ខេត្តក្រចេះមានរោងចក្រផលិតស្ករអំពៅ ផលិតផ្គត់ផ្គង់តម្រូវការ​ក្នុងស្រុក និងនាំ​ចេញទៅ​បរទេស​

រោងចក្រផលិតស្ករអំពៅក្នុង​ខេត្ត​ក្រចេះ កំពុង​ដំណើការខ្សែ​សង្វាក់ផលិតកម្ម​ផលិតស្ករអំពៅ ដើម្បី​ផ្គត់ផ្គង់ទីផ្សារក្នុងស្រុក​ និង​នាំចេញទៅក្រៅប្រទេស។

រោងចក្រផលិតស្ករអំពៅដែលកំពុងដំណើរការនេះ មានទីតាំងស្ថិតនៅក្នុងឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ។

បើតាមប្រភពពី​ក្រុមហ៊ុន អិនខេ អេហ្គ្រី (ខេមបូឌា) លីមីធីត និងក្រុមហ៊ុនកាម៉ាដេនូ វេនឈរ (ខេមបូឌា) លីមីធីត ដែលចាប់ដៃគ្នា​វិនិយោគ​ដាំដុះដំណាំ​អំពៅ និង​​រោងចក្រ​ផលិតស្ករស​បាន​ឲ្យដឹង​ថា គិតត្រឹមដើមខែធ្នូ ឆ្នាំ២០២៥ ក្រុមហ៊ុន​បានដាំដុះអំពៅ​លើផ្ទៃដី​សរុបចំនួន ៦ ៧០០ ហិកតា នៅ​ក្នុងឃុំចំនួន ៥ គឺឃុំសណ្ដាន់ ឃុំសំបូរ ឃុំកោះខ្ញែរ នៃស្រុកសំបូរ និង ឃុំក្បាលដំរី ឃុំ​អូរគ្រៀង នៃស្រុកអូរគ្រៀងសែនជ័យ ខេត្តក្រចេះ។

បច្ចុប្បន្ន ក្រុមហ៊ុនកំពុងដំណើរការប្រមូលផលដំណាំអំពៅលើផ្ទៃដីសរុបចំនួន ៥ ០០០ហិកតា។ ក្នុងដំណើរការសង្វាក់ផលិតកម្មក្នុងរោងចក្រ បាន​ស្រូបកម្លាំងពលកម្មសរុបចំនួន ២ ៣៥០ នាក់​ទាំង​កម្មករអចិន្ត្រៃយ៍ និងកម្មករបណ្តែត៕

អត្ថបទ៖ ប្រុញ វិធិន