អភិបាលរាជធានី ៖ ការបង្រ្កាប (Online Scams) ត្រូវតែធ្វើដោយមិនរាថយ ធ្វើឲ្យកាន់តែសកម្ម និង ប្រកាន់ខ្ជាប់វិជា្ជជីវៈនៅពេលប្រតិបត្តិការ

លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ បានណែនាំឲ្យកងកម្លាំងមានសមត្ថកិច្ច និង គណៈបញ្ជាការឯកភាពខណ្ឌទាំង ១៤ ដោយការងារបង្រ្កាបបទល្មើសឆបោកតាមប្រព័ន្ធបច្ចេកវិទ្យា (Online Scams) គឺត្រូវតែធ្វើដោយមិនរាថយដាច់ខាត ត្រូវតែចុះត្រួតពិនិត្យទីតាំងសង្ស័យឲ្យកាន់តែសកម្ម ហើយត្រូវប្រកាន់ខ្ជាប់នូវវិជា្ជជីវៈរបស់ខ្លួនឲ្យបានត្រឹមត្រូវក្នុងពេលចុះប្រតិបត្តិការ។

ការណែនាំនេះក្នុងឱកាស លោក ឃួង ស្រេង បានដឹកនាំកិច្ចប្រជុំត្រួតពិនិត្យវឌ្ឍនភាពការបង្រ្កាបបទល្មើសឆបោកតាមប្រព័ន្ធបច្ចេកវិទ្យា (Online Scams) ដោយមានវត្តមានចូលរួមពី លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ លោកឧត្តមសេនីយ៍ទោស្នងការរងរាជធានីភ្នំពេញ ព្រមទាំងអភិបាលខណ្ឌទាំង ១៤ កាលពីព្រឹកថ្ងៃទី ៩ ខែមិថុនា ឆ្នាំ ២០២៦ នេះ។

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា ក្នុងកិច្ចប្រជុំនេះ ក្រោយពីស្តាប់របាយការណ៍វឌ្ឍនភាព នៃការងារ បង្រ្កាបបទល្មើសតាមប្រព័ន្ធបច្ចេកវិទ្យា (Online Scams) ដែលរាយការណ៍ដោយលោកស្នងការរង តំណាងស្នងការ នៃស្នងការដ្ឋាននគរបាលរាជធានីភ្នំពេញរួចមក លោក ឃួង ស្រេង បានអនុញ្ញាតឲ្យអភិបាលខណ្ឌចូលរួមមតិយោបល់ ក៏ដូចជាការចែករំលែកបទពិសោធ ព្រមទាំងបញ្ហាប្រឈមនានាក្នុងរង្វង់ប្រតិបត្តិការកន្លង ដើម្បីពិភាក្សារកដំណោះស្រាយធ្វើយ៉ាងណាឲ្យការងារបង្រ្កាបបទល្មើសនេះកាន់តែមានប្រសិទ្ធភាព និង ឈានដល់ការបង្រ្កាបឲ្យអស់ក្នុងភូមិសាស្រ្តរាជធានីភ្នំពេញ៕
អត្ថបទ ៖ ស្រីរ័ត្ន