ម្ចាស់ហ្វ្រេនឆាយ លក់បាយល្បីឈ្មោះមួយ ធ្លាប់ជាអតីតពលករ នៅប្រទេសកូរ៉េ

យុវជនម្នាក់ ធ្លាប់ធ្វើជាកម្មករសំណង់ ធ្វើជាពលករនៅប្រទេសកូរ៉េ និងធ្វើជាចុងភៅអស់រយៈពេល ១០ឆ្នាំ ទើប​ស​ម្រេ​ច​​ចិត្ត​បង្កើត​មុខរបរ ហ្វ្រេនឆាយអាជីវកម្មខ្នាតតូចមួយ នៅដើមឆ្នាំ២០២១កន្លងទៅនេះ។ យុវជនរូបនេះ មា​ន​ឈ្មោះ​លោក ម៉ិល ឆោម ដែលជាស្ថាបនិកហ្រ្វេនឆាយ មាន់&បាយ Chef Chhoum។ បង្កើតឡើងនៅ​ដើម​ឆ្នាំ២០​២១ មកដល់ពេលនេះ បានពង្រីកសាខាចំនួន ១០ទីតាំងហើយ តែលោក ឆោម យល់ថា លោកមិនទាន់មាន​ភាព​ជោគ​ជ័យអ្វីនោះទេ គ្រាន់តែបានដើរលើផ្លូវត្រូវ នៃមុខរបរមួយនេះតែប៉ុណ្ណោះ។ ខាងក្រោមនេះ ជាប្រវត្តិខ្លះៗ អំពីការសិក្សា ការងារ និងមុខរបរ ដែលម្ចាស់ហ្រ្វេនឆាយ មាន់&បាយ Chef Chhoum បានធ្វើ និងកំពុងធ្វើ។

លោក ម៉ិល ឆោម មានស្រុកកំណើតនៅភូមិត្បែង ឃុំគគីសោម ស្រុកស្វាយទាប ខេត្តស្វាយរៀង។ មានឪពុកឈ្មោះ ប៉ា បោងវ៉ិត ម្ដាយឈ្មោះ ស៊ុន សំណាង ដោយទាំងឪពុក និងម្ដាយរបស់លោក ប្រកបមុខរបរជាកសិករដូចគ្នា ហើ​យលោកមានបងប្អូន ៦នាក់។

លោក ម៉ិល ឆោម បានសិក្សាចំណេះដឹងទូទៅត្រឹមតែថ្នាក់ទី ៨ប៉ុណ្ណោះ ដោយសារស្ថានភាពគ្រួសា​រមិន​អំណោយ​ផល។ តែជាយ៉ាងណា ឆោម បានបន្តការសិក្សាចំណេះដឹងទូទៅបាន ១ឆ្នាំទៀត នៅអង្គការPSE ហើយបន្ទាប់មក​ទើបរៀនផ្នែកចុងភៅ​រយៈពេល ២ឆ្នាំ នៅអង្គការដដែលនេះ។

មុនពេលចាប់ផ្ដើមបង្កើត ហ្រ្វេនឆាយ មាន់&បាយ Chef Chhoum យុវជន ឆោម ធ្លាប់មានបទពិសោន៍ជា ​កម្មករ​សំណង់ ចុងភៅនៅតាមហាង តាមសណ្ឋាគារ បង្រៀនផ្នែកចុងភៅអង្គការPSE និងធ្លាប់ធ្វើជាពលករចំណាកស្រុក នៅប្រទេស​កូរ៉េរយៈពេលជិត ៥ឆ្នាំ។ ពេលនៅប្រទេសកូរ៉េយុវជនរូបនេះ បានឆ្លៀតពេលក្រៅម៉ោងបន្ថែម ដើម្បីធ្វើការងារ​ជាមេ​ចុង​ភៅនៅហាងមួយ ក្នុងប្រទេសកូរ៉េនោះ។ លោក ឆោម​ ចេះធ្វើម្ហូប ខ្មែរ កូរ៉េ ចិន ជប៉ុន និងម្ហូប អឺរ៉ុបមួយចំនួន​ទៀត​ដែរ ដែលជារួមលោកធ្វើការងារជាមេចុងភៅ មានចំនួន ១០ឆ្នាំឯណោះ។

