អភិបាលខេត្តតាកែវយល់ស្របការយក “ក្មេងទំនើង” ទៅបម្រើសកម្មភាពជួរមុខជំនួសការដាក់ពន្ធនាគារ

បញ្ហាក្មេងទំនើងដែលនៅតែបន្តកើតមាន និងបង្កការព្រួយបារម្ភដល់សង្គម លោក វ៉ី សំណាង អភិបាលខេត្តតាកែវ បានយល់ស្របតាមប្រសាសន៍ប្រមុខរាជរដ្ឋាភិបាល​ដោយយកពួកគាត់ទៅបម្រើសម្រាប់សកម្មភាពនៅជួរមុខជាជាងយកទៅដាក់ពន្ធនាគារ ព្រោះ​អាចសន្សំសំចៃថវិការដ្ឋ។

លោកអភិបាលខេត្តបានលើកឡើងថា ជារៀងរាល់ខែ ថវិកាដែលត្រូវចំណាយសម្រាប់អ្នកជាប់ឃុំនៅពន្ធនាគារខេត្តតាកេវ មានចំនួនច្រើនគិតចាប់ពីថ្លៃអាហារ ទឹក ភ្លើង និងការថែទាំផ្សេងៗ។ ការចំណាយទាំងនេះ ត្រូវបានលោកពិចារណាថា ជាបន្ទុកធ្ងន់លើថវិកាជាតិ ខណៈដែលអាចយកទៅប្រើប្រាស់ក្នុងការអភិវឌ្ឍន៍មូលដ្ឋាន ឬសេវាសាធារណៈផ្សេងៗបានប្រសើរជាង។

ក្នុងន័យនេះ លោកបានលើកយោបល់ថា ជំនួសឱ្យការចាប់ខ្លួន និងដាក់ពន្ធនាគារក្មេងទំនើង គួរតែពិចារណាវិធានការផ្លាស់ប្តូរដោយនាំយកពួកគេទៅចូលរួមក្នុងសកម្មភាពដែលមានប្រយោជន៍ដល់សង្គម ឬការងារដែលអាចបង្កើតតម្លៃវិជ្ជមាន ពិសេសសកម្មនៅជួរមុខតែម្តង។ វិធីសាស្ត្រនេះ មិនត្រឹមតែជួយកាត់បន្ថយការចំណាយរដ្ឋប៉ុណ្ណោះទេ ប៉ុន្តែអាចជួយបំប្លែងអត្តចរិត និងឱ្យឱកាសក្មេងៗទាំងនោះត្រឡប់មកជាសមាជិកល្អក្នុងសង្គមវិញផងដែរ។

ការលើកឡើងនេះ ត្រូវបានធ្វើឡើងក្នុងឱកាសពិធីប្រកាសចូលកាន់ដំណែងអភិបាលក្រុងដូនកែវថ្មី លោក ឌឹម គឹមសាន្ត នៅព្រឹកថ្ងៃទី២៨ ខែមេសា ឆ្នាំ២០២៦។ ក្នុងកម្មវិធីនោះដែរ អាជ្ញាធរខេត្តក៏បានអំពាវនាវឱ្យមូលដ្ឋានពាក់ព័ន្ធ បន្តសហការក្នុងការរកដំណោះស្រាយបញ្ហាសង្គម ដោយផ្តោតលើការពារ និងអប់រំជាងការដាក់ទណ្ឌកម្មតែមួយមុខប៉ុណ្ណោះ៕

អត្ថបទ៖ វីរៈ