KPT+

៦ ចំណុចធំៗ មនុស្សគួរយកគំរូតាមសត្វឥន្ទ្រី

បានផុស

៣ years មុន

នៅ

ថ្ងៃសុក្រ ៣ មិថុនា ២០២២

ដោយ

ឥន្ទ្រីគឺជាសត្វស្លាបដែលមានលក្ខណៈពិសេស និងឥទ្ធិពលខុសពីសត្វស្លាបដទៃទៀត ដោយសារតែវាអាចផ្ដល់មេរៀនដ៏មានតម្លៃជាច្រើន សម្រាប់មនុស្សលោក។ មេរៀនមួយនៅក្នុងចំណោមមេរៀនទាំងនោះ គឺគោលការណ៍ភាពជាអ្នកដឹកនាំចំនួន ៦ ចំណុច ដែលអ្នកអាចសិក្សាស្វែងយល់នៅខាងក្រោមនេះ៖

១. សត្វឥន្ទ្រីចូលចិត្តហោះហើរម្នាក់ឯង និងនៅរយៈកម្ពស់ខ្ពស់ៗ

សត្វឥន្ទ្រីយ៍ចូលចិត្តហោះហើរម្នាក់ឯង និងខ្ពស់ណាស់។

មេរៀនសម្រាប់រៀនសូត្រ៖ អ្នកគួរនៅឆ្ងាយពីក្រុមមនុស្សដែលមានគំនិតអវិជ្ជមាន ឬចង្អៀតចង្អល់ ដែលអាចអូសទាញទម្លាក់អ្នកឲ្យបរាជ័យដូចពួកគេ។ ឥន្ទ្រីចូលចិត្តហោះហើរជាមួយសត្វឥន្ទ្រី។ មនុស្សជោគជ័យ ចូលចិត្តស្ថិតនៅជាមួយក្រុមមនុស្សជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

២. សត្វឥន្ទ្រីមានចក្ខុវិស័យច្បាស់លាស់

ពួកវាអាចផ្ដោតលើគោលដៅនូវចម្ងាយ ៥គីឡូម៉ែត្រពីវា ហើយមិនរេរាចិត្តឡើយ។

មេរៀនសម្រាប់រៀនសូត្រ៖ អ្នកត្រូវមានចក្ខុវិស័យច្បាស់លាស់ និងវែងឆ្ងាយទោះបីជាមានឧបសគ្គធំ ឬតូច អ្នកត្រូវផ្ដោតអារម្មណ៍យកចិត្តទុកដាក់នឹងគោលដៅរបស់អ្នក។

៣.សត្វឥន្ទ្រីចូលចិត្តស៊ីសាច់ស្រស់ មិនស៊ីសាច់ស្អុយរលួយ

ខុសពីសត្វផ្សេងៗទៀតដូចជាសត្វត្មាត ឥន្ទ្រីចូលចិត្តចាប់សត្វព្រៃថ្មីៗយ៉ាងសកម្ម ហើយស៊ីទាំងស្រស់មិនរលួយ។

មេរៀនសម្រាប់រៀនសូត្រ៖ កុំពឹងផ្អែកលើភាពជោគជ័យពីអតីតកាលរបស់អ្នក អ្នកត្រូវបន្តស្វែងរកឱកាសថ្មីៗ និងយកជ័យជំនះទៅលើឧបសគ្គថ្មីៗ។

៤.សត្វឥន្ទ្រីពេញចិត្តទោះបីជាមានព្យុះមកដល់

ខុសពីសត្វផ្សេងៗទៀតដែលតែងរកទីជម្រក និងកន្លែងសុវត្ថិភាព សត្វឥន្ទ្រីវាពេញចិត្តហោះហើរបង្ហាញមហិទ្ធិឫទ្ធិនៅពេលមានព្យុះបោកបក់ចូលមកដល់។ វាហោះហើរនៅក្នុងរយៈកម្ពស់កាន់តែខ្ពស់ពីលើពពកព្យុះនោះទៅទៀត។