នៅខែកុម្ភៈ ឆ្នាំ២០២១ លោក ម៉ិល ឆោម បានរៀបចំបង្កើតហ្វ្រេនឆាយ មាន់&បាយ Chef Chhoum។ ចំពោះការ​បង្កើត​ពីដំបូង លោកជួបបញ្ហាប្រឈមតិចតួចប៉ុណ្ណោះ ដោយសារវាជាអាជីវកម្មហ្វ្រេនឆាយ ម្ហូបអាហារវេចខ្ចប់។ តាម​ពិតទៅ មុនពេលបង្កើតហ្វ្រេនឆាយនេះ លោក ឆោម ធ្លាប់បើកហាងទំនើបមួយកន្លែង ក្បែរសាលាបាក់ទូក ក្នុង​រាជធានីភ្នំពេញ ដែលមាន​លក់ស៊ុបក្រហម រសជាតិខ្មែរ-កូរ៉េ។ ប៉ុន្តែដោយសារបញ្ហាទីតាំងមិនសូវល្អ និងដោយ​សា​រ​វិបត្តិ​នៃជំងឺកូវីដ-១៩ផង លោកក៏សម្រេចចិត្តបិទហាងនោះតែម្ដង។

ជាដំណោះស្រាយ ចំពោះការប្រកបមុខរបររបស់ខ្លួន សហគ្រិនវ័យ ៣២ឆ្នាំរូបនេះ បានបង្វែរទៅបង្កើតហ្វ្រេនឆាយខ្នាត​តូចមួយ នោះគឺ មាន់&បាយ Chef Chhoum វិញ។ មាន់&បាយ Chef Chhoum មានលក់ មាន់បំពង បាយមាន់ ដំឡូងចៀន បែបកូនកាត់ភ្នំពេញ-សេអ៊ូល និងភេសជ្ជៈមួយចំនួនទៀត ហើយការលក់គឺអតិថិជន អាចទៅទិញ​វេចខ្ចប់ដោយផ្ទាល់​ ឬក៏​កម្ម​ង់ទិញតាមអញឡាញក៏បានដែរ។​

មូលហេតុ ដែលលោក ឆោម ចាប់យកមុខរបរក្នុងវិស័យម្ហូបអាហារ ដោយសារតែលោកមានបទពិសោធន៍ច្រើន ទាំងការសិក្សា និងការអនុវត្តផ្ទាល់ ទៅលើការធ្វើម្ហូបអាហារនេះ។ ចំពោះមូលហេតុ ដែលលោកដាក់ឈ្មោះហ្វេ្រន​ឆាយ មាន់&​បាយ Chef Chhoum​ ក៏ព្រោះតែលោកជាមេចុងភៅ មានបទពិសោធន៍ច្រើន ចំពោះការចំអិនសាច់​មាន់​ច្រើនរសជាតិ ហើយអាជីវកម្មរបស់លោក គឺផ្ដោតសំខាន់លើ បាយសាច់មាន់ និងមាន់បំពង់។

ការចំណាយទុនដំបូង សម្រាប់បង្កើតអាជីវកម្មនេះ គឺត្រឹមតែ ២៥០០ដុល្លារអាមេរិកប៉ុណ្ណោះ សម្រាប់ចំណាយ​ទៅ​លើ​សម្ភារៈប្រើប្រាស់ វត្ថុធាតុដើមផលិត និងការជួលទីតាំង ហើយក្រោយពីមានការរីកចំរើន លោកបាន​ចំណាយ​ដើមទុន​ជា​បន្តបន្ទាប់ទៀត។ ចំពោះទីតាំង ដែលបើកដំណើរការដំបូង គឺនៅជិតសាលារៀនវ៉ាន់គណនេយ្យ ស្ថិតក្នុង​សង្កាត់​ទំនប់ទឹក ខណ្ឌចំការមន រាជធានីភ្នំពេញ។

