KPT+

បើឪពុកម្ដាយស្លាប់អស់ តើអាចពិនិត្យ DNA បញ្ជាក់ថាជា កូនបង្កើត បានដូចម្ដេច?

បានផុស

២ years មុន

នៅ

ថ្ងៃពុធ ២១ មិថុនា ២០២៣

ដោយ

ការធ្វើតេស្តរក DNA គឺដើម្បីផ្ទៀងផ្ទាត់ បញ្ជាក់ពីពូជពង្សរបស់បុគ្គល។ ឧទាហរណ៍ ពេលគេចង់ដឹងថាជា ឪពុក និង កូន, ម្តាយ និង កូន, បង និង ប្អូនបង្កើតនឹងគ្នា មែន ឬមិនមែន។ល។ ខណៈពួកគេបានបែកគ្នាតាំងពីក្មេងខ្ចី ដោយប្រការណាមួយ។ បើតាមខ្សែភាពយន្ត ដែលមានការលួចដូរកូនគ្នាតាំងពីទើបនឹងកើតជាដើមនោះ គេក៏ប្រើការធ្វើតេស្ដរក DNA សាច់ញាតិបង្កើតនេះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេជ្ជបណ្ឌិត នៅមជ្ឈមណ្ឌលរោគវិនិច្ឆ័យមួយ នៅភ្នំពេញ សុំមិនបញ្ចេញឈ្មោះ បានឱ្យ “កម្ពុជាថ្មី” ដឹងនៅរសៀលថ្ងៃនេះថា ករណី ឪពុក ឬម្ដាយ និងកូន, បង និងប្អូន នៅមានជីវិត គេអាចធ្វើតេស្ដរក DNA បានតាមវិធី បូមឈាម ឬក៏ពិនិត្យសក់ ដោយការដកសក់ឱ្យដល់ឫសសក់ នោះទើបគេអាចធ្វើ DNA រវាងឪពុក ឬម្ដាយ ជាមួយកូន, បង និងប្អូនបង្កើតបាន។

ប៉ុន្តែករណី ឪពុក ឬម្ដាយ, បង ឬប្អូន បានបាត់បង់ជីវិតទៅហើយនោះ ដើម្បីបញ្ជាក់ភាពជាសាច់ញាតិបង្កើតបាន លោកវេជ្ជបណ្ឌិតខាងលើ បានឱ្យដឹងបន្ថែមថា គឺត្រូវយក ឆ្អឹងរបស់ ឪពុក ឬម្ដាយ, បង ឬប្អូនដែលបានចែកឋាននោះ មកធ្វើតេស្ដរក DNA ផ្គូរផ្គងជាមួយកូន, បង ឬប្អូនដែលនៅរស់ ឬអះអាងថាជាកូន, បង ឬប្អូនបង្កើតនោះ។

គួរបញ្ជាក់ថា DNA មានពាក្យពេញ Deoxyribonucleic acid រឺ អាសុីតដេអុកសុីរីបូនុយក្លេអិច (ADN តាមភាសាបារាំង)។ DNA កើតឡើងពីច្រវ៉ាក់ ២ខ្សែរយ៉ាងវែងវេញគ្នាជារាងរង្វេល (double helix)។ DNA គឺជាម៉ូលេគុលគីមីដែលផ្ទុកនូវប្លង់កំណត់លក្ខណៈរបស់ភាវៈរស់។ ដើម្បីអោយស្រួលយល់ យើងប្រៀបធៀបDNAទៅនឹងសៀវភៅមួយក្បាលដែលផ្ទុកនូវព័ត៌មានអំពី ថាតើខ្លួនរបស់យើងនឹងមានលក្ខណៈរូបរាងខាងក្រៅដូចម្តេច។ យើងមានសក់រួញ រឺសក់ត្រង់ សម្បុរស រឺសម្បុរសណ្តែកបាយជាដើម គឺត្រូវបានកំណត់ដោយDNA។ ព័ត៌មានទាំងនេះ យើងហៅថាព័ត៌មានសេនេទិច៕

អត្ថបទ៖ ច័ន្ទ វីរៈ