ទេសរដ្ឋមន្ត្រីកម្ពុជាថាប្រាសាទបុរាណខ្មែរសម្បត្តិបេតិកភណ្ឌពិភពលោកកំពុងរងការឈឺចាប់ត្រូវការUNESCOសង្រ្គោះចេញពីទង្វើយោធាថៃឈ្លានពានជាបន្ទាន់

ទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា រិះគន់ថា មេដឹកនាំUNESCO បច្ចុប្បន្ន គ្មានបេះដូងស្រឡាញ់ប្រាសាទបុរាណសម្បត្តិបេតិកភណ្ឌវប្បធម៌ពិភពលោក  សុខចិត្តស្ងៀមស្ងាត់ បិទភ្នែក បិទមាត់បណ្ដោយឱ្យយោធាថៃបំផ្លិចបំផ្លាញម្ដងហើយម្ដងទៀត ដោយមិនចេញមុខទប់ស្កាត់ ឬថ្កោលទោសឡើយ។ លោកថា ប្រាសាទបុរាណខ្មែរជាសម្បត្តិបេតិកភណ្ឌពិភពលោក កំពុងឈឺចាប់ត្រូវការយូណេស្កូសង្គ្រោះចេញពីទង្វើយោធាថៃឈ្លានពាន បាញ់កម្ទេចជាបន្ទាន់។ លោក រិះគន់ដូច្នេះ តាមរយៈបណ្ដាញសង្គមហ្វេសប៊ុកផ្លូវការ នាព្រឹកថ្ងៃទី១១ ខែធ្នូ ក្រោយយោធាថៃកម្ទេចប្រាសាទព្រះវិហាម្ដងហើយម្ដងទៀត និងថែមទាំងកម្ទេចប្រាសាទតាក្របីកាលពីថ្ងៃទី៩ ខែធ្នូ។

លោក កែវ រ៉េមី ក៏ប្រៀបធៀបមេដឹកនាំUNESCOបច្ចុប្បន្ន និងមុនៗថា មេដឹកនាំUNESCOពីមុន មានបេះដូងស្រឡាញ់ឱ្យតម្លៃលើប្រាសាទបុរាណទៅលើសម្បត្តិបេតិកភណ្ឌជាតិ និងពិភពលោកណាស់ ពោលពេលប្រទេសសមាជិកផ្ទុះសង្គ្រាមផ្ទៃក្នុង ឬសង្គ្រាមរដ្ឋ និងរដ្ឋ UNESCO តែងតែចេញសេចក្តីថ្លែងការណ៍ការពារ ទប់ស្កាត់កុំឱ្យការផ្ទុះអាវុធនោះ ប៉ះពាល់ ឬបំផ្លាញដល់សម្បត្តិវប្បធម៌មនុស្សជាតិ។

ទេសរដ្ឋមន្ត្រី កែវ រ៉េមី រិះគន់ធ្ងន់ៗចំពោះមេដឹកនាំUNESCOបច្ចុប្បន្នថា៖«តែឥឡូវទាហានថៃបានដៃបំផ្លិចបំផ្លាញនូវសម្បត្តិបេតិកភណ្ឌពិភពលោកតាំងពីដំណាក់កាលឈ្លានពានលើកទីមួយរហូតដល់ពេលនេះ ក៏គ្មានអ្នកជំនាញណា ឬអ្នកទទួលខុសត្រូវនៅក្នុងស្ថាប័នអន្តរជាតិណាបានចេញមុខទប់ស្កាត់ ឬថ្កោលទោសរាល់ការបំផ្លិចបំផ្លាញរបស់ទាហានថៃ។ ផ្ទាំងថ្មទាំងឡាយដែលជាស្នាដៃនែបុព្វបុរសខ្មែរបាននិងកំពុងស្រែកការឈឺចាប់ដង្ហោយហៅអ្នកជួយសង្រ្គោះចេញពីពួកទមិឡឈ្លានពានដែលជាសត្រូវប្រវត្តិសាស្ត្រ។ »។  

