អាជីវករ​តាម​គោលដៅទេសចរណ៍ក្នុង​ខេត្តបាត់ដំបង​​អះអាង​​ ឆ្នាំនេះ​លក់ដាច់ច្រើនក្នុង​ថ្ងៃ​អុំទូក

អាជីវករតាមគោលដៅទេសចរណ៍​នានាក្នុងខេត្តបាត់ដំបង​បានលើកឡើងថា រយះពេល ៣ ថ្ងៃនៃពិធីបុណ្យអុំទូក​ សកម្មភាព​​​លក់ដូរមានភាពមមាញឹក ហើយ​ចំណូលក៏​រក​បាន​ច្រើន​គួរសម ទាំង​ការ​លក់​នំចំណី និងម្ហូបអាហារ រួមវត្ថុអនុស្សាវរីយ៍ផ្សេងៗ​ជូន​ភ្ញៀវទេសចរ​ដើរ​កម្សាន្ត។

អ្នកស្រី ចាន់ នី រស់នៅក្នុងសង្កាត់រតន: ក្រុងបាត់ដំបង បានឲ្យដឹងថា ក្នុង​រយះពេល ៣ ថ្ងៃនៃពិធី​បុណ្យអុំទូក អ្នកស្រីលក់គ្រឿង​ម្ជូរ​មាន​កន្ទួត​ត្រាំ ស្វាយត្រាំ និងផ្លែពុទ្រាខ្លះ ដែលអាច​រក​ចំណូលបានពី ៥ ដល់ ៧ មុឺនរៀលក្នុង​មួយ​ថ្ងៃ​។

ដោយសារឃើញ​លក់ដាច់ច្រើន អ្នកស្រី ចាន់ នី ក៏បានបង្កើនម៉ោង​លក់រហូតដល់ម៉ោង ៩ យប់ ហើយ​អាចរកចំណូលបានរហូតដល់ ១០ មុឺនរៀលជាង ព្រោះមានភ្ញៀវដើរកម្សាន្តកុះករ។

សម្រាប់អ្នកស្រី ចាន់ នី “តាមពិតខ្ញុំមិនមែនជាអាជីវករលក់ដូរអីទេ តែឆ្នាំនេះខ្ញុំឃើញមានភ្ញៀវមកលេងច្រើន ក៏បង្កើនការលក់រហូតដល់ម៉ោង ៩ យប់ ខណះរាល់ឆ្នាំខ្ញុំលក់តិចតួចត្រឹមតែម៉ោង ៥ ល្ងាចប៉ុណ្ណោះ”។

លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង​បាន​ប្រាប់​ថា ឆ្នាំនេះអាជីវករទាំងក្នុងក្រុងនិងតាមបណ្តាគោលដៅទេសចរណ៍​ក្នុង​ខេត្ត​ អាចរកចំណូលបានច្រើនគួរសមបើធៀបឆ្នាំកន្លងទៅ។ នេះបើតាមការសង្កេតរបស់លោក និងក្រុមការងារចុះពិនិត្យតាមគោលដៅ​ទេសចរណ៍​នានា។

ឆ្នាំនេះរដ្ឋបាលខេត្តក៏ដូចជាមន្ទីរពាក់ព័ន្ធ បានរៀបចំទីតាំងកម្សាន្ត​ដល់ភ្ញៀវទេសចរច្រើន​ទម្រង់ រួមទាំងការ​បង្ហាញពីទស្សនីយភាព​សិល្ប:ផង ខណះតាមទីអារាមក៏មានភ្ញៀវបរទេសចូលទស្សនាកម្សាន្តច្រើន ដើម្បីស្វែងយល់ពីទំនៀមទម្លាប់​ប្រពៃណីរបស់ខ្មែរ។

លោកបន្តថា គោលដៅទេសចរណ៍តាមបណ្តាស្រុកមួយចំនួនក្នុង​ខេត្ត​ដែល​មានភ្ញៀវទៅលេងកម្សាន្តច្រើន​ ក្នុងនោះ​ក្នុងស្រុកបាណន់ ដែលមានតំបន់ទេសចរណ៍ចំនួន ៤ កំពុងមានសក្តានុពលខ្លាំង ស្រូបទាញភ្ញៀវទេសចរ​មកលេងច្រើន​កុះករ​ជាងគេ ដែលចាត់ទុកថាជាប៉ូលទេសចរណ៍ដ៏មានសក្តានុពលនៅក្នុងខេត្តបាត់ដំបង ដែលបានរួមចំណែកធ្វើឲ្យមានកំណើនសេដ្ឋកិច្ចដល់ប្រជាពលរដ្ឋនៅទីនោះ ខណះឆ្នាំនេះអាកាសធាតុមានអំណោយផលល្អ ហើយផ្នែកសន្តិសុខសុវត្ថិភាព ចាប់ពីក្នុងក្រុងរហូតដល់តាមគោលដៅជនបទ ក៏មានការគ្រប់គ្រងនិងយកចិត្តទុកដាក់ពីអាជ្ញាធរ​ខេត្តផងដែរ។

លោក ស្រេង សុខា អភិបាលស្រុកបាណន់បានឲ្យដឹងថា ឃុំទាំង ០៨ ក្នុង​ស្រុកបាណន់ សុទ្ធតែមានតំបន់ទេសចរណ៍ទាំងអស់ ក្នុងនោះមានតំបន់ទេសចរណ៍ ៤ ដែលមានសក្តានុពលលេចធ្លោខ្លាំងជាងគេ គឺរមណីយដ្ឋានភ្នំបាណន់ ឡូរីជើងភ្នំបាណន់ ស្ពានយោលចង្អូរថ្ម និងភ្នំសំពៅ។

បើផ្អែកលើរបាយការណ៍ស្ថិតិទេសចរណ៍ លោក ហម អរុណ បានបង្ហាញឲ្យដឹងថា ក្នុងឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក ក្នុងខេត្តបាត់ដំបង រយៈពេល ៣ ថ្ងៃ ទទួលបាន​ភ្ញៀវទេសចរ​សរុប ១២៣ ៩៥៥នាក់ កើនឡើង ១២.១៩% បើ​ធៀបឆ្នាំ ២០២៤៕

អត្ថបទ÷សៅ សារិទ្ធ