ម្ចាស់ឡូរីនៅ​បាត់ដំបងថ្ងូរ​ថា​ ស្ទើរតែដាច់បាយ ដោយសារអត់ភ្ញៀវទេសចរជិះដូចមុន  

បើទោះបីជាម្ចាស់ឡូរីទាំងអស់មិនបានឡើងថ្លៃនៅពេលដែលប្រេងសាំងហក់ឡើងខ្ពស់យ៉ាងណាក៏ដោយ ក៏ម្នាក់ៗស្ទើរតែដាច់បាយដោយសារ​គ្មានភ្ញៀវទេសចរទាល់តែសោះ ស្រប​អាកាសធាតុ​ឡើង​ក្តៅហួតហែង​ផង។    

កំពុងសម្រាកនៅក្នុងអង្រឹង លោក ហួន ស៊ីណាត ជាប្រជាពលរដ្ឋរស់នៅក្បែរស្ថានីយរថភ្លើងអូរដំបងស្ថិតក្នុងឃុំអូរដំបង​១ ស្រុកសង្កែ ខេត្តបាត់ដំបងបានរៀបរាប់ថា សព្វថ្ងៃឡូរីដែលនៅប្រចាំការក្នុងស្ថានីយអូរដំបងមានសរុបប្រហែល ១០ គ្រឿង ដែលត្រូវ​រត់​ផ្លាស់ប្ដូរវេនគ្នាជាប្រចាំដើម្បីឲ្យបានរស់ទាំងអស់គ្នា។    

លោកបន្តថា កាលពីមុនគោលដៅរបស់ឡូរីត្រូវដឹកចេញពីស្ថានីយអូរដំបង ទៅកាន់ស្ថានីយអូរស្រឡៅ ដែលមានចម្ងាយប្រមាណ ១០ គីឡូម៉ែត្រ ហើយត្រូវដឹកភ្ញៀវទេសចរត្រឡប់មកកាន់ស្ថានីយអូរដំបងវិញ។ ប៉ុន្តែក្រោយពីខេត្តបាត់ដំបង​បង្កើត​ឲ្យមានផ្លូវវាងក្រុង ចាប់តាំងពីពេលនោះមកគឺឡូរីត្រូវបានផ្អាកការធ្វើដំណើរទៅកាន់ស្ថានីយអូរស្រឡៅ ព្រោះ​ត្រូវឆ្លង​កាត់ផ្លូវហាយវេដែលជាតំបន់គ្រោះថ្នាក់ ហើយក៏បានបង្វែរទិសដៅគឺត្រូវចេញពីស្ថានីយអូរដំបងមកកាន់ស្ពានរថភ្លើងក្បែរវត្តកណ្ដឹងវិញ ដែលមានចម្ងាយប្រហែល ៤ គីឡូម៉ែត្រប៉ុណ្ណោះទើបត្រូវត្រឡប់ទៅវិញ។  

 

លោកបន្ថែមថា មួយរយៈចុងក្រោយនេះមិនដឹងថាដោយសារអាកាសធាតុក្តៅខ្លាំងឬយ៉ាងណានោះទេ ទើបធ្វើឱ្យបាត់ភ្ញៀវទេសចរទាំងជាតិនិងអន្តរជាតិ។ ម្យ៉ាងវិញទៀតឡូរីមិនមានដំបូលដើម្បីជ្រកនោះទេ គឺត្រូវអង្គុយនៅក្រោមកំដៅថ្ងៃ។ រីឯតម្លៃបើទោះបីជាសាំងឡើងថ្លៃក៏ដោយ ក៏ឡូរីនៅតែរក្សាតម្លៃដដែលគឺភ្ញៀវក្នុងស្រុកតម្លៃ ១ មុឺនរៀល បើភ្ញៀវបរទេសគឺតម្លៃ ៥ ដុល្លារ។    

ជាចុងក្រោយលោកបានសង្កត់ធ្ងន់ថា ក្នុងមួយថ្ងៃការរត់ឡូរីវិលជុំសឹងតែមិនបានម្នាក់មួយជើងផង ព្រោះគ្មានភ្ញៀវទាល់​តែ​សោះ។ ម្យ៉ាងវិញទៀតនៅស្ថានីយអូរស្រឡៅ ក៏មានក្រុមឡូរីមួយក្រុមទៀតនៅប្រចាំការទីនោះ ដោយគោលដៅរត់ចេញពីស្ថានីយអូរស្រឡៅទៅកាន់ស្ថានីយរាំងកេសី ហើយត្រឡប់មកកាន់ស្ថានីយអូរស្រឡៅវិញ៕

អត្ថបទ៖ សោ និយមរ័ត្ន