រដ្ឋបាលខណ្ឌ៧មករា បន្តចុះរៀបចំសណ្តាប់ធ្នាប់លើផ្លូវ ១៥៦ ដើម្បីរក្សាសណ្តាប់ធ្នាប់

អាជ្ញាធរខណ្ឌ៧មករា បន្តអនុវត្តន៍ លើការរៀបចំសណ្តាប់ធ្នាប់ និង ណែនាំដល់ម្ចាស់យានដ្ឋានជួសជុលរថយន្ត និង សាលារៀនឯកជន នៅលើកំណាត់ផ្លូវលេខ១៥៦ ដើម្បីចូលរួមរក្សាសណ្តាប់ធ្នាប់សាធារណៈដងផ្លូវ។

ការចុះរៀបចំសណ្ដាប់ធ្នាប់នេះដែរបានធ្វើឡើងកាលពីវេលាម៉ោង ១១ព្រឹកថ្ងៃទី២ ខែមីនា ឆ្នាំ២០២៦ នៅចំណុចកំណាត់ផ្លូវលេខ ១៥៦ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

ក្នុងនោះផងដែរ លោក ណុប ផា អភិបាលរងខណ្ឌ បានអោយដឹងថា ដោយអនុវត្តន៍តាមការណែនាំ ពី លោក ថេង សុថុល អភិបាលនៃគណៈអភិបាលខណ្ឌ៧មករា លើការចុះត្រួតពិនិត្យ នឹងរៀបចំសណ្តាប់ធ្នាប់ ចំពោះទីតាំង ដែលប្រកបអាជីវកម្ម លើចិញ្ចើមផ្លូវ អោយមានរបៀបរៀបរយឡើងវិញ ដើម្បីសោភ័ណ្ឌភាព បរិស្ថានស្អាត។

អភិបាលរងខណ្ឌ៧មករា បានបន្តទៀតថាបានណែនាំដល់អ្នកគ្រប់គ្រង សាលារៀនឯកជន និង ទីតាំងជួសជុល រថយន្ត ត្រូវបន្តការចូលរួម រក្សាសណ្ដាប់ធ្នាប់ កុំយកផ្លូវធ្វើជាចំណត បង្កឲ្យមានការកកស្ទះ និងត្រូវរក្សាសម្រាប់ អ្នកធ្វើដំណើរ ៕ អត្ថបទ ៖ រដ្ឋា