សម្ដេចតេជោប្រាប់សកម្មជននយោបាយនៅក្រៅប្រទេសពីភាពរីកចម្រើនរបស់កម្ពុជា  

នាព្រឹកថ្ងៃទី២០ ខែតុលា ឆ្នាំ២០២៥ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ជួបសំណេះសំណាលជាមួយក្រុមការងារគណបក្សប្រជាជនកម្ពុជាប្រចាំរដ្ឋអូរីហ្គិន ដឹកនាំដោយលោក សេង សំអុន ប្រធានគណៈកម្មាធិការសាខាបក្សប្រចាំរដ្ឋអូរីហ្គិន និងក្រុមការងារលោក ម៉ក់ ហឺន។

តាមការឱ្យដឹងពីលោក ជា ធីរិទ្ធ អ្នកនាំពាក្យគណបក្សប្រជាជនកម្ពុជា បានឱ្យដឹងថា នៅក្នុងពិធីសំណេះសំណាលនោះ សម្តេចតេជោ ហ៊ុន សែន បានសម្តែងនូវការស្វាគមន៍ដែលបានជួបជាមួយក្រុមការងារគណបក្សប្រជាជនកម្ពុជានៅក្រៅប្រទេសនាឱកាសនេះ។ សម្តេចតេជោ បានចែករំលែកអំពីទិដ្ឋភាពទូទៅពីស្ថានភាពរបស់កម្ពុជាពីអតីតកាល ជាពិសេសប្រវត្តិសាស្ត្រនៃពលិកម្មរបស់សម្តេចក្នុងការតស៊ូរំដោះប្រទេសជាតិចេញពីរបបប្រល័យពូជសាសន៍ និងការដឹកនាំរបស់សម្តេចពេលនៅជានាយករដ្ឋមន្ត្រី។

សម្តេចតេជោប្រធានគណបក្សក៏បានបង្ហាញអំពីដំណើរការអភិវឌ្ឍរបស់ប្រទេសជាតិនាពេលបច្ចុប្បន្ន ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលកំពុងដឹកនាំប្រទេសយ៉ាងស្វាហាប់ និងបន្តការខិតខំប្រឹងប្រែងអភិវឌ្ឍប្រទេសជាតិឱ្យមានការរីកចម្រើនជាបន្តបន្ទាប់។

សម្តេចតេជោក៏បានលើកឡើងអំពីស្ថានភាពបញ្ហាព្រំដែនកម្ពុជា-ថៃ ដែលរាជរដ្ឋាភិបាលកំពុងតែខិតខំប្រឹងប្រែងក្នុងការដោះស្រាយបញ្ហាជាបន្តបន្ទាប់ ដើម្បីធ្វើយ៉ាងណាឱ្យបានវិលទៅរកភាពប្រក្រតីឡើងវិញ។ បន្ថែមពីនេះ សម្តេចតេជោក៏បានលើកឡើងអំពីស្ថានភាពនយោបាយមួយចំនួនទៀតដល់សកម្មជនរបស់គណបក្សប្រជាជនកម្ពុជា ក្នុងគោលដៅបានឈ្វេងយល់ និងស្ថានភាពពិតរបស់កម្ពុជា ជាពិសេសសម្រាប់សកម្មជននៅក្រៅប្រទេសបានដឹង និងបានឃើញពីការអភិវឌ្ឍរីកចម្រើនរបស់ប្រទេសកម្ពុជានាពេលបច្ចុប្បន្ននេះ៕