ព័ត៌មានជាតិ

ធនាគារពិភពលោកជំរុញរដ្ឋាភិបាលធ្វើឱ្យការងារមើលថែទាំកុមារ និងមនុស្សចាស់ ក្លាយជាជំនាញផ្លូវការ

បានផុស

២ នាទី មុន

នៅ

ថ្ងៃពុធ ១០ មិថុនា ២០២៦

ដោយ

ធនាគារពិភពលោកបានជំរុញដល់រដ្ឋាភិបាលគិតគូរបង្កើត និងទទួលស្គាល់ទម្រង់ការងារទាក់ទងនឹងការមើលថែកុមារ និងមនុស្សចាស់ ដោយថា៤ឆ្នាំខាងមុខកម្ពុជានឹងមានត្រូវការការងារលើផ្នែកទាំងនេះខ្ពស់ ហើយអាចបញ្ជូនអ្នកជំនាញនេះស្រាប់ទៅធ្វើការក្រៅប្រទេសបានថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងពិធីបញ្ចេញរបាយការណ៍ថ្មីមួយដែលមានចំណងជើង ពុះពារឆ្លងវិបត្តិ នៅសណ្ឋាគារឡឺរ៉ូយ៉ាល់ភ្នំពេញ កាលពីថ្ងៃទី០៩ ខែមិថុនា ឆ្នាំ២០២៦ មន្ត្រីជំនាញសេដ្ឋកិច្ចជាន់ខ្ពស់របស់ធនាគារពិភពលោកប្រចាំកម្ពុជាលោក Samik Adhikari ថាសន្ទស្សន៍ការងារមើលថែកុមារ និងមនុស្សចាស់នឹងកើនឡើងដល់ជាង៥០ម៉ឺនការងារ ដែលជាការបង្កើនផលិតផលក្នុងស្រុកសរុប GDP ដ៏សំខាន់មួយ ហើយប្រទេសក្នុងតំបន់អាស៊ីប៉ាស៊ីហ្វិកក៏មានតម្រូវការលើអ្នកជំនាញការងារនេះខ្ពស់ផងដែរ។ លោកថាការគិតគួរលើការងារនេះគឺជាការសម្រួចលើចក្ខុវិស័យឆ្នាំ២០៥០របស់កម្ពុជាផងដែរ។

លោក Smaik ៖ «យើងផ្លាស់ប្ដូរនួវការប្រែប្រួលប្រជាសាស្ត្រឱ្យក្លាយទៅជាឱកាសការងារក្នុងប្រទេសផ្សេងទៀតក្នុងតំបន់ ក៏ដូចជានៅកម្ពុជាផងដែរ។ ក្នុងវិស័យគោលនយោបាយមានន័យថាយើងអាចកសាងនូវបណ្ដាញអ្នកជំនាញថែទាំកុមារឱ្យក្លាយទៅជាជំនាញផ្លូវការក្នុងប្រទេសឬក្នុងតំបន់»។

បើតាមលោក Samik ស្ថានភាពប្រជាសាស្ត្ររបស់ប្រទេសកម្ពុជានាថ្ងៃអនាគតនឹងមានមនុស្សចាស់កាន់តែច្រើន ពិសេសនៅឆ្នាំ២០៥០ ដែលត្រូវមានការសម្រេចចិត្តផ្នែកនយោបាយឱ្យបានមុនឆ្នាំ២០៥០។

ទាក់ទងនឹងបញ្ហានេះទីប្រឹក្សាអមក្រសួងការងារលោក អ៊ុំ ច័ន្ទមនោ កម្ពុជាក៏បានរៀបចំគោលនយោបាយមួយចំនួនរួចហើយ ដើម្បីសម្រួចទៅកាន់ការអភិវឌ្ឍជំនាញនេះ។ ទោះជាយ៉ាងណា ការរៀបចំឱ្យមានប្រព័ន្ធការងារលើអ្នកថែទាំកុមារ និងមនុស្សចាស់នេះ គឺត្រូវការពាក់ព័ន្ធនឹងពេលវេលាបន្ថែមទៀត ព្រោះវាជាជំនាញកម្រិតខ្ពស់ដែលត្រូវការការបណ្ដុះបណ្ដាល និងការទទួលស្គាល់ពីអន្តរជាតិ។

លោកថា៖ «វាដូចជារឿងថ្មីសម្រាប់កម្ពុជា ដែលត្រូវមានប្រព័ន្ធដើម្បីស្វែងយល់ពីសេដ្ឋកិច្ចនៃការថែទាំនេះ»។

បើតាមលោក ច័ន្ទមនោ បច្ចុប្បន្នការបណ្ដុះបណ្ដាលជំនាញវិជ្ជាជីវៈដល់ពលរដ្ឋ ជាពិសេសពលករចំណាកស្រុកដែលត្រឡប់មកពីប្រទេសថៃ គឺផ្ដោតលើជំនាញដែលអាចឱ្យពួកគាត់រកប្រាក់ចំណូលភ្លាមៗសម្រាប់ទ្រទ្រង់ជីវភាពសិនប៉ុណ្ណោះ មិនទាន់អាចឈានទៅផ្ដោតលើជំនាញកម្រិតខ្ពស់ដូចជាការងារថែទាំនេះនៅឡើយទេ។

របាយការណ៍រួមគ្នារវាងអង្គការ UNFPA និងក្រសួងផែនការ ដែលបានចេញផ្សាយកាលពីខែកក្កដា ឆ្នាំ២០២៥ បានព្យាករណ៍ថា នៅឆ្នាំ២០៥០ ប្រជាជនកម្ពុជានឹងកើនឡើងដល់ ២២ លាននាក់ ខណៈដែលអត្រាលទ្ធភាពមានកូនសរុប (TFR) នឹងថយចុះមកនៅត្រឹម ២,០៤។ ប៉ុន្តែ ចំនួនប្រជាជនដែលមានអាយុលើសពី ៦០ ឆ្នាំ នឹងកើនឡើងរហូតដល់ទៅជាង ២៣% នៃប្រជាជនសរុប ដែលចំណុចនេះទាមទារឱ្យមានគោលនយោបាយត្រៀមរៀបចំយុវជននាពេលបច្ចុប្បន្ន សម្រាប់ការឈានចូលវ័យចាស់ប្រកបដោយសុខភាពល្អ និងផលិតភាព ដើម្បីធានាការបន្តចូលរួម និងការទទួលបានអត្ថប្រយោជន៍ពីការអភិវឌ្ឍសង្គមជាតិ៕

អត្ថបទដោយ ហ៊ុន សិរីវឌ្ឍន៍

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា