ធ្លាប់​ឮ​តែ​ឈ្មោះ​ស្រអែម​លាក់​ខ្លួន ខំ​ពួន​ធ្វើ​ឆ្នាំង ឥឡូវ​ចេញ​ជា​រូបរាង​ហើយ ដើម្បី​ទទួល​ស្វាគមន៍​ភ្ញៀវ​ទេសចរ

សមិទ្ធិផលថ្មីមួយទៀត តាមរយៈអាជ្ញាធរខេត្តកំពង់ឆ្នាំង ក្រសួងសាធារណៈការ និងដឹកជញ្ជូនបាននឹងកំពុងកសាងរូប​សំណាកនារីម្នាក់ គឺស្រអែមលាក់ខ្លួន ដែលធ្លាប់តែពួនធ្វើឆ្នាំងឥឡូវនេះបានចេញមុខមកឈរយ៉ាងស្រស់សង្ហានៅផ្លូវបែកជាបួនស្ថិតក្នុងភូមិខ្វិត ឃុំពង្រ ស្រុករលាប្អៀរ ដើម្បីទទួលស្វាគមន៍ភ្ញៀវទេសចរណ៍ ដែលនេះគឺជាការអភិវឌ្ឍន៍ថ្មីមួយទៀត លើវិស័យគមនាគមន៍ ក្រោមការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជា​​ណាចក្រកម្ពុជា ។

អាជ្ញាធរខេត្តកំពង់ឆ្នាំងបានបញ្ជាក់ឲ្យដឹងថា នារីស្រស់ស្រអែមដែលកំពុងឈរធ្វើឆ្នាំងនេះ គឺជាអត្តសញ្ញាណរបស់ខេត្តកំពង់ឆ្នាំង ដែលប្រជាកសិករភាគច្រើននៅក្នុងស្រុករលាប្អៀរ បានប្រកបមុខរបរធ្វើក្អម ឆ្នាំង ដែលជាការអភិរក្សស្នាដៃ​មរតបស់ដូនតាខ្មែរ ទុកឲ្យកូនចៅជំនាន់ក្រោយប្រកបមុខរបរនេះ ផ្គត់ផ្គង់ជីវភាពរស់នៅប្រចាំថ្ងៃ ។

រូបសំណាកនារីធ្វើឆ្នាំងខាងលើនេះ បានកសាងឡើងនៅចំណុចផ្លូវបំបែកជាបួន ជាប់ផ្លូវចូលទៅព្រលានយន្តហោះឃុំពង្រ ដែលកំពុងកសាងបានប្រមាណ៧៥ភាគរយហើយ ។ ចំណែកផ្លូវថ្មីខាងលិចប៉ែកខាងត្បូងនៃរូបសំណាកនេះ គឺជាផ្លូវថ្មីមួយខ្សែទៀត មានប្រវែងប្រមាណជាង១០គីឡូម៉ែត្រ ដែលប្រមុខរាជរដ្ឋាភិបាល កំពុងឲ្យក្រសួងសាធារណការកសាងផ្លូវវាងមួយខ្សែបែកចេញពីចំណុចរូបសំណាកនេះ ទៅកាន់ចំណុចប្រសព្វផ្លូវចូលវត្តបាញ់ឆ្គោល ស្ថិតឃុំជ្រៃបាក់ស្រុករលាប្អៀរ ដើម្បីធ្វើចរាចរណ៍វៀងទីក្រុងកំពង់ឆ្នាំង បញ្ចៀសការធ្វើចរាចរណ៍កុំឲ្យកកស្ទះ ក្នុងពេលផ្លូវជាតិលេខ​៥​កសាងរួចរាល់ជាស្ថាពរនៅក្នុងឆ្នាំខាងមុខនេះ។

ដោយឡែកនៅផ្លូវប្រសព្វមុខផ្លូវចូលវត្តបាញ់ឆ្គោលខាងលើនេះ តាមរយៈអាជ្ញាធរខេត្ត ក្រសួងសាធារណៈការក៏បានកសាងរូបសំណាកឆ្នាំងមាសដ៏ធំមួយផងដែរ ដើម្បីជានិមិត្តបញ្ជាក់ថា មកដល់ចំណុចនេះ គឺជាទឹកដីនៃរឿងព្រេងពីបូរាណ គឺរិទ្ធិសែន នាងកង្រី ទឹកដីខេត្តកំពង់ឆ្នាំង ។

សមិទ្ធិផលថ្មីខាងលើនេះ បានបញ្ជាក់ឱ្យដឹងថា ក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា បានធ្វើឱ្យប្រទេសជាតិមានសុខសន្តិភាពពេញលេញ និងកំពុងមានការអភិវឌ្ឍលើគ្រប់វិស័យ ដែលធ្វើឱ្យគ្រប់បណ្ដាខេត្ត និងទីជនបទនានា ប្រែប្រួលមុខមាត់ថ្មីគួរជាទីមោទនៈ ។

ប្រជាពលរដ្ឋរស់នៅក្នុងខេត្តកំពង់ឆ្នាំង សូមស្វាគមន៍យ៉ាងកក់ក្តៅចំពោះការដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា ជាពិសេសក្នុងដំណាក់កាលទប់ស្កាត់ការរីករាលដាលជំងឺកូវីដ១៩ ក្នុងពេលបច្ចុប្បន្ននេះ ។ ប្រជាពលរដ្ឋទាំងអស់សូមប្ដេជ្ញាអនុវត្តឲ្យបាន នូវវិធានការរបស់ក្រសួងសុខាភិបាល និងអនុសាសន៍ដ៏ថ្លៃថ្លារបស់រាជរដ្ឋាភិបាល គឺ ៣កុំ ៣ការពារ ដើម្បីរួមគ្នាទប់ស្កាត់ជំងឺកូវី១៩ កុំឲ្យរាលដាលចូលក្នុងសហគមន៍៕

អត្ថបទ ៖ ឈៀងថារិទ្ធ