ព័ត៌មានជាតិ

ស្ថានីយប្រេងនៅរាជធានីភ្នំពេញ មានជាង ៤០០ កន្លែង ផ្អាកអាជីវកម្មជិត ៥០ កន្លែង ខណៈសង្គ្រាមរវាងអ៊ីរ៉ង់ និងអ៊ីស្រាអែល រួមជាមួយអាមេរិក

បានផុស

៤ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

ស្ថានីយប្រេងនៅរាជធានីភ្នំពេញ មានចំនួនជាង ៤០០ កន្លែង ហើយ ខណៈតម្លៃប្រេងបានឡើងថ្លៃ ដោយសារសង្គ្រាមរវាងអ៊ីរ៉ង់ និងអ៊ីស្រាអែល រួមជាមួយអាមេរិក មានស្ថានីយប្រេងប្រមាណជិត ៥០ កន្លែង ត្រូវបានផ្អាកអាជីវកម្ម តែមិនបង្កឲ្យមានចលាចលក្នុងសង្គមឡើយ។ នេះបើតាមការបញ្ជាក់ឲ្យដឹងក្នុងកិច្ចប្រជុំសាមញ្ញលើកទី ២២ របស់ក្រុមប្រឹក្សារាជធានីភ្នំពេញ អាណត្តិទី ៤ កាលពីព្រឹកថ្ងៃទី ១២ ខែមីនា ឆ្នាំ ២០២៦ នេះ ក្រោមវត្តមាន លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និង លោក ហួត ហៃ អភិបាលរងតំណាង លោក ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ងី ប៊ុនលី ប្រធានមន្ទីររ៉ែ និងថាមពលរាជធានីភ្នំពេញ បានឲ្យដឹងថា នៅរាជធានីភ្នំពេញមានស្ថានីយប្រេងឥន្ធនៈចំនួនជាង ៤៤៧ កន្លែង ហើយ ខណៈមានសង្គ្រាមរវាងអ៊ីរ៉ង់ និងអ៊ីស្រាអែល រួមជាមួយអាមេរិក តម្លៃប្រេងបានកើនតម្លៃ ដែលធ្វើឲ្យស្ថានីយប្រេងចំនួនជិត ៥០ កន្លែង ត្រូវបានផ្អាកអាជីវកម្មដោយសារមានបញ្ហាពីការផ្គត់ផ្គង់ក្រុមហ៊ុន។ ប៉ុន្តែទោះបីជាយ៉ាងណាក្តី វាមិនបង្កឲ្យមានចលាចលក្នុងសង្គមឡើយ។ ស្ថានីយប្រេងឥន្ធនៈធំៗ បើកអាជីវកម្មធម្មតា មិនមានដំឡើងតម្លៃស្រេចតែចិត្តនោះទេ គឺបានគោរពតម្លៃទៅតាមការណែនាំរបស់ក្រសួងពាណិជ្ជកម្មទាំងអស់។

លោក ម៉ប់ សារិន បានស្នើឲ្យអាជ្ញាធរខណ្ឌទាំង ១៤ ចុះតាមដានសភាពការណ៍នៅតាមស្ថានីយប្រេងក្នុងមូលដ្ឋានរបស់ខ្លួនជាប្រចាំ ដើម្បីឲ្យម្ចាស់ស្ថានីយប្រេងគោរពទៅតាមតម្លៃដែលក្រសួងពាណិជ្ជកម្មបានកំណត់។

លោក ហួត ហៃ បញ្ជាក់ដែរថា ពាក់ព័ន្ធនឹងតម្លៃប្រេងឥន្ធនៈនាពេលនេះ លោក ឃួង ស្រេង បានយកចិត្តទុកដាក់ណាស់ ដោយបានណែនាំឲ្យមន្ត្រីពាក់ព័ន្ធតាមដានជាប្រចាំ ដោយកាលពីមុន ១០ ថ្ងៃ បញ្ជាក់តម្លៃម្ដង តែសម្រាប់ពេលនេះត្រឹមតែ ៣ ថ្ងៃ ត្រូវបញ្ជាក់តម្លៃម្តង ដើម្បីធ្វើយ៉ាងណាកុំឲ្យតម្លៃប្រេងឡើងថ្លៃហួសពីការកំណត់តម្លៃរបស់ក្រសួងពាណិជ្ជកម្ម។

បន្ថែមពីនេះ ការបោសសំអាតបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) គណ:បញ្ជាការឯកភាពរដ្ឋបាលរាជធានីភ្នំពេញ បានចុះប្រតិបត្តិការជាប្រចាំ មិនថាពេលថ្ងៃ ឬយប់ឡើយ សំដៅធ្វើយ៉ាងណាបោសសំអាតឲ្យអស់ទៅតាមផែនការរបស់ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅពាក់កណ្ដាលខែមីនា ឆ្នាំ ២០២៦ ខាងមុខនេះ៕

អត្ថបទ ៖ ស្រីរ័ត្ន