ក្រសួងវប្បធម៌កម្ពុជា អះអាងថាចាប់តាំងពីប្រាសាទព្រះវិហារត្រូវបានចុះក្នុងបញ្ជីបេតិកភណ្ឌពិភពលោកនៅថ្ងៃទី៧ ខែកក្កដា ឆ្នាំ២០០៨ ថៃបានបង្កើតលេស និងបង្កជម្លោះប្រដាប់អាវុធនៅតំបន់ប្រាសាទព្រះវិហារជាច្រើនលើកច្រើនសារនៅចន្លោះឆ្នាំ២០០៨ និង ឆ្នាំ២០១១ ព្រមទាំងបានបង្កជម្លោះសារជាថ្មីនៅថ្ងៃទី២៤-២៨ ខែកក្កដា ឆ្នាំ២០២៥។ ក្នុងការឈ្លានពាននៅចុងខែកក្កដា យោធាថៃបានប្រើសព្វាវុធធុនធ្ងន់ F-16 បំផ្លិចបំផ្លាញហេដ្ឋារចនាសម្ព័ន្ធប្រាសាទព្រះវិហារជា​ការ​បំពាន​យ៉ាង​ធ្ងន់ធ្ងរ​លើ​អនុសញ្ញា​ទីក្រុង​ឡាអេ​ឆ្នាំ​១៩៥៤ ស្ដីពី​កិច្ច​ការ​ពារ​សម្បត្តិវប្បធម៌នៅ​ក្នុង​ព្រឹត្តិ​ការណ៍​នៃ​ជម្លោះ​ប្រដាប់​អាវុធ និង​អនុសញ្ញាអង្គការ​យូណេស្គូ​ឆ្នាំ១៩៧២ ស្ដីពីការ​ការពារ​បេរិកភណ្ឌ​វប្បធម៌ និង​ធម្មជាតិ​ពិភព​លោក​ដែល​ប្រទេស​ថៃ​ជារដ្ឋសមាជិកផងដែរ។

ម្ដងហើយម្ដងទៀត នៅថ្ងៃទី៨ ខែធ្នូ យោធាថៃបានបំផ្លាញអគារអភិរក្សរបស់គម្រោងអភិរក្ស និងជួសជុលគោបុរៈទី៥ ប្រាសាទព្រះវិហារ ក្រោមកិច្ចសហប្រតិបត្តិការកម្ពុជា-ឥណ្ឌា ដែលស្ថិតនៅបរិវេណគោបុរៈទី៥ និង ហេដ្ឋារចនាសម្ព័ន្ធអភិរក្សដទៃទៀត និងបានបំផ្លាញដងស្ទូចសម្រាប់ប្រើប្រាស់លើការងារអភិរក្សប្រាសាទ។

នៅថ្ងៃទី៩ ខែធ្នូ យោធាថៃបានបើកការបាញ់ប្រហារកម្ទេចប្រាសាទតាក្របីរបស់កម្ពុជា បណ្ដាលឱ្យខូចខាតធ្ងន់ធ្ងរនៅផ្នែកកំពូល និងហេដ្ឋារចនាសម្ព័ន្ធដទៃទៀត នៃប្រាសាទតាក្របី ដែលជាទីគោរពសក្ការៈបូជារបស់កម្ពុជា។ ក្រសួងវប្បធម៌ចាត់ទុកទង្វើនេះថាជាទង្វើដ៏សាហាវ អសីលធម៌ ប្រមាថមាក់ងាយដល់វប្បធម៌ អរិយធម៌ និងជាទីសក្ការៈបូជាដែលជាមរតកមនុស្សជាតិ ពិសេសវប្បធម៌ដែលដូនតាខ្មែរបានកសាងបន្សល់ទុកមានតម្លៃមិនអាចកាត់ថ្លៃបាន។

ក្រសួងវប្បធម៌កម្ពុជា​ទាមទារឱ្យអន្តរជាតិ ជាពិសេសអង្គការយូណេស្កូ អាស៊ាន បុគ្គលដែលស្រឡាញ់ការពារបេតិកភណ្ឌវប្បធម៌ ថ្កោលទោស និងជំរុញឱ្យថៃបញ្ឈប់ជាបន្ទាន់នូវសកម្មភាពបំផ្លិចបំផ្លាញនេះ៕

ដោយ៖ ង៉ិល ណារ៉ាត់