ ទើបធ្វើឲ្យយើងពិបាកក្នុងការបង្ការដុំគីសប្រភេទនេះ។ ទន្ទឹមនឹងនេះ ជំងឺមួយចំនួនក៏អាចបណ្ដាលឲ្យកើតគីសតម្រងនោម ដែលរួមមាន ជំងឺតម្រងនោម Polycystic (PKD) ។ អ្នកដែលកើតជំងឺមួយនេះ អាចកើតមានពពួកដុំគីសនៅក្នុងតម្រងនោម ហើយថែមទាំងអាចនាំឲ្យមុខងារតម្រងនោមដំណើរការខុសប្រក្រតីផងដែរ។

អ្នកដែលប្រឈមនឹងហានិភ័យខ្ពស់ក្នុងការកើតដុំគីស

ដុំគីសធម្មតាអាចលេចឡើងនៅពេលដែលយើងមានវ័យកាន់តែចាស់។ ចំណែកឯអ្នកជក់បារី ឬមានសម្ពាធឈាមខ្ពស់ ក៏មានឱកាសខ្ពស់ក្នុងការកើតគីសតម្រងនោមដូចគ្នា។ មួយវិញទៀត អ្នកដែលមានជំងឺហ្សែន (Genetic predisposition) ឬអ្នកដែលមានបញ្ហាសុខភាព ដូចជាជំងឺតម្រងនោម Polycystic ក៏ងាយកើតមានដុំគីសតម្រងនោមដែរ៕

អត្ថបទផ្ដល់ដោយ៖ Hello Krupet

ចុចអាន៖ចុកទ្រូងពេលកំពុងគេង អាចបណ្ដាលមកពីមូលហេតុទាំងអស់នេះ

ចុចអាន៖ក្រួសតម្រងនោម អាចបង្កើនហានិភ័យនៃជំងឺមហារីកតម្រងនោម?