មេរៀនសម្រាប់រៀនសូត្រ៖ អ្នកត្រូវចេះប្រើឧបសគ្គទាំងនោះដើម្បីបង្កើតឱកាសថ្មីៗដែលអាចធ្វើឲ្យអ្នកកាន់តែរឹងមាំ និងទទួលបានជោគជ័យជាងមុន។ អ្វីដែលអ្នកត្រូវធ្វើនៅក្នុងស្ថានភាពបែបនេះ គឺការអត់ធ្មត់ តស៊ូ និងបន្តដំណើរទៅមុខដោយស្នាមញញឹម។

៥.សត្វឥន្ទ្រីត្រៀមខ្លួនជានិច្ចសម្រាប់ការបណ្ដុះបណ្ដាលអភិវឌ្ឍសមត្ថភាព

សត្វឥន្ទ្រីយ៍ចាប់ផ្ដើមកាយសំបុកចេញ ដើម្បីត្រៀមខ្លួនបង្រៀនកូនៗរបស់វាឲ្យចេះហើរ។ ទោះបីជាមិនទាន់អាចហោះហើរបាន វាក៏អាចបង្រៀនកូនៗរបស់វាឲ្យសាកល្បងហោះហើរនៅពេលមានករណីចាំបាច់។

មេរៀនសម្រាប់រៀនសូត្រ៖ អ្នកត្រូវចាកចេញពីតំបន់សុវត្ថិភាពបច្ចុប្បន្នរបស់អ្នក។ អ្នកត្រូវសាកល្បងធ្វើអ្វីថ្មីៗ ដែលអ្នកមិនដែលជួបប្រទះ។ កុំឈរនៅមួយកន្លែង ត្រូវពង្រីកព្រំដែនសមត្ថភាពរបស់អ្នកនោះជីវិតអ្នកនឹងល្អប្រសើរជាងនេះ។

៦.នៅពេលវាអាយុកាន់តែចាស់ សត្វឥន្ទ្រីចាប់ផ្ដើមជម្រុះស្លាប ឬរោមចាស់ៗចោល

ដោយសារកត្តាអាយុ ស្លាបរបស់ឥន្ទ្រីចាប់ផ្ដើមខ្សោយ ហើយមិនបានខ្ពស់ និងលឿនដូចមុនទៀតទេ។ ហេតុដូច្នេះហើយ វាក៏ធ្វើដំណើរទៅកន្លែងឆ្ងាយៗ ហើយនៅទីនោះ វាចាប់ផ្តើមបោចរោម បំបែកចំពុះ និងក្រញាំជាមួយនឹងផ្ទាំងថ្មរហូតដល់ខ្លួនវាទទេស្អាត។ បន្ទាប់មកវាសម្ងំលាក់ខ្លួនរហូតដល់តែវាដុះរោម ចំពុះ និងក្រញាំថ្មី រួចហើយក៏បង្ហាញខ្លួនហោះហើរសាជាថ្មីកាន់តែខ្ពស់ និងលឿនជាងមុន។

មេរៀនសម្រាប់រៀនសូត្រ៖ ពេលខ្លះអ្នកត្រូវជម្រុះចោលទម្លាប់មិនល្អចាស់ៗដែលអាចអូសទាញអ្នកឲ្យបរាជ័យ និងពង្រឹងសមត្ថភាពខ្លួនឯងឲ្យកាន់តែខ្លាំងជាងមុន។ អ្នកជួបភាពបរាជ័យ ការខកចិត្ត អស់សង្ឃឹម ហើយក៏ត្រូវការពេលដើម្បីរៀនសូត្រ ពេលសប្បាយ និងមើលថែខ្លួនឯង ព្រមទាំងមនុស្សដែលអ្នកស្រលាញ់៕

អត្ថបទ៖វារី

ចុចអាន៖ជីវិតជួបតែរឿងស្រស់ស្រាយបាន ប្រសិនបើចេះគិតវិជ្ជមាន

ចុចអាន៖រៀនបានច្រើនយ៉ាងណា បើនៅមានចំណុចទាំងនេះជីវិតពិបាកធានាក្តីសុខណាស់

Related Topics:មេរៀនជីវិត