មូលហេតុ និង​ហានិភ័យ​ប្រឈម ចំពោះ​ទារក​កើត​មិន​គ្រប់​គីឡូ​

​ទារក​ធម្មតា​មាន​ទម្ងន់​ចាប់ពី 2,5​គីឡូ (2500​ក្រាម​) ឡើង​ទៅ​។ ទារក​មាន​គីឡូ​មិន​គ្រប់​កាលណា​តិច​ជាង 2500​ក្រាម (​កម្រិត​ធ្ងន់ធ្ងរ​បើ <1500​ក្រាម និង ធ្ងន់ធ្ងរ​ខ្លាំង​បើ <1000​ក្រាម​)​។​

​ក​) មូលហេតុ​អ្វីខ្លះ​ ដែល​ធ្វើ​ឲ្យ​ទារក​កើត​មិន​គ្រប់​គីឡូ​?

– កត្តា​ម្តាយ ជំងឺ​ក្រឡាភ្លើង ការ​ឡើង​សំពាធ​ឈាម​រ៉ាំរ៉ៃ​

– កត្តា​ទារក ការបង្ក​រោគ​តាំងពី​ក្នុង​ពោះ (toxoplasmose, ម្តាយ​កើត​ស្អូច​ពេល​ពពោះ​)

​ជំងឺ​តំណពូជ​ពី​កំណើត (​ឧ​ទា​ហរ​ណ៍ ជំងឺ​trisomie ទី​21 ទី​18)

– កត្តា​គភ៌​: ការ​ពពោះ​កូនភ្លោះ ២ ឬ ច្រើន​

​ខ​) តើ​អាច​មាន​បញ្ហា​អ្វីខ្លះ​នៅ​ពេល​សម្រាល និង​ក្រោយ​សម្រាល​?

​ទារ​កកើត​គ្រប់​ខែ ឬ​មិន​គ្រប់​ខែ​ក្តី បើ​សិន​ជាមាន​ទម្ងន់​មិន​គ្រប់ គឺ​អាច​ប្រឈមមុខ​នឹង​គ្រោះថ្នាក់​ជាច្រើន ដូចជា​៖

១) គ្រោះថ្នាក់​មុន​ពេល​សម្រាល​

ទារក​កើត​មិន​គ្រប់​គីឡូ​ខ្លាំង​អាចមាន​សភាព​ខ្សោយ​តាំងពី​ក្នុង​ពោះ (​ដោយសារ​កង្វះ​អាហារ​រូបបឋម ឬ​ការបង្ក​រោគ​)​។ ទារក​អាច​មាន​ចង្វាក់បេះដូង​ខ្សោយ កើតមក​សន្លប់ ឬ​អាច​ឈាន​ដល់​ស្លាប់​ក្នុង​ពោះ ក្នុង​ករណី​ធ្ងន់ធ្ងរ​។​

២) គ្រោះថ្នាក់​ក្រោយពេល​សម្រាល ទារក​កើតមក​តូច​ងាយ​ប្រឈម​នឹង​វិបត្តិ​ជាច្រើន​រួមមាន​៖

– វិបត្តិ​នៃ​ការ​រំលាយ​អាហារ ជាហេតុ​ធ្វើ​ឲ្យ​ទារក​កាន់តែ​ខ្សោយ និង​មិន​ងាយ​ឡើង​ទម្ងន់​។​

– ចុះ​កម្ដៅ​ក្នុង​ខ្លួន​ខ្លាំង (hypothermia)

– ចុះ​ជាតិ​ស្ករ (hypoglycemia)

– ចុះ​ជាតិ​កាល់ស្យូម (hypocalcemia)

– ងាយ​ឡើង​លឿង (jaundice) ។​ល​។​

​គ​) តើ​ម្តាយ​គ្រប់រូប​គួរ ធ្វើ​ដូចម្តេចខ្លះ​ដើម្បី​បង្ការ​បញ្ហា​ទាំងនេះ​?

– ទទួលទាន​អាហារ​បំប៉ន​ឲ្យ​បាន​គ្រប់គ្រាន់​

– តាមដាន​សុខភាព​ផ្ទៃពោះ​ឲ្យ​បាន​ទៀងទាត់​

– ជ្រើសរើស​មន្ទីរពេទ្យ​សម្រាល​បុត្រ​ ដែល​មាន​គ្រូពេទ្យ​ឯកទេស​កុមារ​-​ទារក​ច្បាស់លាស់​

– គោរព​តាម​ការណែនាំ​របស់​គ្រូពេទ្យ​ផ្នែក​ទារក ក្នុង​ការ​បំបៅ​ទឹកដោះ និង​ថែទាំ​ទារក​

“​សូម​អ្នក​ម្តាយ​គ្រប់រូប ​ដែល​មាន​បញ្ហា​កូន​ក្នុង​ផ្ទៃ​មាន​គីឡូ​តិច គួរ​គប្បី​មក​ធ្វើ​ការតាមដាន និង​សម្រាល​នៅ​មន្ទីរពេទ្យ​កាល់ម៉ែត ដែល​មាន​ក្រុម​គ្រូ​ពេទ្យ​ជំនាញ និង​បទពិសោធន៍​ខ្ពស់​”៕​

អត្ថបទ៖ រស្មី

សូមចុច​អាន៖ ​ផលវិបាក និងការវិវត្ត និងការព្យាបាលនៃ “ជំងឺស្រឺត”