គម្រោង​សាងសង់ប្រព័ន្ធលូរំដោះទឹកកខ្វក់ និង​ស្ថានីយចម្រោះទឹកកខ្វក់​ក្រុង​សិរីសោភ័ណ គ្រោង​បញ្ចប់​ខែមិថុនានេះ

គម្រោងកែលម្អគ្រប់គ្រងបរិស្ថានក្រុងជុំវិញបឹងទនេ្លសាបជំហាន២ នៅ​ក្រុង​សិរីសោភ័ណ ខេត្ត​បន្ទាយមានជ័យ សម្រេច​វឌ្ឍនភាព​បានប្រមាណ ៩៥% ហើយគ្រោង​បញ្ចប់នៅ​ខែមិថុនា​ ឆ្នាំ ២០២៦។ នេះបើតាមមន្រ្តីអ្នកនាំពាក្យក្រសួងសាធារណការ និងដឹកជញ្ជូន។

លោក ផន រឹម អ្នកនាំពាក្យក្រសួងសាធារណការ និងដឹកជញ្ចូនបាន​បញ្ជាក់ថា មន្រ្តីជំនាញ​បាន​កំពុង​អនុវត្ត​គម្រោងកែលម្អគ្រប់គ្រងបរិស្ថានក្រុងជុំវិញបឹងទនេ្លសាបជំហាន២ ដែល​មាន​សាងសង់ប្រព័ន្ធលូរំដោះទឹកកខ្វក់ប្រវែង ​១១០,៩១ គ.ម ប្រព័ន្ធលូទឹកភ្លៀង​ប្រវែង ​៦,៨៨ គ.ម ព្រមទាំងស្ថាបនាស្ថានីយចម្រោះទឹកកខ្វក់ដែលមានសមត្ថភាព ៣៥០០ម៣/ថ្ងៃ។

លោកថា គិតត្រឹមថ្ងៃទី ២០ ខែមេសា ឆ្នាំ២០២៦ វឌ្ឍនភាពការងារ​សម្រេច​បាន​ប្រមាណ ៩៥% ដោយគម្រោងគ្រោងនឹងបញ្ចប់នៅបំណាច់​ខែមិថុនា ឆ្នាំ២០២៦​ខាងមុខ។

ពាក់ព័ន្ធការ​ខូចខាតហេដ្ឋារចនាសម្ព័ន្ធ​មកពីការអនុវត្ត​គម្រោង​ លោក ផន រឹម បានបញ្ជាក់ថា ក្រុមការងារបានកែសម្រួលផ្លូវដែលខូចខាត​ដោយសារ​គម្រោង ដើម្បី​សម្រួល​ការធ្វើដំណើររបស់ប្រជាពលរដ្ឋជា ខណៈ​អាជ្ញាធរក៏​ដូចជាមន្ត្រីអនុវត្ត​គម្រោង តែងតែ​តាមដានដោយយកចិត្តទុកដាក់ខ្ពស់ពីវឌ្ឍនភាពការងារនៅការដ្ឋានជាប់ជាប្រចាំ។

អនុគម្រោងសាងសង់សាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងសិរីសោភ័ណ នៃគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ ក្រោមឥណទានសម្បទានរបស់ធនាគារអភិវឌ្ឍន៍អាស៊ី (ADB)៕