ព័ត៌មានជាតិ

រដ្ឋបាលសង្កាត់អូរបែកក្អម ប្រកាសដាក់ឲ្យប្រើប្រាស់គម្រោងសាងសង់ប្រព័ន្ធលូរំដោះទឹកថ្មី ប្រវែងជាង ៧០០ ម៉ែត្រ ដើម្បីដោះស្រាយបញ្ហាទឹកជំនន់

បានផុស

៨ ខែ មុន

នៅ

ថ្ងៃសុក្រ ២៤ តុលា ២០២៥

ដោយ

កាលពីព្រឹកថ្ងៃទី ២៤ ខែតុលា ឆ្នាំ ២០២៥ នេះ រដ្ឋបាលសង្កាត់អូរបែកក្អម បានប្រារព្ធពិធីប្រកាសដាក់ឲ្យប្រើប្រាស់ជាផ្លូវការនូវគម្រោងសាងសង់ និងជួសជុលប្រព័ន្ធលូរំដោះទឹក ប្រវែងសរុប ៧០៩ ម៉ែត្រ ដែលមានអង្កត់ផ្ចិត ០.៦ ម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងនេះ ត្រូវបានអនុវត្តក្នុងភូមិទ្រុងមាន់ និងភូមិត្រពាំងឈូក មានគោលបំណងដ៏សំខាន់ក្នុងការដោះស្រាយបញ្ហារំដោះទឹកដែលធ្លាប់បង្កផលលំបាកដល់ការរស់នៅ និងការធ្វើដំណើររបស់ប្រជាពលរដ្ឋនៅតាមបណ្ដាផ្លូវក្នុងមូលដ្ឋាន។

លោក ធាម ច័ន្ទសេរីវុឌ្ឍ ប្រធានការិយាល័យសាធារណការ ខណ្ឌសែនសុខ បានឲ្យដឹងថា គម្រោងនេះរួមមានការសាងសង់ប្រអប់រំដោះទឹកចំនួន ៣៥ កន្លែង ដោយប្រើលូអង្កត់ផ្ចិត ០.៥ ម៉ែត្រ ចំណែកប្រអប់នីមួយៗ មានបណ្តុះខ្នែងចំនួន ៥ កង់។ ការងាររួមមានការវាយបំបែកបេតុងចាស់ទំហំ ៨៥៨ ម៉ែត្រការ៉េ និងការចាក់បេតុងថ្មី (សមាមាត្រ ១:២:៣) កម្រាស់ ១២ សង់ទីម៉ែត្រ លើគន្លងលូចំនួន ៧,៩៦ ម៉ែត្រការ៉េ រួមជាមួយការដំឡើងស្លាកសញ្ញាគម្រោងមួយកន្លែងផងដែរ។

លោកចៅសង្កាត់ យឹម រ័ត្ន បានឲ្យដឹងដែរថា គម្រោងនេះជាចម្លើយដ៏ចាំបាច់បំផុតសម្រាប់ដោះស្រាយបញ្ហាទឹកជំនន់ និងការរំដោះទឹកក្នុងសង្កាត់ ដែលធ្លាប់បង្កភាពលំបាកដល់ជីវភាពប្រចាំថ្ងៃរបស់ប្រជាពលរដ្ឋ។ ទន្ទឹមនេះ លោកបានអំពាវនាវឲ្យប្រជាពលរដ្ឋទាំងអស់ សូមចូលរួមថែរក្សាសមិទ្ធផលសាធារណៈនេះ ដោយមិនគួរបោះសំរាម ឬធាតុអាចបង្កការរាំងស្ទះចូលក្នុងប្រព័ន្ធលូឡើយ។

លោកបានបន្តថា ការថែរក្សាឲ្យប្រព័ន្ធលូដំណើរការបានល្អ នឹងជួយធានាឲ្យមាននិរន្តរភាព នៃការរំដោះទឹក និងលើកស្ទួយគុណភាពជីវភាពរស់នៅរបស់ប្រជាពលរដ្ឋក្នុងសង្កាត់អូរបែកក្អម ឲ្យកាន់តែល្អប្រសើរឡើង។

គួរជម្រាបថា ពិធីប្រកាសដាក់ឲ្យប្រើប្រាស់ជាផ្លូវការនូវគម្រោងសាងសង់ និងជួសជុលប្រព័ន្ធលូរំដោះទឹក នេះ ក្រោមអធិបតីភាព លោក យឹម រ័ត្ន ចៅសង្កាត់អូរបែកក្អម ដោយមានការចូលរួមពីប្រធានការិយាល័យសាធារណការខណ្ឌសែនសុខ សមាជិកក្រុមប្រឹក្សាសង្កាត់ ស្មៀនសង្កាត់ លោកមេភូមិ និងប្រជាពលរដ្ឋជាច្រើនរូប។ បរិយាកាសពិធីពោរពេញដោយអំណរ និងទឹកចិត្តសប្បាយរីករាយរបស់ប្រជាពលរដ្ឋដែលរង់ចាំការផ្លាស់ប្ដូរនេះយ៉ាងយូរ៕

អត្ថបទ ៖ សំណាង