ព័ត៌មានជាតិ

ខេត្តបាត់ដំបង នឹងចាប់ផ្តើមរៀបចំបំពាក់អំពូលសូឡាពីព្រំប្រទល់ខេត្តពោធិ៍សាត់ រហូតដល់ខេត្តបន្ទាយមានជ័យ

បានផុស

៣ ខែ មុន

នៅ

ថ្ងៃពុធ ១៨ មីនា ២០២៦

ដោយ

លោក សុខ លូ អភិបាលខេត្តបាត់ដំបង នៅថ្ងៃទី១៧ ខែមីនា ឆ្នាំ២០២៦ បានប្រកាសពីដំណើរការរៀបចំបំពាក់អំពូលសូឡាតាមផ្លូវជាតិលេខ ៥ ពីប្រព្រំប្រទល់ខេត្តពោធិ៍សាត់រហូតដល់ខេត្តបន្ទាយមានជ័យ ដែលមានចម្ងាយជាង ១០០ គីឡូម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ លូ បានប្រកាសបែបនេះ ក្នុងឱកាសបើកការដ្ឋានសាងសង់ប្រព័ន្ធលូនិងស្ដារប្រឡាយស្ថិតនៅក្នុងស្រុកមោងឫស្សី ខេត្តបាត់ដំបង។

លោកសូខ លូ បានបញ្ជាក់ថា គម្រោងរៀបចំដាក់អំពូលសូឡាបំភ្លឺផ្លូវក្នុងភូមិសាស្រ្តខេត្តបាត់ដំបងទទួលបានការឧបត្ថម្ភគាំទ្រពីលោក កែវ រតនៈ រដ្ឋមន្រ្តីក្រសួងរ៉ែ និងថាមពល។

ផ្លូវជាតិលេខ ៥ មានប្រវែងសរុប ៤០៧,៤៥ គីឡូម៉ែត្រ ឆ្លងកាត់ខេត្តកណ្តាល ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង និងខេត្តបន្ទាយមានជ័យ។

ពាក់ព័ន្ធការរៀបចំប្រព័ន្ធសូឡាតាមដងផ្លូវជាតិ អាជ្ញាធរខេត្តពោធិ៍សាត់បានបញ្ចប់ការដំឡើងបង្គោលអំពូលសូឡាក្នុងភូមិសាស្រ្តខេត្តពោធិ៍សាត់ចាប់ពីប្រទល់ខេត្តកំពង់ឆ្នាំងដល់ខេត្តបាត់ដំបង។

លោក ខូយ រីដា អភិបាលនៃគណៈអភិបាលខេត្តពោធិ៍សាត់បានគូសបញ្ជាក់ថា ការរៀបចំអំពូលសូឡាតាមដងផ្លូវជាតិសំខាន់ៗពិតជាមានសារៈសំខាន់ណាស់ ជួយកាត់បន្ថយគ្រោះថ្នាក់ចរាចរណ៍ ធានាបាននូវសន្តិសុខ សុវត្ថិភាព និងភាពងាយស្រួលក្នុងការធ្វើដំណើរជូនប្រជាពលរដ្ឋនាពេលយប់៕