កម្ពុជាបញ្ជាក់ប្រាប់អាម៉េរិកពីការប្ដេជ្ញាចិត្តក្នុងការដោះស្រាយបញ្ហា Online Scam

កម្ពុជាបញ្ជាក់ជាថ្មីទៅកាន់សហរដ្ឋអាម៉េរិកពីការប្ដេជ្ញាចិត្តរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាឆបោកតាមប្រព័ន្ធបច្ចេកវិទ្យា (Online Scam) ដែលកំពុងក្លាយជាកង្វល់រួមរបស់សកលលោក។ ការបញ្ជាក់បែបនេះបានធ្វើឡើងដោយឧបនាយករដ្ឋមន្ត្រីប្រចាំការ វង្សី វិស្សុត ក្នុងជំនួបពិភាក្សាការងារជាមួយលោកស្រី Bridgette Walker ភារធារីស្តីទីនៃស្ថានទូតសហរដ្ឋអាម៉េរិកប្រចាំកម្ពុជា កាលពីទី៣ ខែមីនា ឆ្នាំ២០២៦។  

លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លើកឡើងថា បញ្ហា Online Scam គឺជាកិច្ចការអាទិភាពរបស់រាជរដ្ឋាភិបាលកម្ពុជា ដោយលោក សង្កត់ធ្ងន់ថា រាជរដ្ឋាភិបាលកម្ពុជាបានកំពុងខិតខំយ៉ាងខ្លាំងក្លាក្នុងការបង្ក្រាបសកម្មភាព Online Scam ខណៈបញ្ហានេះមិនមានប្រយោជន៍ដល់សេដ្ឋកិច្ចជាតិឡើយ។

តាមការបញ្ជាក់របស់លោក វង្សី វិស្សុត Online Scam បានបង្កផលប៉ះពាល់អវិជ្ជមានជាច្រើនដល់ការវិនិយោគរបស់បរទេស ទេសចរអន្តរជាតិ និងជាពិសេសធ្វើឱ្យខូចកេរ្តិ៍ឈ្មោះរបស់ប្រទេស។

តែយ៉ាងណា មន្ត្រីជាន់ខ្ពស់កម្ពុជាខាងលើ ថា បញ្ហា Online Scam មិនមែនជាបញ្ហារបស់កម្ពុជាតែឯងនោះទេ ក៏ប៉ុន្តែជាបញ្ហារួមរបស់តំបន់ និងសកលលោក ដោយសារបញ្ហានេះត្រូវបានទទួលស្គាល់ថា ជាឧក្រិដ្ឋកម្មឆ្លងដែន និងមានភាពស្មុគស្មាញ ជាប្រព័ន្ធដែលតភ្ជាប់ជាខ្សែច្រវ៉ាក់ពីប្រទេសមួយទៅប្រទេសមួយទៀត។

សម្រាប់រាជរដ្ឋាភិបាលកម្ពុជា លោក បានអះអាងពីការប្តេជ្ញាចិត្តយ៉ាងមុតមាំ ក្នុងការដោះស្រាយបញ្ហានេះ តាមរយៈគោលការណ៍ «បង្ការ បង្ក្រាប អប់រំ និងការពង្រឹងភាពជាដៃគូនិងកិច្ចសហប្រតិបត្តិការអន្តរជាតិ»។

លោកស្រី Bridgette Walker បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានភាពប្រាកដនិយមចំពោះការដោះស្រាយលើបទល្មើសឆបោកតាមប្រព័ន្ធបច្ចេកវិទ្យានេះ។

លោកស្រី បានបង្ហាញទស្សនវិជ្ជមាន និងមានភាពជឿជាក់យ៉ាងមុតមាំ ក្នុងការពង្រឹងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ កម្ពុជា-សហរដ្ឋអាម៉េរិក ជាពិសេសការបង្ក្រាប Online Scam នេះតែម្ដង ជាមួយនឹងការពង្រឹងនូវទំនាក់ទំនងក្នុងវិស័យយោធា ការទូត សង្គមកិច្ច ពាណិជកម្ម និងសន្តិសុខ៕

ដោយ៖ ធឿន វ៉ាន់សុង