លោក ឆោម យល់ថា អាជីវកម្មខ្នាតតូចរបស់លោក លក់ចំណីអាហារនេះ មិនសូវ​មាន​ហានិ​ភ័យ និងការខាតបង់អ្វី​ឡើ​យ ទោះស្ថិតនៅក្នុងបរិបទនៃកូវីដ-១៩ ព្រោះថា មនុស្សគ្រប់រូបចៀស​មិន​បាន​ទេ សម្រាប់ការទទួលទា​នចំណី​អា​ហារ​ប្រចាំថ្ងៃ ឲ្យតែយើងលក់ផលិតមានគុណភាពល្អ ឆ្ងាញ់ និងមាន​ផាសុកភាព​ ហើយឥឡូវគេអាច​កម្មង់​តាម​អន​ឡាញ បានថែមទៀត។

ចាប់តាំងពីដើមឆ្នាំ២០២១ មកដល់ពេលបច្ចុប្បន្ន​ មាន់&បាយ Chef Chhoum បានពង្រីកសាខាលក់របស់ខ្លួន​ចំនួន ១០ទីតាំងហើយ ក្នុងនោះមាននៅរាជធានីភ្នំពេញ និងនៅខេត្តឧត្ដរមានជ័យ។ សហគ្រិន ម៉ិល ឆោម បាន​ដាក់គោល​ដៅរយៈពេល ៣ខាងមុខ ធ្វើយ៉ាងណាពង្រីកសាខាឲ្យបាន​ ៤០០សាខានៅទូទាំងប្រទេស។

ទោះជាបីមានមុខរបរច្បាស់លាស់ និងបានពង្រីកសាខារហូតដល់ ១០ទីតាំងក៏ដោយ ក៏លោក ឆោម យល់ថា មកដល់ពេលនេះ មិនទាន់មានភាពជោគជ័យអ្វីដែរ។ តែលោកថា លោកកំពុងដើរលើផ្លូវត្រូវ ក្នុងអាជីវកម្មមួយ ដែលអាចមានភាពជោគជ័យ នាពេលខាងមុខ។

ជាចុងក្រោយលោក ម៉ិល ឆោម បានផ្ដល់គំនិតដល់អ្នក ដែលចង់ទិញហ្រ្វេនឆាយរបស់អ្នកដទៃ ដើម្បីយកមក​ប្រក​ប​មុខរបរប្រចាំថ្ងៃនោះ សូមគិតគូឲ្យបានច្បាស់លាស់មុនសម្រេចចិត្តទិញ។ ត្រង់ចំណុចនេះលោក បានបញ្ជាក់ថា «ខ្ញុំសូម​ផ្ដល់គំនិតឲ្យពួកគាត់ សិក្សាឲ្យបានច្បាស់ពីហ្វេ្រនឆាយមួយហ្នឹង ថា គឺអាជីវកម្មភ្លើងចំបើង ឬក៏អាជីវកម្ម​យូរ​​អង្វែង ហើយមូលហេតុដែលខ្ញុំផ្ដល់គំនិតបែបហ្នឹង ពីព្រោះបច្ចុប្បន្ននេះ អាជីវកម្មហ្វ្រេនឆាយមានច្រើនមែនទែន ដោយអ្នកខ្លះអត់ចេះធ្វើម្ហូបផង និងមិនមានជំនាញផ្នែកចុងភៅផង ក៏បង្កើតហ្វ្រេនឆាយលក់បែបម្ហូបអាហារដែរ ហើយជាប្រភេទអាជីវកម្មភ្លើងចំបើងមួយភ្លែត ប៉ះពាល់ទៅដល់អ្នកទិញហ្វេ្រនឆាយបន្ត»៕

អត្ថបទ៖ ឃួន សុភ័ក្រ